Ձեր վստահելի աղբյուրը

Ինպես հայտնի է, ԵԱՀԿ մինսկի խմբի համանախագահները հոկտեմբերի 6-ից գտնվում են տարածաշրջանում, որի շրջանակներում վերջիններս առանձին հանդիպումներ են ունեցել ՀՀ նախագահ Սերժ Սարգսյանի ու Ադրբեջանի նախագահ Իլհամ Ալիևի հետ, այնուհետև մեկնել Ստեփանակերտ, որտեղ հանդիպում են ունեցել ԼՂՀ նախագահ Բակո Սահակյանի հետ: Հանդիպման ընթացքում քննարկվել են ԼՂ հիմնախնդրի հետ կապված հարցեր, մասնավորապես, ԵԱՀԿ Մինսկի խմբի դաշտային առաքելության աշխատանքների հետ կապված խնդիր: Այս և մի շարք այլ հարցերի շուրջ Panorama.am-ը զրուցել է ԼՂՀ նախագահի աշխատակազմի հասարակայնության հետ կապերի գլխավոր վարչության պետ Դավիթ Բաբայանի հետ:

«Երբ ԵԱՀԿ Մինսկի խմբի համանախագահները դաշտային առաքելություն իրականացնելու հարցով դիմեցին Արցախի իշխանություններին, ղարաբաղյան կողմից այդ հարցի շուրջ որևէ խոչընդոտ, արգելք չստեղծվեց, սակայն եղել է մի այսպիսի նախապայման. եթե համանախագահները կարծում են, որ այս առաքելությունը կարող է նպաստել ադրբեջանա-ղարաբաղյան հիմնախնդրի կարգավորման գործընթացին, ինչ-որ ձևով դրական լիցք հաղորդել, մենք դեմ չենք, սակայն նմանատիպ առաքելությունը պետք է իրականացվի նաև Արցախի Հանրապետության այն տարածքներում, որոնք գտնվում են Ադրբեջանի ռազմակալման տակ: Սա եղել է նախապայման, որը մենք առաջադրել ենք համանախագահներին»,- ասաց նա:

ԼՂՀ պաշտոնյայի խոսքերով՝ համանախագահները Արցախի նախապայմանն ընդունել են, և համաձայնություն է ձեռք բերվել, որ առաջին փուլը կայանա Արցախի Հանրապետությունում, իսկ երկրորդ փուլը՝ Արցախի այն տարածքներում, որոնք գտնվում են Ադրբեջանի օկուպացման տակ:

«Երեկ Արցախի նախագահի և համանախագահների միջև կայացած հանդիպման ժամանակ Բակո Սահակյանն այս հարցադրումը ևս մեկ անգամ դրել է նրանց առջև, ինչը նրանց կողմից բավականին նորմալ է ընդունվել: Համանախագահները հաստատել են, որ պայմանավորվածությունը գտնվում է ուժի մեջ, և երկրորդ փուլում Ադրբեջանի կողմից օկուպացված տարածքներում կիրականացվի փաստահավաք առաքելությունը: Ինչպես հայտնի է՝ 2005 թվականին ևս նմանատիպ փաստահավաք առաքելություն է իրականացվել, սակայն տարբերությունն այստեղ մեծ է, քանի որ որակական փոփոխությունը նկատելի է,- ընդգծեց Դ. Բաբայանը:

Նրա խոսքերով, եթե 2005 թվականին եղել է փաստահավաք, այս անգամ ուղղակի դաշտայի առաքելության խումբ է, որի նպատակը իրավիճակին ծանոթանալն է, ինչը արմատապես փոխում է իրավիճակը, նպատակը, այսինքն՝ համանախագահող երկրները իրոք ցանկանում են ծանոթանալ իրավիճակին, առանց որևէ քաղաքական հետևությունների:

Ինչ վերաբերվում է փոփոխությանը, ապա Դ. Բաբայանը նշեց. «Հինգ տարի առաջ, երբ փաստահավաք առաքելությունը ժամանեց Արցախ, այն ժամանակ կային երեխաներ, որոնք այսօր պատանիներ են, այսինք՝ նրանց աշխարհընկալումն արդեն ձևավորված է, նրանք հոգով իրենց գաղթական չեն զգում, նրանք իրենց լիարժեք քաղաքացիներ են զգում, քանի որ գիտակցում են, որ իրենց հողում են ապրում: Սա շատ հետաքրքրիր, բայց միաժամանակ անչափ կարևոր նրբություն է»: