Ձեր վստահելի աղբյուրը

Իշխան Զաքարյանն այսօր Գյումրիում հրավիրված Վերահսկիչ պալատի (ՎՊ) արտագնա նիստից հետո անդրադարձավ չարաշահումների մի շարք դեպքերի: Դրանց թվում ՎՊ նախագահը առանձնացրեց հատկապես Շիրակի մարզպետարանի իրավասության ներքո գտնվող սոցիալական տարածքային ծառայությունների աշխատանքները:

«Այստեղ և Գյումրիի քաղաքապետարանում 2 ծառայութուններ կան, սա ինձ համար չափազանց սկզբունքային հարց է»,- ասաց ՎՊ նախագահը: Նախորդ ստուգումներից մեկի ժամանակ, ինչպես նշեց Ի. Զաքարյանը, ինքը հայտարարել էր, որ պետբյուջեն տասնյակ միլիարդներ է հատկացրել սոցիալական ծառայություններին` որպես նպաստներ:

Ի. Զաքարյանը, ներկայացնելով սոցիալական նպաստների նշանակման և բաշխման կառույցները, ընդգծեց, որ խնդիրները ծնվում են այն բանից, որ մի կառույց չէ պատասխանատու բնագավառի համար:

«Ընդհանուր մի տեր և մի պատասխանատու չկա: Ես իմ առաջ խնդիր եմ դրել արմատապես փոխել այս իրավիճակը»,- ասաց Ի. Զաքարյանը: Խնդիրը ՎՊ-ի նախագահը բարձարացրել է նաև կառավարությունում:

Ստուգումները, որոնք իրականցվել են այս բնագավառում, վեր են հանել խայտառակ պատկեր: «Այտեղ պետական միջոցներն ուղղակի փոշիացվում են, նպաստները տրվում են մարդկանց, որոնք իրավունք չունեն ստանալու այն»,- ասաց բանախոսը:

Օրինակներ բերեց Ի. Զաքարյանը, որոնք ավելի քան խոսուն էին. Ամասիայի պետական սոցիալական ծառայության գործակալությունում կան 185 նպաստառուներ, «Պառնաս» ծրագրով ստուգվել են նրանցից 100-ը, բացահայտելով 22 խախտման դեպք, այս ծրագրից հետո ՎՊ-ն է ստուգումներ իրականացրել 40 հոգու շրջանում և բացահայտել ևս 4 խախտում: Այսպիսով` 185 հաշվառված նպաստառուներից 26-ն անօրինակ են ստացել այս կարգավիճակը:

Ապա ներկայացվեց Արթիկը, որտեղ 3058 նպաստառուներ կան, «Պառնաս» ծրագրով ստուգվել են 277-ը` բացահայտելով շուրջ 100 խախտման դեպք: «Պառնաս»-ի ստուգումներին հաջորդած ՎՊ-ի ստուգումներն ընդգրկել են 620գործ և հայտաբերել ևս 51 խախտում: Գյուղ Անիկի օրինակը բերվեց, որտեղ նպաստառուների ցուցակում Գայանե Կարապետյանի անունը կա: «Սա գյուղապետի տղայի ընտանիքն է, որը, իրականում, բաժանված չէ հոր ընտանիքից և ստանում է նպաստ»,- նշեց Ի. Զաքարյանը: