Հանրային խորհուրդ. Վերադարձնել «Մոսկվա» կինոթատրոնի ամառային դահլիճին իր նախկին կարգավիճակը
Հանրային խորհրդի 10-րդ լիագումար նիստում բավականին լուրջ քննարկումների, բանավեճերի արդյունքում որոշում ընդունվեց Երևանի «Մոսկվա» կինոթատրոնի ամառային դահլիճի վերաբերյալ` չապամոնտաժել շինությունը և վերականգնել այն կարգավիճակը, որն ուներ մինչև մարտի 4-ին կառավարության ընդունած որոշումը, այսինքն` կրկին մտցնել պետության կողմից պահպանվող հուշարձանների ցուցակի մեջ:
Որոշումն ընդունվեց ՀԽ 17 անդամների կողմ քվեարկության արդյունքում: Անդամներից 11-ն ընդհանրապես առաջարկում էին ձեռնպահ մնալ այս հարցում և որևէ որոշում չընդունել, որպեսզի առանց այն էլ սրված մթնոլորտն էլ ավելի չսրվի:
Զեկուցող ՀԽ քաղաքաշինության և ճարտարապետության հարցերի ենթահանձնաժողովի նախագահ Գրիգոր Ազիզյանն ասաց, որ մոռեդն ոճի այս մշակութային կոթողը հիացրել է ոչ միայն հայերին, այլև օտարերկրացի ճարտարապետներին, ու շատերն են զարմացել, երբ իմացել են, որ այն ցանկանում են քանդել:
Նիստի ընթացքում շատերը ելույթ ունեցան, ու գրեթե բոլորն էլ դեմ էին կառույցի քանդմանը, սակայն նրանք միաժամանակ շեշտում էին, որ դեմ լինելով քանդմանը, դեմ չեն ելնում Հայկական Առաքելական եկեղեցուն: «Որպես արվեստագետ` դեմ եմ որևէ հուշարձանի քանդմանը կամ ապամոնտաժմանը, բայց եթե դա պետք է պահպանվի այն գնով, որ եկեղեցու ու հասարակության միջև հակամարտություն սկսվի, ճիշտ չէ պահպանելը»,- ասաց ՀԽ անդամ, արվեստագետ Աննա Ասատրյանը:
ՀԽ անդամ Կարեն Բեքարյանն առաջարկեց պահպանել շինությունը ներկա տեսքով, բայց այն հանձնել Մայր Աթոռ Սուրբ Էջմիածնին ու վերածել հոգևոր-մշակութային կենտրոնի, կրոնական թեմաներով քննարկումներ կազմակերպել այնտեղ, քանի որ կառույցը չի կարող կատարել իր հիմնական գործառույթը: Ինչպես ասել է սեփականատերը, իր գործառույթը ծառայեցնելը բավական բարդ ու դժվար է:
Մարկոս Սրբազանն ասաց, որ կառույցը չի կատարում իր ֆունկցիոնալ նշանակությունը: «Դա հիքմ չէ, որ ապամոնտաժեն, սակայն հետագայում խնդիրներ կունենանք կառույցը պահպանելու հարցում: Շատ լավ առաջարկ է` պահել, բայց ի՞նչ գնով: Ինձ ստույգ աղբյուներից ասել են, որ ճարտարապետը այն բարձրության վրա է կառուցել այդ շինությունը, որ տեղ թողնի այդտեղ պեղումներ անելու համար: Հեղինակը թողել է այդ հնարավորությունը մեզ, որ այդտեղ կառուցված եկեղեցին ոչ միայն հիշողություն մնա, այլ ինչ–որ ժամանակ իրականություն դառնա: Ապամոնտաժումը չպետք է ինքնանպատակ լինի»,- ասաց սրբազանը:
«Ես երեկ մեկուկես ժամ խոսել եմ Վեհափառի հետ: Նրա մտահոգությունն այն է, որ այդ շինությունը չի ծառայում իր նպատակին: Նա դեռ հանդիպելու է ճարտարապետների հետ ու բանակցելու նրանց հետ: Վեհափառը շատ նուրբ է մոտենում հարցին»,- ասաց Հանրային խորհրդի նախագահ Վազգեն Մանուկյանը:
Լրահոս
Տեսանյութեր
«Տավուշը հանուն հայրենիքի» շարժման անդամները քայլերթով գալու են Երևան. Բագրատ Սրբազան