Հոգևոր առաջնորդների հատուկ խումբ է ստեղծվել, որը արագ կարձագանքի կոնֆլիկտային իրավիճակներին
Նոյեմբերի 1-4-ը Ժնեւում, ԵՀԽ կենտրոնական գրասենյակում, տեղի է ունեցել «Քրիստոնյաներն ու իսլամականները համընդհանուր ապագայի համար» թեմայով գումարված միջազգային կոնֆերանսը: Կոնֆերանսը որոշել է ստեղծել հոգևոր առաջնորդների հատուկ խումբ, որը արագ կարձագանքի կոնֆլիկտային իրավիճակներին:
Այս մասին տեղեկացնում են Մայր Աթոռ սբ. Էջմիածնի մամլո դիվանից:
Կոնֆերանսի մասնակիցները` աշխարհի տարբեր երկրների 65 ներկայացուցիչներ, հանդես են եկել նաև հայտարարությամբ, որում մասնավորապես ասվում է. «Հաճախ կոնֆլիկտներ ստեղծելիս կրոնին են հղում կատարում, նույնիսկ երբ դրանց իսկական պատճառներն այլ են, ինչպիսիք միջոցների անարդար բաշխումը, ճնշումները, բռնարարքներն ու անարդարությունները»:
Համագումարին Հայ Առաքելական Եկեղեցուց մասնակցել են Մայր Աթոռ Սուրբ Էջմիածնից ԵՀԽ Կենտրոնական կոմիտեի գործադիր վարչությունում Ամենայն Հայոց Կաթողիկոսի ներկայացուցիչ Տ. Վիգեն արք. Այքազյանը և Մեծի Տանն Կիլիկիո կաթողիկոսությունից` Տ. Սեպուհ արք. Սարգիսյանը: