«Ժառանգություն». Ադրբեջանը պետք է պատասխանատվության կանչվի նաև Ջուղայի համար
2005թ-ի դեկտեմբերի 15-ին Ադրբեջանի կողմից` զինվորական ստորաբաժանումների ձեռքով, իրագործվեց հայկական պատմական բնօրաններից մեկի` Նախիջևանի Հին Ջուղայի գերեզմանոցի շուրջ 5000 խաչքարերի բազմափուլ փոշիացումը: Այս տարելիցին նվիրված «Ժառանգություն» կուսակցությունը հաղորդագրություն է տարածել, որում հիշեցնում է, որ մինչ օրս այդ պետական մակարդակով իրականացված ահաբեկչությունը չի պատժվել:
«Թալիբանավայել այս ոճրագործությունը պատահական բարբարոսություն չէր, այլ պետականորեն հովանավորված մշակութային ահաբեկչություն` ցեղասպանություն և վանդալիզմ: Հայկական հինավուրց քաղաքակրթության հանդեպ իրագործված այդ հակամարդկային արշավի վերջին արարն ակնհայտորեն նպատակ էր հետապնդում ջնջել Նախիջևանի հայկական պատկանելության հետքերը»,- նշված է հաղորդագրության տեքստում:
Հիշեցման կարգով բերվում է նաև այն, որ դեռևս 2005թ. դեկտեմբերի 14-ին Ադրբեջանի գիտությունների ակադեմիայի 60-ամյակի առթիվ երկրի նախագահն իր գիտնականներին և գիտական հաստատություններին կոչ արեց միջազգային հանրությանն «ապացուցել» Լեռնային Ղարաբաղի տարածքի նկատմամբ արցախահայության պատմական իրավունքների բացակայությունը և հիմնավորել իր այն թեզը, թե «հայերը, լինելով հյուրեր ու Ղարաբաղում հայտնվելով 19-րդ դարի 70-ականներին, Լեռնային
Ղարաբաղի տարածքի նկատմամբ պատմական իրավունքներ չունեն»: Եվ եթե Ադրբեջանի նախագահի կողմից առատաձեռն սուբսիդավորված խոշորամասշտաբ քարոզչական ծրագրերին լծված «գիտնականները» Արցախի պարագայում հարկադրված էին բավարարվել սոսկ օտար լեզվով պատմության կեղծարարությամբ, քանի որ արցախահայությունը Լեռնային Ղարաբաղից կտրել էր եղերածին ադրբեջանական պետության ոտքը, ապա Նախիջևանում պահպանված հայկական մշակութային ժառանգությունը ապտակ էր ալիևյան կեղծ պատմագրությանը և առ ոչինչ էր դարձնում ծախսվելիք միլիոնավոր նավթադոլարները. « Այնպես որ այդ ստոր նպատակի համար գործի դրվեց ագրեսոր պետության բանակն ու մեկ առ մեկ սպանվեցին խաչքարերը` գերեզմանոցի տեղում հիմնելով ռազմական պոլիգոն»:
«Իր այդ արարքով Ադրբեջանի ղեկավարությունը վերահաստատեց, որ այդ պետությունը շարունակում է իրենից վտանգ ներկայացնել ոչ միայն հայերի, այլև քաղաքակրթության համար, որ իրենց համար «անցանկալի անձ» (persona non grata) են ոչ միայն հայերը և առաջին հերթին` արցախահայությունը, այլև նրանց գերեզմաններն ու պատմությունն ընդհանրապես»,- կարդում ենք հաղորդագրությունում:
Նշվում է նաև, որ 2007 թ-ից ի վեր, ինչ երբ «Ժառանգությունը» խորհրդարանում է, խմբակցության պատգամավորների կողմից բազմիցս է բարձրաձայնվել Հին Ջուղայում կատարված հանցագործության մասին ԵԽԽՎ, ԵԱՀԿ, ՆԱՏՕ-ի խորհրդարանական վեհաժողովների ու միջազգային այլ կառույցների ամբիոններից, ինչպես նաև ԵԽ Մարդու իրավունքների հանձնակատարի առջև` պնդելով տարածաշրջան միջազգային համապատասխան փաստահավաք խմբի գործուղման անհրաժեշտության մասին:
«Եթե դա լիներ սեմիտական կամ հարանվանական այլ գերեզմանոց, աշխարհն իրավացիորեն կվրդովվեր, և հարցը կդրվեր ցանկացած ֆորումի ու վեհաժողովի օրակարգում: Սակայն պետական այդ ահաբեկչությունը ոչ միայն քննարկման առարկա չդարձավ միջազգային կառույցներում ու չդատապարտվեց, այլև հանդուրժվեց ու անտեսվեց այն, որ 2007թ.-ից ի վեր Ադրբեջանը խափանում և արգելում է ԵԽԽՎ-ի և անգամ UNESCO-ի կողմից նշանակված զեկուցողի մուտքը Նախիջևան:
Ադրբեջան պետությունն ու նրա ղեկավարությունը պետք է պատասխանատվության կանչվեն ոչ միայն ադրբեջանահայության ու արցախահայության հանդեպ իրականացրած ցեղասպանության, այլ նաև այս մի ամբողջ քաղաքակրթության ցեղասպանության համար, իսկ Հայաստանի իշխանություններն ու պատկան մարմինները պետք է հասնեն միջազգային արդարադատության և միջազգային օրենքի համահավասար կիրառության, ի թիվս այլոց նաև հանուն հայկական մշակութային ժառանգության պաշտպանության»:
Լրահոս
Տեսանյութեր
«Ձեր սիրելի Ալիևը «Նոլդու Փաշինյան» երգը միացրած Արցախով պտտվում է». Բագրատ Սրբազանը՝ իշխանությանը
