Ձեր վստահելի աղբյուրը

Այսօր Երևանում մեկնարկել է «Հայաստանի արտահանման խթանման խնդիրները» թեմայով կոնֆերանս, որը կազմակերպվել է ՀՀ էկոնոմիկայի նախարարության և Համաշխարհային Բանկի հայաստանյան գրասենյակի համատեղ նախաձեռնությամբ` Տնտեսական զարգացման և հետազոտությունների կենտրոնի (EDRC) կողմից:

Կոնֆերանսը նախագահում էին ՀՀ էկոնոմիկայի նախարար Ներսես Երիցյանը, Հայաստանի ամերիկյան համալսարանի նախագահ Բրյուս Բողոսյանը, Հայաստանում ԵՄ պատվիրակության ղեկավար Ռաուլ դե Լուցենբերգերը:

Ինչպես նշեց Ն.Երիցյանը, այն ինչ ստեղծելու են Հայաստանում ապրանքների, ծառայությունների ոլորտում, պետք է լինի արտահանելի և մրցունակ միջազգային շուկաներում:

«Այսինքն` նոր աճի մոդելի էությունը կայանում է արտահանելիության ավելացման մեջ»,- նշեց նախարարը:

Նրա խոսքերով, համաշխարհային ֆինանսատնտեսական ճգնաժամը ցայտուն դարձրեց, որ տնտեսության կառուցվածքային հիմնախնդիրներն առանց լուծելու հնարավոր չէ ապահովել երկարաժամկետ կայուն, տևական և բարձր աճի տեմպեր:

Մինչդեռ փորձը ցույց է տալիս, ավելի մեծ արտահանում ունեցող երկրները շատ ավելի լավ դիմակայեցին ճգնաժամին:

«Մեզ համար դա նշանակում է բարձրացնել մեր երկրի գլոբալ մրցունակությունը, արտաքին շուկաներում վաճառելի ապրանքներ արտահանելու և վաճառելու կարողություններն ու ունակությունները: Մենք պետք է կարողանանք վերափոխվել և աստիճանաբար ձեռք բերել զարգացած երկրներին հատուկ տնտեսական վարքագիծ», -ասաց Ն.Երիցյանը` հավելելով, որ միայն այդ պարագայում հնարավոր կլինի այդ շուկաներում ապրանքներ վաճառել:

Ըստ նախարարի, Հայաստանի արդյունաբերական քաղաքականությունն ուղղորդվելու է հետևյալ կերպ` տնտեսության դիվերսիֆիկացիայի և դրա արդյունքում արտահանելի հատվածների բացահայտման ու դրա աճի նպաստումով: Իսկ դրա համար, Ն.Երիցյանի խոսքերով, պետք է վստահ լինել, որ գործարար միջավայրն ու ներդրումային միջավայրը բավարար է այդ գաղափարախոսությունը իրականացնելու համար: <Մենք պետք է կարողանանաք արտահանման կարողություններ ունեցող ձեռնարկություններին բացահայտել, նպաստել դրանց զարգացմանը , և դրան զուգահեռ պիտի կարողանանք նպաստել միջազգային ընկերությունների մուտքը Հայաստան, որը թույլ կտա ապահովել տեխնոլոգիաների և գիտելիքի փոխանցումը դեպի մեր երկիր>,- նկատեց Ն.Երիցյանը: Նրա գնահատմամբ, Հայաստանի շուկան շատ փոքր է և միայն այստեղի շուկայի համար արտադրելն ապագա չի կարող ունենալ, մինչդեռ արտասահմանյան շուկաները Հայաստանի համար անսահմանափակ պահանջարկի հնարավորություն են ստեղծում:

Նա միաժամանակ նշեց, որ ՀՀ արդյունաբերական նոր քաղաքականությունը վերջնական տեսքի է բերվում և շուտով պաշտոնապես կդրվի շրջանառության մեջ:

Կոնֆերանսի հիմնական նպատակն է արտահանման խթանման նպատակով երկխոսության ծավալման, մտքերի, նախաձեռնությունների և փորձի փոխանակման հարթակ ծառայելը: Կոնֆերանսին քննարկվելիք առանցքային հարցերը հիմնականում ուղղված են լինելու Հայաստանի աճի մոդելի հավասարակշռումը դեպի տնտեսության արտահանելի հատվածը և Հայաստանից արտահանման համեմատական առավելությունների և/կամ հիմնական սահմանափակումների բացահայտմանը:

Կոնֆերանսին մասնակցում են ոլորտի պատասխանատու պետական պաշտոնյաներ և քաղաքականություն մշակողներ, տարբեր միջազգային կազմակերպությունների ներկայացուցիչներ, գործարարներ, գիտնականներ և հետազոտական կազմակերտությունների ներկայացուցիչներ, որոնք բացառիկ հնարավորություն կստանան իրենց ներդրումն ունենալու Հայաստանում արտահանման դիվերսիֆիկացման և խթանման տեսլականի ձևավորմանը: