Ձեր վստահելի աղբյուրը

Ադրբեջանը հերթական անգամ ՄԱԿ-ի ամբիոնն օգտագործեց իր տեսակետը միջազգային հանրությանը որպես միակ ու անժխտելի ճշմարտություն ներկայացնելու համար` երեկ Ալիևը հայտարարեց, թե «Հայաստանը օկուպացրել է այդ երկրի տարածքները, այդտեղ իրականացրել էթնիկ զտումներ»… Մի խոսքով` երգեց նույն երգը: Ի դեպ, նրա հետ, որ Ալիևը քաղաքական երգարվեստի հանդեպ հատուկ թուլություն ունի, համաձայն է նաև Հայաստանի դեմոկրատական կուսակցության առաջնորդ Արամ Սարգսյանը. «Պարոնը հերթական անգամ նույն երգն է երգում, որը դարձել իր համար սովորական, այսպես ասած, ամենօրյա զբաղմունք և որևէ ուշադրություն դրան դարձնել պետք չէ»,- Panorama.am-ին ասաց Ա.Սարգսյանը:

Կարևոր քաղաքական սկզբունք է` իրեն հարգող երկրի ղեկավարն ամեն օր չի ասի այն, ինչը չի կարող իրականացնել և, մեր զրուցակցի կարծիքով, իրեն հարգող նախագահը իր ասածի տերն է, մինչդեռ կոնկրետ Ալիևի պարագայում գործ ունենք «մարդ է, թող խոսի էլի» բնորոշման հետ միայն:

Ադրբեջանական լիդերի փորձերը` ղարաբաղյան հակամարտության կարգավորման խնդիրը տեղափոխել այլ հարթություն և կոնկրետ այս պարագայում ՄԱԿ, ևս չարդարացրեցին Ալիևի սպասելիքները: Սրան վերաբերող մեր հարցադրմանն ի պատասխան Ա.Սարգսյանը հիշեցրեց, որ ամենալավ պատասխանը հնչեցրել է միջազգային հանրությունը. «Բազմիցս է հայտարարվել, որ բանակցային գործընթացի ֆորմատի տեղափոխումը ՄԱԿ ընդունելի չէ և անգամ Թուրքիան է այս հարցում շեշտադրումը դնում միայն նրա վրա, որ կարևորը տարածքային ամբողջականության խնդիրն է, ինչն էլ հերթական անգամ վկայում է այն մասին, որ Ադրբեջանը սոլո է երգում»:
Մեկ այլ կարևոր հանգամանք ևս` ՄԽ համանախագահները իրենք էլ թույլ չէին տա, ըստ Ա.Սարգսյանի, որ բանակցային գործընթացը տեղափոխվի այլ հարթություն, քանի որ դա կնշանակեր, որ իրենք ընդունում են իրենց անզորությունը տվյալ հարցում: Մինչդեռ չմոռանանք, թե ո՞ր երկրների մասին է խոսքը:

Բայց և այնպես Ադրբեջանը չի կարողանում հրաժարվել իր ասածից ու շարունակ ճիգեր է գործադրում, որոնք տապալվում են, ինչպես, օրինակ, եղավ ՄԱԿ-ում նախաձեռնած բանաձևի քննարկման ձախողումը:

Մյուս հարցի պատասխանը ևս տեղավորվում է վերը նշված բնորոշումների ու որակումների մեջ: Խոսքն այն մասին է, որ Ալիևը երեկվա իր ելույթում հույս հայտնեց, որ առաջիկայում կընդլայնվի ԵԱՀԿ Մինսկի խմբի խաղաղարար առաքելությունը: Ա.Սարգսյանի կարծիքով, Ադրբեջանի նախագահը քաջ գիտակցում է, որ Թուրքիայի ՄԽ-ում ներգրավվելու հարցը լուրջ չէ, առավել ևս այդ երկիրը խնդիրներ ունի ԵՄ անդամակցության հետ հայտնի դրդապատճառներով. «Ավելին` Թուրքիայի կշիռը աշխարհաքաղաքական զարգացումներում ավելի ուռճացված է, քան իրականում կա»,- նկատեց Panorama.am-ի զրուցակիցը:
Եվ հավելեց` այս պահի դրությամբ Հայաստանի դիվանագիտությունը ինչ-որ չափով կարողացավ իրեն արդարացնել ու թեև այդքան էլ լավատեսորեն տրամադրված չի, բայց և չի կարող չնշել, որ ձեռնարկված որոշակի հակաքայլերը իրենց ազդեցությունն անշուշտ ունեցան: