Ձեր վստահելի աղբյուրը

Մայիսի 3-ին ՀՀ նախագահ Սերժ Սարգսյանի մասնակցությամբ չինական Դաթուն քաղաքում հանդիսավոր կերպով գործարկվեց քլորոպրենային կաուչուկի արտադրության «Շանսի-Նաիրիտ» գործարանը:

Հանդիսավոր արարողությանը մասնակցելու նպատակով ՀՀ նախագահ Սերժ Սարգսյանը Դաթուն էր ժամանել Շանհայից` մինչ այդ նահանգապետ Վան Ձյունի հետ հանդիպման նպատակով կարճատև կանգառ անելով մարզկենտրոն Թայյուանում:

Գործարանի անձնակազմի, նահանգային ու քաղաքային իշխանությունների ներկայացուցիչներն իրենց ելույթներում շնորհակալություն հայտնեցին Հայաստանի կառավարությանը` Դաթուն քաղաքի չափանիշներով խոշոր նախագծի իրականացման համար: «Շանսի-Նաիրիտ» գործարանի տնօրենների խորհրդի նախագահ Ջան Այբին իր ելույթում նշեց, որ տարեկան 30000 տոննա թողունակությամբ գործարանի կառուցման համար ներդրվել է շուրջ 1,5 տրիլիոն յուան (մոտ 220 մլն դոլար):

ՀՀ էներգետիկայի ու բնական պաշարների փոխանախարար, համատեղ ձեռնարկության խորհրդի փոխնախագահ Իոսիֆ Իսայանի ներկայացմամբ, նախագծում հայկական կողմը ներդրել է գործարկված երեք հոսքագծերից մեկը, ինչպես նաև քլորոպրենային կաուչուկի ստացման երևանյան «Նաիրիտի» տեխնոլոգիան:

Ի. Իսայանի տեղեկացմամբ, ստացվելիք արտադրանքն իրացման խնդիր չի ունենա, քանի որ միայն չինական շուկան բավարար է այն ամբողջությամբ ընդունելու համար: Ավելին` «Շանսի-Նաիրիտն» ու Չինաստանում գործող մյուս երկու նույնատիպ գործարանների հզորությունը բավարար չէ այդ երկրի ներքին շուկայի պահանջները բավարարելու համար: Այնպես որ չի բացառվում` հայ-չինական համագործակցությունն այս ոլորտում հետագա ընդլայնում ունենա:

Ինչ վերաբերում է նորաստեղծ «Շանսի-Նաիրիտ» ձեռնարկությանը, ապա դրա բաժնեմասերի 40 տոկոսը պատկանում է ՀՀ կառավարությանը: Ձեռնարկության տարեկան եկամուտները գնահատվում են շուրջ 100 մլն դոլար: Նախնական փուլում հայկական կողմի զուտ շահույթի չափերն առայժմ անհայտ են, քանի որ Ի. Իսայանի տեղեկացմամբ, սկզբնական եկամուտն ուղղվելու է ներդրումների սպասարկմանը: Իսկ հետագայում հայկական կողմը կանոնավոր կերպով կստանա գործարանից ստացված շահույթը: Ինչպես իր բացման խոսքում նշեց ՀՀ էներգետիկայի և բնական պաշարների նախարար Արմեն Մովսիսյանը, այդ գումարն ամբողջությամբ կփոխանցվի ՀՀ պետական բյուջեին:

Նշենք, որ գործարանի բացման հանդիսավոր արարողությունն ավարտվեց հյուրասիրությամբ, որին հետևեց ՀՀ նախագահ Սերժ Սարգսյանի մասնակցությամբ ծառատունկը: Միջոցառման ողջ ընթացքում գործարանի տարածքում ելույթ էին ունենում չինական ավանդական կրկեսի արտիստները, իսկ շրջակայքում մերթ ընդ մերթ հրավառություն էր կազմակերպվում:

«Շանսի-Նաիրիտ» գործարանի բացումը ՀՀ նախագահի Չինաստան կատարած աշխատանքային այցի ընթացքում վերջին միջոցառումն էր: Դաթունից ՀՀ նախագահ Սերժ Սարգսյանն ու նրա գլխավորած պատվիրակությունը վերադարձան Երևան:

Հիշեցնենք, որ նախագահ Սերժ Սարգսյանը ՉԺՀ ղեկավար Հու Ձինթաոյի հրավերով ապրիլի 29-ին աշխատանքային այցով մեկնել է Չինաստան: Այցի ընթացքում նախագահ Սարգսյանը մասնակցել է «Շանհայ-էքսպո-2010» համաշխարհային ցուցահանդեսի պաշտոնական բացմանը, հանդիպումներ է ունեցել ՉԺՀ նախագահ Հու Ձինթաոյի, ինչպես նաև Սուժոուի քաղաքապետ Յան Լիի հետ: Այցելության ընթացքում նախագահ Սարգսյանը եղել է Սուժոուի տեխնոպարկում, և հանդիպումներ ունեցել չինական խոշորագույն` ավտոբուսաշինության առաջատար «Հայգեր», հեռահաղորդակցության ոլորտի համաշխարհային առաջատար «Հուավեյ» և կրկին հեռահաղորդակցության ոլորտում գործունեություն ծավալող «Զի Թի Ի» (ZTE) կորպորացիաների` ղեկավարների հետ: