Թեհրանում ադրբեջանցիներին նյարդայնացրած լրագրողները այսօր դժգոհեցին հայկական ԶԼՄ-ների աշխատանքից
Թեհրանում մամուլի և տեղեկատվական գործակալությունների միջազգային ցուցահանդես-փառատոնում Հայաստանը ներկայացնող «Ազգ» թերթի ու Panarmenian.net գործակալության լրագրողները նախատեսված ժամկետից մի քանի օր առաջ են լքել Իրանը: Այսօրվա ասուլիսում Հասմիկ Հարությունյանն /«Ազգ»/ ու Եկատերինա Պողոսյանը /Panarmenian.net/ հայտնեցին, որ հայտնի միջադեպից հետո, երբ ադրբեջանցիները աղմուկ էին բարձրացրել հայկական տաղավարի հետ կապված, որից հետո հայ թղթակիցները հանդես էին եկել հայտարարությամբ ու բոյկոտել ցուցահանդեսը , իրանական կողմը նրանց խնդրել է վերադառնալ ու մասնակցել ցուցահանդեսին, սակայն հայ լրագրողները մերժել են:
Դրանից հետո ցուցահանդեսի կազմակերպիչները հայտարարել են, որ այլևս մտադիր չեն վճարել Իրանում հայ լրագրողների կեցության համար և նախազգուշացրել են, որ նրանք պետք է ազատեն հյուրանոցը: Իրանում Հայաստանի դեսպան Գրիգոր Առաքելյանի աջակցության շնորհիվ, հայ լրագրողները Երևան են վերադարձել հոկտեմբերի 30-ի գիշերը` նախատեսված ժամկետից մի քանի օր շուտ:
Հ. Հարությունյանն ասաց, որ հայկական պատվիրակությունը ստացել է ցուցահանդեսին մասնակցող գրեթե բոլոր պատվիրակությունների, ինչպես նաև Իրանի հայ համայնքի աջակցությունը, բայց ոչ` հայկական ԶԼՄ-ների: Ե. Պողոսյանը հայկական ԶԼՄ-ի արձագանքը ուշացած համարեց:
«Ես ցավում եմ նաև, որ շատ հայկական լրատվական գործակալություններ տեղեկատվությունը վերցրել են ադրբեջանական ԱՊԱ լրատվական գործակալությունից, որտեղ լրատվության հեղինակը հենց միջադեպի մեղավորն էր»,- ասաց Հ. Հարությունյանը:
«Ցավոք, ադրբեջանական կողմը, ի տարբերություն մեզ, թիմային աշխատանք է կատարում, և մենք պարտություն ենք կրում տեղեկատվական պատերազմում, քանի որ յուրաքանչյուրը մտածում է իր սեփական, այլ ոչ թե մեր երկրի շահերի մասին»,- ընդգծեց ասուլիսին մասնակցող PanARMENIAN.Net լրատվական գործակալության գլխավոր խմբագիր Մարինա Անանիկյանը:
Հիշեցնենք, որ հոկտեմբերի 25-ից նոյեմբերի 1-ը Թեհրանում կայացավ մամուլի և տեղեկատվական գործակալությունների 17-րդ միջազգային ցուցահանդես-փառատոնը:
Ցուցահանդեսում, Հայաստանը, ինչպես նաև այլ մասնակից երկրներ, ներկայացված է առանձին տաղավարով, որտեղ վահանակի վրա տեղադրվել էր Արցախի խորհրդանիշ «Մենք ենք` մեր սարերը» հուշարձանի լուսանկարը՝ որպես հայկական գեղատեսիլ վայրերից մեկը: Հայկական կողմի նման նախաձեռնությունն ակնհայտորեն ադրբեջանական պատվիրակության սրտով չի եղել: Այն ժամանակ, երբ թղթակիցները պատրաստել են հայկական տաղավարի բացումը, ադրբեջանական խումբը հետևել է նրանց աշխատանքին: Այն բանից հետո, երբ վահանակին ամրացվել է Հայաստանի և ԼՂՀ-ի պետական քարտեզը, ադրբեջանցիները գազազել են: Սկզբից նրանք իրանական կողմից պահանջել են հանել քարտեզը և հայկական հուշարձանի լուսանկարը, բայց, չսպասելով կազմակերպիչների կողմից ինչ-որ որոշում ընդունելուն, ադրբեջանական պատվիրակության ներկայացուցիչը ներխուժել է հայկական տաղավար, պոկել Հայաստանի քարտեզը և փորձել պատռել այն:
Հոկտեմբերի 26-ի առավոտյան PanARMENIAN.Net գործակալության և «Ազգ» օրաթերթի թղթակիցները, մոտենալով հայկական տաղավարին, հայտնաբերել են, որ «Մենք ենք` մեր սարերը» խորհրդանիշ-հուշարձանի լուսանկարը նույնպես հեռացվել է վահանակից: Հաջորդ օրերի ընթացքում ցուցահանդես-փառատոնի կազմակերպիչները որևէ քայլեր չձեռնարկեցին, որպեսզի լուսանկարը վահանակին վերադարձնեն:
Հոկտեմբերի 28-ի առավոտյան PanARMENIAN.Net գործակալության և «Ազգ» օրաթերթի թղթակիցները որոշում ընդունեցին ցուցահանդեսը բոյկոտելու մասին: «Քանի որ իրանական կողմը չկատարեց իր խոստումը և «Մենք ենք` մեր սարերը» խորհրդանիշ-հուշարձանի լուսանկարը չվերադարձրեց վահանակին, դրա փոխարեն փակցնելով Երևանի Հանրապետության Հրապարակի երգող շատրվանների լուսանկարը, մենք սկսում ենք ցուցահանդեսի բոյկոտը: Հայաստանի պատվիրակությունը հայտարարության տեքստը կտարածի ֆորումի բոլոր մասնակիցների միջև»,- ասել է Եկատերինա Պողոսյանը:
Լրահոս
Տեսանյութեր
«Ձեր սիրելի Ալիևը «Նոլդու Փաշինյան» երգը միացրած Արցախով պտտվում է». Բագրատ Սրբազանը՝ իշխանությանը