Ձեր վստահելի աղբյուրը

Հայ լրագրողների 5-րդ համաժողովը, որի աշխատանքները այսօր մեկնարկեցին Ստեփանակերտում, լուրջ անհանգստություն է առաջացրել Ադրբեջանում: Այս մասին համաժողովում ունեցած ելույթում հայտարարեց ՀՀ նախագահի աշխատակազմի «Հանրային կապերի և տեղեկատվության կենտրոն» ՊՈԱԿ-ի տնօրեն Արա Սաղաթելյանը` ավելացնելով, որ սա էլ ավելի է արժևորում համաժողովի գաղափարում ընկած` Հայաստանի, Արցախի և Սփյուռքի հայկական լրատվամիջոցների համախմբված և համակարգված համագործակցության կարևորությունը:

«Համախմբումը նաև կարևոր է հետևյալ կոնտեքստում` կկարողանա՞նք, արդյոք, միավորելով մեր ջանքերը, տեղեկատվական ու մի շարք այլ ռեսուրսները` միջազգային հանրությանն իրեն իսկ ընկալելի լեզվով , արտահայտչամիջոցներով ու եղանակներով ներկայացնենլ ու հասանելի դարձնել մեր տեսակետներն ու դիրքորոշումները, առավել ևս` փաստերն ու հանգամանքները»,- ասաց Ա.Սաղաթելյանը, իսկ այնուհետև անմիջապես ավելացրեց, թե` ճիշտ չէ ձևակերպել «կկարողանա՞նք», այլ պետք է համոզում լինի, որ «պարտավոր ենք կարողանալ»:
«Հայաստանը` որպես պետություն, իսկ հայությունը` որպես ազգային մեկ ամբողջություն, պետք է միավորեն իրենց տեղեկատվական, լրատվական ու քարոզչական հնարավորությունները` դիմակայելու հակամետ, հաճախ՝ բացասական, որոշակի քաղաքական ու հակաքարոզչական նպատակներով միջազգային տեղեկատվական հոսքերում շրջանառության մեջ դրվող գաղափարներին, մտակաղապարներին ու գնահատականներին,-նշեց Արա Սաղաթելյանը և հավելեց.- Միաժամանակ, ինչը շա՛տ ավելի կարևոր է, այսօր առավել քան հրատապ է միավորել`
ա) ջանքերն ու մտավոր, ստեղծագործական, գաղափարական ունակությունները,
բ) տեղեկատվական, ցանցային, ֆինանսական, կազմակերպչական ռեսուրսները,
գ) քաղաքական, համայնքային և անձնական կապերը»:

Ըստ ՀԿՏ կենտրոնի տնօրենի, սա թույլ կտա ոչ հայկական հասարակական ու քաղաքական շրջանակներում միջազգային տեղեկատվական ու քարոզչական հոսքերում ամրագրել մեր հետապնդած համազգային նպատակներին համահունչ գաղափարներ, պատկերացումներ, գնահատականներ, որոնք խարսխված են հիմնավոր փաստերի և փաստարկումների վրա:

«Մեզ միավորում են մեր լեզուն, մեր հավատը, մեր անկախ ու ինքնիշխան Հայրենիքի հարատևումը: Միավորում են նաև մեր ընդհանուր խնդիրները՝ Հայոց ցեղասպանության միջազգային ճանաչում, Արցախի հիմնախնդրի ամբողջական լուծում, հայապահպանություն, Հայաստանի՝ որպես համայն հայության հայրենիքի համընդհանուր զարգացման ապահովում»,-նշեց Ա. Սաղաթելյանը` հավելելով, թե այսքան միավորող գործոնների պարագայում մենք իսկապես կարող ենք ոչ միայն շատ դյուրությամբ համախմբվել, այլև միասնաբար ու արդյունավետ գործունեություն ծավալել տեղեկատվական ասպարեզում, անկախ մեզանից յուրաքանչյուրի քաղաքական կամ գաղափարական համոզմունքներից ու կողմնորոշումներից:

Ըստ բանախոսի, այս ու մի շարք ոչ պակաս կարևոր հարցերում առաջընթացի ու հաջողության հասնելու համար մեծ է լրատվության դերը` հատկապես սփյուռքյան, քանի որ հայտնի է, որ հակառակորդ Ադրբեջանն անընդհատ փորձեր է կատարում հայալեզու կայքեր ստեղծել ու սեփականը քարոզել:

Ա.Սաղաթելյանը հավաստիացրեց, որ այդ «պսևդոհայկական» կայքերի աշխատանքը հաջողվում է սահմանափակել, սակայն դրանք ոչ միայն հայալեզու կամ ռուսալեզու են, այլ նաև անգլալեզու, ֆրանսալեզու, գերմանալեզու և այլն:

«Զարգացման այս փուլում Հայաստանը, առանց համայնքային լրատվամիջոցների և այդ երկրներում քաղաքացիների ու դեսպանատների ակտիվ գործողությունների, չի կարող լուծել այդ հարցը մոտակա ժամանակներս»,- նշեց նա ու առաջարկեց համատեղ գործողությունների կոնտենտ մտածել, որի հիմքում դրված կլինի վերոհիշյալ խնդրի դեմ միասնական պայքարի մեխանիզմը:

Ինչ վերաբերում է հակահայկական մանիպուլյատիվ տեղեկատվությանը, ապա Ա.Սաղաթելյանը համաժողովի մասնակիցներին հիշեցրեց, որ արդեն մեկ տարի է, ինչ գործում է հատուկ կայքէջ, որում այն կուտակվում է և սփյուռքից ժամանած մասնակիցների մեծ մասը դրանից ոչ միայն տեղյակ է, այլև մասնակցում է այդ hot line-ի աշխատանքներին:

Բայց, ինչպես կարևորեց բանախոսը, դրանով պետք չէ սահմանափակվել և առաջարկեց արդեն առկա տեղեկատվական այդ հիմքի վրա մշակել ու կիրառել ֆորումային մոդել, որում կքննարկվեն հակահայկական մոտեցումներն ու դրանց հակազդելու մեթոդները: