ԼՂՀ ԱԺ նախագահ. «Մենք անցել ենք ինքնակազմակերպվածության այն փուլը, երբ կարիք ունեինք մեկս մյուսին ներկայացնել իրականությունը»
ԼՂՀ ԱԺ մամլո ծառայություն հաղորդմամբ՝ ԼՂՀ Ազգային ժողովում տեղի է ունեցել հանդիպում 5-րդ համահայկական համաժողովի մասնակիցների հետ:
ԱԺ մամլո ծառայություն հաղորդագրության մեջ մասնավորապես նշվում է.
«Հոկտեմբերի 14-ին ԼՂՀ Ազգային ժողովում տեղի է ունեցել հանդիպում լրատվամիջոցների և լրագրողների` այս օրերին Ստեփանակերտում անցկացվող 21-րդ դարի մարտահրավերները. տեղեկատվական անվտանգությունը և հայ լրատվությունը 5-րդ համահայկական համաժողովի մասնակիցների հետ:
Հանդիպմանը ներկա էին ԼՂՀ Ազգային ժողովի նախագահ Աշոտ Ղուլյանը, ՀՀ սփյուռքի նախարար Հրանուշ Հակոբյանը, ԼՂՀ ԱԺ փոխնախագահ Արթուր Թովմասյանը, ԱԺ պատգամավորական խմբակցությունների պատասխանատուներ և անդամներ:
Ողջունելով միջոցառման մասնակիցներին, ԱԺ նախագահն իր խոսքում կարևորեց այն իրողությունը, որ համաժողովն անցկացվում է Արցախի Հանրապետությունում, ինչպես նաև գոհունակություն հայտնեց այն նոր մակարդակի համար, որի շրջանակներում ներկայումս ծավալվում են համազգային օրակարգի քննարկումները:
Ընդգծելով տեղեկատվական ոլորտի կարևորությունը, նա նշեց. «Թերևս, շատ ավելի հրատապ է այն հարցը, թե ինչ կարող ենք մենք անել համատեղ ուժերով, որպեսզի տեղեկատվությամբ գերհագեցած աշխարհում մեր ձայնը լսելի լինի և, որ շատ ավելի ցանկալի է, ունենա ազդեցություն»:
Խորհրդարանի նախագահի համոզմամբ՝ հայ ժողովուրդը, իրոք, ունի այդ ներուժը, որպեսզի կարողանա արագորեն փոխվող աշխարհում ներկայանալ ազգային նպատակների մասին հայեցակարգային դիրքորոշումներով: Թեկուզ, ըստ նրա, «միշտ չէ, որ մեզ հաջողվում է ներքին համաձայնության գալ առաջնահերթությունների հարցում»: Իմ կարծիքով, ասաց նա, այստեղ շատ էական է նկատի ունենալ, որ կան հատկապես ազգային քննարկման հարցեր, բայց մեզնից և մեր ցանկություններից անկախ գոյություն ունի նաև, այսպես կոչված, միջազգային քաղաքականության օրակարգ և դրանից ածանցվող` տեղեկատվական միջամտության հայեցակարգեր ու մեխանիզմներ:
Ժամանակակից աշխարհը գոնե տեղեկատվական դրսևորումներում այնքան բաց է, որ մենք չենք կարող ոչինչ չտեսնելու տալ: Նշելով այդ մասին, Աժ նախագահը շեշտեց, որ հայկական տեղեկատվական դաշտը չի կարող առանձնացված լինել, դրսևորվել որպես բացառիկ ինքնուրույնություն: Միաժամանակ, սակայն, ասաց նա, մեր ճակատագիրն այնպես է տնօրինել, որ տեղեկատվական ցանկացած երևույթ մենք ընկալում ենք հստակ նպատակադրությամբ, թե ի՞նչ է հատկապես այն տալիս մեր ազգային խնդիրների սպասարկմանը:
Իր խոսքում խորհրդարանի նախագահը երախտագիտություն հայտնեց բոլոր նրանց, ովքեր Արցախյան պատերազմի և այսօրվա Արցախի մասին կարողանում են ճշմարտությունը փոխանցել միջազգային լսարանին, այդ թվում` Սփյուռքի մեր հայրենակիցներին: «Դա շատ գնահատելի առաքելություն է»,- ընդգծեց նա:
Կարծիք հայտնելով, թե մենք անցել ենք ինքնակազմակերպվածության այն փուլը, երբ կարիք ունեինք մեկս մյուսին ներկայացնել իրականությունը ու նշելով, որ խնդիրն այսօր տեղափոխվել է այլ հարթություն, նա հանդիպման մասնակիցների հետ կիսվեց նոր իրավիճակում նկատվող որոշ զարգացումների վերաբերյալ իր նկատառումների շուրջ:
ԱԺ նախագահն այնուհետև պատասխանեց լրագրողների հարցերին, որոնք հիմնականում վերաբերում էին ղարաբաղյան կարգավորման գործընթացին ու նրա զարգացումներին»:
Լրահոս
Տեսանյութեր
«Ձեր սիրելի Ալիևը «Նոլդու Փաշինյան» երգը միացրած Արցախով պտտվում է». Բագրատ Սրբազանը՝ իշխանությանը