Ձեր վստահելի աղբյուրը

Հարցազրույց Իրանահայեր Լրատու Ցանցի ղեկավար և խմբագիր Ռուբիկ Մինասեանի հետ

Իրանահայեր Լրատու Ցանցը բոլորեց իր գործունէության երկու տարին: Ի՞նչն էր «Իրանահայեր» կայքէջի ստեղծման շարժառիթը և որո՞նք էին նրա կայացման նախադրյալները:
Դեռևս երկու տարի առաջ իրանահայ համայնքը չուներ օնլայն լրատվամիջոց` սեփական հայացքների արտահայտման և տեսակետների փոխանակման համար: Իսկ համայնքի պահանջներին, ինչպես և ողջ աշխարհում, համապատասխանում էր տեղեկատվության հենց այս տարբերակը: Հենց այդպես էլ կայացավ կայքէջ ստեղծելու գաղափարն ու դրան հաջորդող որոշումը` 2008 թվականի օգոստոսի 28-ին: Այն ի սկզբանե ջերմ ընդունելություն գտավ իրանահայ համայնքի մոտ և մեծ հետաքրքրություն առաջացնելով ` արժանացավ նրա հավանությանը:

Իսկ ինչպե՞ս առաջացավ կայքի պարսկերեն տարբերակի գաղափարը, և ո՞րն էր դրա իմաստը, եթե տեղեկատվությունը նախատեսված է հենց իրանահայության համար:
Սկզբում կայքի լրատվությունը հիրավի մտադրված էինք մատուցել հայերենով, քանի որ ընթերցողը համայնքի ներկայացուցիչներն էին: Բայց ընթացքում ակնհայտ դարձավ այն փաստը, որ թե’ համայնքի լուրերը, թե’ հայաստանյան լուրերը և մեկնաբանությունները պարսկերենով լուսաբանող որևէ այլ կայքէջ չկա, ոչ միայն համայնքի, այլև հենց իրանցիների համար: Շատ ավելի նպատակահարմար էր նրանց ապահովելՀայաստանի և առհասարակ հայության վերաբերյալ հավաստի լուրերով, քան հանդուրժել ադրբեջանական ու թուրքական խեղաթյուրված տեղեկատվության հոսքը Իրան և դրա հասկանալի ազդեցությունը: Հատկապես, եթե հաշվի առնենք այն , որ Իրանում բնակվում է ավելի քան 20 000 000 թրքախոս պարսիկ, նրանց ապատեղեկացված լինելն առավել քան անցանկալի էր: Հատկանշական է, որ կայքի պարսկերեն տարբերակի գործունեության շնորհիվ, մեզ հաջողվել է հակակշռել թուրքական և ադրբեջանական կեղծ տեղեկատվությանը, քանի որ պարսկալեզու հանրությանը առաջարկում ենք մեր սեփական տեսակետները Հայ Դատի, Արցախի և հայանպաստ այլ հարցերի վերաբերյալ:

Կայքում արծարծված հարցերից որո՞նք են համայնքում առավել մեծ արձագանքներ գտնում, առավել լայն քննարկումների տեղիք տալիս :
Բնականաբար գերակշռում են ներհամայնքային հարցերի քննարկումները, հաճախ նաև բուռն տեսակետների արտահայտման տեղիք տալիս, որպես օրինակ կարելի է նշել համայնքում կալվածների վաճառքը կամ դպրոցների փակելն ու մեկտեղելը Ազգային իշխանության կողմից, թեև Հայաստանին վերաբերվող լուրերն ու մեկնաբանությունները ևս դուրս չեն մնում կայքի այցելուների հետաքրքրության շրջանակներից:

Իսկ ինչպիսի՞ն է կայքի կառույցների գործելակերպի համակարգը, այն գործում է հենց համայնքու՞մ, թե՞ կառավարվում է Հայաստանից:
Այդ կառույցները խիստ փոխկապակցված են, և նրանց գործունեությունը նպատակաուղղված է կայքի սահուն աշխատունակությանը: Այսինքն կան անհատներ, որոնք Իրանից համապատասխան ինֆորմացիայով են ապահովում կայքէջի հայաստանյան ներկայացուչությանը, ապահովելով տեղեկատվության կազմելու և մատուցելու գործընթացը:

Ի՞նչ բարդությունների հետ է առնչվում կայքէջը, և ինչ դժվարություններ են առաջացնում այլազան խնդիրները:
Եթե հաշվի առնենք համացանցային մշտական բարեփոխումների և նորամուծությունների պարագան, ապա «Իրանահայեր» կայքեջը մշտապես թարմացվում և վերահսկվում է: Ինչպես մամուլի այլ ներկայացուցիչների մոտ, մեր կայքէջում ևս չեն բացառվում ֆինանսական խնդիրները:

Համագործակցու՞մ եք արդյոք իրանահայ մամուլի այլ ներկայացուցիչների հետ, և ի՞նչ հարթակների վրա են դրված հարաբերությունները նրանց և ձեր միջև:
Խմբագրությունը մշտական կապի մեջ է իրանահայ մամուլի տպագիր լրատվամիջոցների`ամսագրերի և շաբաթաթերթերի հետ, ինչպես նաև պարբերաբար մասնակցում է իրանահայ մամուլի խորհրդաժողովի հանդիպումներին, որտեղ իրականացվում է տեսակետների և փորձի փոխանակում:

Իսկ ինչպիսի՞ն է հայաստանյան մամուլի ներկայացուցիչների հետ համագործակցության նկարագիրը, կա՞ն ակնկալիքներ ու դժգոհություններ:
Հայաստանյան մամուլի ներկայացուցիչների հետ ևս համագործակցում ենք `գտնվելով հնարավորինս սերտ կապի մեջ: Սակայն ցանկալի կլիներ, որ Հայաստանեան մեր գործընկերները Իրանին կամ իրանահայությանն առընչվող լուրերը լուսաբանելուց առաջ ճշտեին դրանց իսկությունն ու հավաստիությունը, ինչու՞ չէ մեր հետ խորհրդակցելու միջոցով, հատկապես , որ մշտապես տեղեկացված ենք Իրանի հասարակական ու քաղաքական անցուդարձին, կապի մեջ ենք պարսկատառ մամուլի հետ և ամենօրյա մոնիտորինգի ենք ենթարկում այն:

Այս հարցն անհանգստացնում է մեզ այն առումով, որ համայնքը խիստ զգայուն է հայաստանյան սխալ մեկնաբանությունների հանդեպ, և մեր թշնամիները առիթ բաց չեն թողնում համայնքը վատ իրավիճակի մեջ դնելու առումով, որպես օրինակ կարելի է հիշել մոտ անցեալում Իրանում կայացած լրատվամիջոցների ցուցահանդեսի անցանկալի ավարտը Հայաստանյան ներկայացուցիչների համար, կամ բազմաթիվ սխալ մեկնաբանություններ և լուրերի թարգմանությունները, որոնք առաջին հերթին հարվածի տակ են դնում համայնքը` առիթ տալով հակառակորդին կենտրոնանալով, մատնացույց անելով մեր սխալները: Բնականաբար, ավելորդ չի լինի դիմել այդ ոլորտում առավել տեղեկացված, համայնքի նիստ ու կացին քաջատեղյակ մեր խմբագրությանը: Ի վերջո, Երևանում ունենք գործող գրասենյակ, ինչն էլ ավելի հարմար պայմաններ է ստեղծում համագործակցության համար: