Ձեր վստահելի աղբյուրը

Երևանում այսօր մեկնարկեց ֆինանսիստների և բանկիրների համահայկական առաջին համաժողովը, որին մասնակցում են չորս տասնյակից ավելի մասնագետներ Ուկրաինայից, Ռուսաստանից, Ֆրանսիայից, Մեծ Բրիտանիայից, Իսպանիայից, ԱՄՆ-ից, Լիբանանից և ԱՄԷ-ից։
Այն կազմակերպվել է ՀՀ սփյուռքի նախարարության, Կենտրոնական բանկի և Բանկերի միության նախաձեռնությամբ: Համաժողովի նպատակն է աշխարհասփյուռ հայ բանկիրների և ֆինանսիստների ներուժի համախմբումը, Հայաստան-սփյուռք համագործակցության արդյունավետության բարձրացման մեխանիզմների մշակումը, ֆինանսիստների և բանկիրների համահայկական ընկերակցության ստեղծումը և դրա հիման վրա մասնագիտական ցանցի ձևավորումը:

Ինչպես համաժողովի բացմանը նշեց ՀՀ սփյուռքի նախարար Հրանուշ Հակոբյանը, նման համաժողովները նպաստում են Հայաստանի և Սփյուռքի մասնագետների համագործակցությանը, հայրենիք-Սփյուռք կապերի ամրապնդմանն ու ուժեղացմանը: «Տարբեր երկրներում դուք ստացել եք անհրաժեշտ գիտելիքներ, ձեզանից յուրաքանչյուրը հեղինակություն է ձեր երկրում, և այդ կապերն ու հնարավորությունները պետք է օգտագործեք նաև մեր երկրի զարգացման համար»,- ասաց նախարարը: Ըստ նրա, հայերը աշխարհի տարբեր երկրներում դարեր շարունակ կարողացել են իրենց խոսքն ասել բանկային ոլորտում: Մասնավորապես, ցարական Ռուսաստանի, Թբիլիսիի, Բաքվի, Ուկրաինայի և այլ քաղաքների գլխավոր դերակատարները բանկային ոլորտում եղել են հայերը: Դեռևս 1668թ.-ին Լվովում ստեղծվել է Համահայկական բանկ, որը գոյատևել է 270 տարի: «Սա վկայում է այն մասին, որ գենետիկորեն այն փոխանցվում է, և բոլոր ժամանակներում հայ ֆինանսիստի գենը զարգանում և ուժեղանում է »,- նկատեց նախարարը:

Անդրադառնալով Հայաստանի բանկային համակարգին, Հ.Հակոբյանը նշեց, որ այն իրոք Հայաստանի անկախության լավագույն նվաճումներից մեկն է: «Մենք ունենք կայուն, զարգացած, գրագետ բանկային համակարգ և բանկիրներ: Հայաստանի բանկային կայուն համակարգի շնորհիվ է, որ այսօր կարողացանք խուսափել համաշխարհային ճգնաժամի պայմաններում սոցիալական ցնցումներից, և այսօր տնտեսական աճ ենք արձանագրել»,- ասաց Հ. Հակոբյանը:

ՀՀ ԿԲ-ի նախագահ Արթուր Ջավադյանի խոսքերով, այս համաժողովը կարևորագույն իրադարձություն է ֆինանսական կյանքում: Ըստ նրա, համաժողովի շրջանակներում պետք է փորձեն սկիզբ դնել ոլորտում համահայկական ցանցի ստեղծմանը: «Մեր գործընկերները պետք է ավելի լավ հասկանան այն իրավիճակը, որը տիրում է Հայաստանում, և պատկերացնեն, թե ինչ մասնակցություն կարող են ունենալ մեր հետագա ֆինանսական համակարգի զարգացման մեջ: Սփյուռքի շնորհիվ մենք այդպիսի փորձեր ժամանակին ունեցել ենք, մասնավորապես Հայաստանում ունենք HSBC, Յունիբանկ, Ռոսգոսստրախ, Տրոյկա դիալոգ և այլն: Կարծում եմ, որ այս համաժողովից հետո ճանաչված կազմակերպությունների թիվը Հայաստանում կավելանա»,- ընդգծեց Ա.Ջավադյանը:

ՀՀ Բանկերի միության նախագահ Արարատ Ղուկասյանի կարծիքով, համաժողովի ընթացքում նոր փոխհարաբերությունների սկիզբ կդրվի, փորձ կարվի ստեղծել համահայկական մի կառույց, որի մեջ կներառվեն Հայաստանում և արտերկրում գործող հայ բանկիրներն ու ֆինանսիստները: «Լավ աշխատանքի դեպքում սա լինելու է լավ հարթակ` փոխադարձ կապեր, հնարավորություններ ստեղծելու համար: Այն կօգնի փոխլրացնելու և Հայաստանի, և արտերկրի փորձը»,- նշեց Ա.Ղուկասյանը:

Հ. Հակոբյանն ընթերցեց ՀՀ նախագահի ուղերձը, համաժողովի մասնակիցներին փոխանցվեց նաև Ամենայն Հայոց Կաթողիկոս Գարեգին Բ-ի ուղերձը:

Նշենք, որ երկօրյա համաժողովի ընթացքում կհնչեն զեկույցներ «ՀՀ ֆինանսական համակարգի զարգացումները, մարտահրավերներ և ձեռքբերումներ», «Հայաստանի բանկային համակարգը որպես back-office ծառայություններ մատուցող, սահմանափակումներն ու հնարավորությունները», «Ֆինանսական կրթության խնդիրները Հայաստանում», « Սփյուռքի մասնագիտական ներուժը ՀՀ ֆինանսական ինստիտուտների կառավարման գործընթացներում» թեմաներով: