«Արարատից Սիոն». Կոչ`հայ ժողովրդին. «Դուրս գալ փոքրության բարդույթից և սեփական պատմության տերը դառնալ»
«Արարատից Սիոն» ֆիլմը ներկայացնում է հայերի համամարդկային ներդրումը աշխարհի կենտրոնում և մի պատմություն, որը գրված է ոչ թե մեր, այլ աշխարհի կողմից: Ֆիլմի միջոցով փորձում է արվել կառուցել հայ ժողովրդի պատկերը, միջազգային դիմանկարը այլ ժողովուրդների կողմից մեզ հասած պատմագրական տվյալների միջոցով: Այս մասին ֆիլմի շնորհանդեսի ժամանակ ասաց սցենարի հեղինակ և պրոդյուսեր Տ. Մեսրոպ քահանա Արամյանը:
«Ֆիլմը պատրաստված է նախ և առաջ աշխարհին մեզ ներկայացնելու համար, քանի որ աշխարհին ներկայանալու խնդիրներ ունենք: Քիչ են այն դիմանկարային կինոնկարները, որոնք ներկայացնում են մեզ աշխարհին: Այս ֆիլմը մեր ժողովրդի կինոանձնագիրն է միջազգային ասպարեզում: Մեկ այլ կարևոր նպատակ էլ ունի. պատկանալիության և արժանապատվության մի հզոր կոչ է մեր ժողովրդին` դուրս գալ փոքրության բարդույթից և սեփական պատմության տերը դառնալ»,- ասաց նա:
Ըստ Մեսրոպ քահանա Արամյանի, հայ ժողովուրդն աշխարհի հոգևոր կենտրոնում ունի իր դերակատարությունը, և դա պատահականություն չէ: Դարեր շարունակ աներևակայելի ճիգերի գնով հայը պահել է իր ներկայությունը Սուրբ Երկրում` Երուսաղեմում:
Կինոնկարում գործածված պատմական տվյալների զգալի մասը պահպանված չէ հայ պատմագրության մեջ: Ֆիլմում օգտվել են հունական, ասորական, արաբական, եբրայական աղբյուրներից: Քահանան նշեց, որ Պաղեստինում, Եգիպտոսում չկա որևէ տեղ, որտեղ հայերի մասին արձանագրություն, հիշատակություն լինի, որն իրենց կողմից նկարահանված չլինի: «Տաս սերիայի նյութ ունենք, բայց փորձել ենք այդ ամենը ներկայացնել 70-րոպեանոց այս ֆիլում ու դա ստացվել է»,- ասաց ֆիլմի կինոռեժիսոր Էդգար Բաղդասարյանը: Երեք տարվա աշխատանքների արդյունքում է ծնվել «Արարատից Սիոն» ֆիլմը:
Պատմության հերոսը հայ ուխտավորն է, ով անցել է մահվան մեծ հավանականություն ունեցող ճանապարհներով և իրեն կոչել «մահտեսի»` «մահը տեսնող»: «Այսօր տկարացել է ուխտագնացության ոգին: Առանց ուխտավոր ունենալու, դժվար կլինի պահել մեր ներկայությունը Սուրբ Երկրում: Քրիստոնեության համար այսօր դժվարագույն ժամանակներ են: Քրիստոնեությունը կանգնած է անհետացման շեմին: Միակ ճանապարհը ուխտագնացության ոգին բարձրացնելն է: Ֆիլմով շատ հարցեր կլուծենք: Ֆիլմը ինչ-որ առումով քրիստոնյաների միասնության կոչ է, որպեսզի մենք ոչ թե հակասությունների վրա սևեռվենք ու անընդհատ իրար կոկորդ կրծենք, այլ հասկանանք, որ միավորող գործոններն ավելի կարևոր են մեզ բոլորիս համար»,- ասաց քահանա Արամյանը:
Ֆիլմի բնօրինակը անգլերեն լեզվով է, և ֆիլմի տեքստը պատմում է մեծանուն հոլիվուդյան դերասան Էյդան Քուինը: Ֆիլմում հնչում է այսօր համաշխարհային կինոյի ամենահայտնի երաժշտական հանճար Լիզա Ջերարդի ձայնը:
Ֆիլմը մտել է ութ միջազգային կինոփառատոների եզրափակիչ մրցանակային փուլ: Մայիսի 12-ից Միացյալ Թագավորությունում կայանալիք համաշխարհային պրեմիերայով սկսվում է ֆիլմի շրջագայությունը աշխարհում: Ֆիլմը ծրագրվում է ցույց տալ խոշորագույն ամերիկյան, եվրոպական և ռուսական հեռուստաալիքներով:
Համաշխարհային պրեմիերայից առաջ ֆիլմը հայերեն սինխրոն թարգմանությամբ ներկայացվում է հայ հանդիսատեսին «Մոսկվա» կինոթատրոնում՝ այսօրվանից, ու կշարունակվի առաջիկա երկու շաբաթվա ընթացքում:
Նշենք նաև, ֆիլմի հայաստանյան ցուցադրության հովանավորն է «ՎիվաՍել-ՄՏՍ» ընկերությունը:
Լրահոս
Տեսանյութեր
Հայաստանը չի որոշում մասնակցե՞լ Բաքվի կոնֆերանսին, թե՞ ոչ. Քաղտեխնոլոգ
