«Ի՞նչպես են գողացել Դ. Դեմիրճյանի բրոնզե 300 կգ կիսանդրին, որ պանթեոնի պահակաները չեն նկատել»
«Այսօր այնքան են մեր բարոյական արժեքները խաթարվել, այնքան անտարբեր ենք դարձել թե շրջապատի նկատմամբ, թե միմյանց հանդեպ, որի արդյունքում նման սարսափելի դեպքեր են պատահում մեր քաղաքում` Քաղաքային պանթեոնից գողանում են Դերենիկ Դեմիրճյանի բրոնզե կիսանդրին»,-այսօր լրագրողների հետ հանդիպման ժամանակ ասաց Գրողների միության նախագահ Լևոն Անանյանը:
Լ. Անանյանը նշեց, որ վերջին շրջանում հաճախ են գերեզմանատներից մետաղյա պարիսպների և կիսանդրիների գողության դեպքեր գրանցվում: «Դա վկայում է, այն մասին, որ գողությունները անհատի գործ չէ, այն իրականացվում է «բանդայի» կաղմից, որը շատ հմտորեն է ծրագրում գերեզմանատներից բրոնզե իրերի գողությունը»,-հավելեց նա:
Դ. Դեմիրճյանի տուն-թանգարանի վարիչ Կարինե Ռաֆայելյանի խոսքով, Դեմիրճյանի կիսանդրին մոտ 300 կգ էր, «ի՞նչպես են գողացել, որ պանթեոնի պահակաները չեն նկատել»:
Այժմ Դ. Դեմիճյանի շիրմաքարը գտնվում է անմխիթար վիճակում և ուղղակի անհնար է դրան մոտենալը: «Նախ այն ամբողջությամբ պատված է փշերով և ընդհանարպես խնամված չէ: Սակայն կարծում եմ, որ Քաղաքային պանթեոնի աշխատակազմը պատասխանատվություն ունի հսկելու և խնամելու մեր մեծերի շիրմաքարերը: Ես զարմանում եմ, ինչպես է հնարավոր, որ այդքան ծանր բրոնզե կիսանդրին աննկատ պանթեոնից դուրս բերել: Ոստիկանության տվյալներով, գողությունը ամիսներ առաջ է կատարվել, պանթեոնի աշխատակիցները ինչպես չեն նկատել, որ այդ կիսանդրին չկա, թե՞ չեն ցանկանում նկատել»,- ասաց նա:
Կ. Ռաֆայելյանը նշեց, որ վերջին շրջանում մեր մեծերի շիրմաքարերից գողություններ շատ հաճախ է կատարվում: «Վերջին տարիներին Վաղարշ Վաղարշյանի տապանաքարի վրայից գողացել էին մետաղյա թիկնոցը, Երվանդ Քոչարի շիրմաքարից` մետաղյա տերևները, իսկ սեպտեմբերին` նաև Հրաչյա Աճառյանի շիրմաքարի վրա եղած մետաղյա հատվածը»,- հայտնեց Դ. Դեմիրճյանի տուն-թանգարանի վարիչը:
Նշենք, որ Ոստիկանության Երևան քաղաքի վարչության հերթապահ մասից հոկտեմբերի 7-ին Էրեբունու բաժնում հաղորդում է ստացվել, որ այս տարվա ապրիլից հոկտեմբերի 7-ն ընկած ժամանակահատվածում «Կենտրոնական գերեզմանատան» քաղաքային պանթեոնից գողացել են Դերենիկ Դեմիրճյանի շիրմաքարին տեղադրված կիսանդրին: Ոստիկանության լրատվական ծառայությունից տեղեկացնում են, որ կատարվում է նախաքննություն: