Գեղարդ վանքի երգեցիկ խումբը երգասացությունների 9-րդ մրցույթ-փառատոնին շահել է գլխավոր է «Գրան պրին»
Սուրբ Գեղարդ վանքի երգեցիկ խումբը Բելառուսի Գրոդնո քաղաքում փետրվարի 10-13-ին մասնակցել է «Կոլոժսկի բլագովեստ» ուղղափառ երգասացությունների 9-րդ մրցույթ-փառատոնին և շահել գլխավոր մրցանակը` «Գրան պրին»: Այս մասին այսօր լրագրողների հետ հանդիպման ժամանակ հայտնեց Սուրբ Գեղարդ վանքի երգեցիկ խմբի գեղարվեստական ղեկավար Մհեր Նավոյանը:
Նշենք, որ փառատոնին մասնակցել է 40 խումբ 6 երկրներից` Բելառուսից, Ռուսաստանի Դաշնությունից, Լեհաստանից, Լիտվայից, Սերբիայից և Հայաստանից: Փառատոնը նվիրված է եղել ուղղափառ եկեղեցիների կամ ուղղափառ մշակույթների հոգևոր երգասացություններին:
Մհեր Նավոյանը հայտնեց, որ մրցույթ-փառատոնին մասնակցում էին Բելառուսի բոլոր եկեղեցիների երգչախմբերը: «Բելառուսում դա հատուկ վարվող քաղաքականություն է, որովհետև իրենք հոգևոր մշակույթի վերելքով փորձում են պայքարել ուրիշ աղանդների դեմ` համարելով, որ հոգևոր մշակույթն ամենալավ զենքն է»,- հավելեց նա:
Նա նշեց, որ շատ ուրախ է, որ գնահատվում է կատարողական արվեստը: Փառատոնին հայկական երաժշտախումբը ներկայացրել է 25 րոպե տևողությամբ համերգ, որտեղ ներառված են եղել հայ միջնադարյան հոգևոր մոնոդիաներ, հոգևոր երգերի խմբերգային մշակումներ:
Հիշեցնենք, որ Ս. Գեղարդ վանքի երգեցիկ խումբը փառատոնին մասնակցել է ՀՀ վարչապետի բարձր հովանու ներքո: