ՏՄՊՊՀ-ն կուսումնասիրի պանրի գնի բարձրացման պատճառները
ՀՀ ՏՄՊՊՀ-ն այսօր գումարված նիստում անդրադարձավ պանրի շուկայում ստեղծված իրավիճակին:
Հանձնաժողովի անդամ Արման Մանասերյանի խոսքով, պանրի գների բարձրացման մասին մամուլի հրապարակումներից և հանձնաժողովի պարբերական մոնիթորինգի արձանագրած գների աճից անմիջապես հետո` հոկտեմբերի 22-ին, հանձնաժողով էին հրավիրվել պանրի արտադրությամբ զբաղվող մի շարք տնտեսվարող սուբյեկտների ներկայացուցիչներ: Նրանք պարզաբանել էին, որ պանրի թանկացումը պայմանավորված չէ մրցակցությանն առնչվող խնդիրներով, այլ հետևանք է մթերվող կաթի գնի բարձրացման:
«Այս շուկան խիստ ցածր կենտրոնացվածություն ունի, չկան խոշոր տնտեսվարող սուբյեկտներ: Ըստ ՊԵԿ-ի տվյալների, շուկայում գործում է 78 գրանցված սուբյեկտ` չհաշված պանիր արտադրող բազմաթիվ գյուղացիական տնտեսությունները: Սակայն հաշվի առնելով, որ պանրի գնի բարձրացումը մեծ սոցիալական արձագանք է ստացել, և մամուլում թանկացման վերաբերյալ տարբեր վարկածներ են առաջ քաշվում, հանձնաժողովը որոշեց սեփական ուսումնասիրությունն իրականացնել` պանրի գնի բարձրացման պատճառները բացահայտելու նպատակով»,- նշեց Արման Մանասերյանը:
ՏՄՊՊՀ նախագահ Արտակ Շաբոյանը հարցը դրեց քվեարկության և միաձայն որոշում կայացվեց պանրի արտադրության ոլորտում գործող տնտեսվարող սուբյետներին տալ 3 օրյա ժամկետ` 2009 թվականի հուլիսի 1-ից մինչև դեկտեմբերի 31-ը և 2010 թվականի հունվարի 1-ից մինչև հոկտեմբերի 31-ն ընկած ժամանակապատվածում իրենց գործունեության և գնային փոփոխությունների վերաբերյալ համապատասխան տեղեկատվություն ներկայացնելու համար:
«Անհրաժեշտության դեպքում ստուգումներ կանցկացվեն անգամ պանիր արտանդրող ընկերություններում` գների բարձրացման իրական պատճառները գնահատելու համար: Ուսումնասիրության ավարտին արդյունքները կներկայացվեն հանրությանը»,- տեղեկացրեց Արտակ Շաբոյանը: