Ձեր վստահելի աղբյուրը

«Անցնող 2010 թվականն Արցախի համար կարելի է բնութագրել որպես բավականին ակտիվ՝ և՛ ներքին, և՛ արտաքին կյանքի տեսանկյունից: Նախևառաջ նշեմ, որ Ղարաբաղի համար ներքին կյանքը շատ կարևոր է, որովհետև անկախ բոլոր անցուդարձներից, որքան հզոր լինի Լեռնային Ղարաբաղի Հանրապետությունը ներսից՝ տնտեսություն, քաղաքացիների բարեկեցություն, այնքան հզոր են լինելու մեր դիրքերը բանակցային գործընթացում: Կարելի է ասել, որ 2010 թվականին մենք հենց այս կարգախոսով ենք առաջնորդվել»,- ամփոփելով անցնող տարին՝ Panorama.am-ի հետ զրույցում նշեց ԼՂՀ նախագահի հասարակայնության հետ կապերի գլխավոր վարչության պետ Դավիթ Բաբայանը:

Անդրադառալով Արցախում կայացած կարևոր քաղաքական իրադարձությունենրին՝ Դ. Բաբայանը մատնանշեց Արցախում կայացած խորհրդարանական ընտրությունները, ինչի լավագույն գնահատականը, ըստ նրա՝ տվեցին արտասահմանցի դիտորդները:

Նրա խոսքերով՝ տնտեսության ոլորտում իրականացվել են մի շարք կարևոր նախագծեր՝ մի շարք հիդրոկայաններ են կառուցվել, մնացածի կառուցումը ընթացքի մեջ է:

«Իսկ դրանց նշանակությունը շատ մեծ է: Արցախում էլեկտրաէներգիայի սպառումը մոտավորապես կազմում է 200 մլն կվտ/ժամ, ընդ որում՝ մոտ 130 միլիոնն արտադրվում է տեղում, իսկ մնացած մասը ներմուծում ենք Հայաստանից: Այս հիդրոկայանների շինարարությունը հնարավորություն կտա էլեկտրոէներգիայի արտադրությունը մոտակա տարիներին մոտ 700 մլն կվտ/ժամ, այսինքն՝ Արցախը էլեկտրաէներգիայի առումով լիովին ինքնաբավ կդառնա: Եվ սա միայն Մարտակերտի շրջանում: Մեծ հնարավորություններ կան ստեղծված Քաշաթաղում»,- ասաց Դ. Բաբայանը:

Նա շատ կարևորեց Արցախում կառուցվող Օդանավակայանի հարցը, ինչի հիմնական աշխատանքներն ավարտական փուլում են և որոշ տեխնիկական խնդիրներ են մնացել:

«Մի շարք քայլեր են իրականացվել անասնապահության և գյուղատնտեսության ոլորտներում: Արդեն լիարժեք գործում է տոհմային կայանը: Մի բան, ինչից զրկվել էինք պատերազմից հետո: Այդ տոհմային կայաններից մեկը հիմնադրվել է Քարվաճառում, որտեղ և՛ ալպիական արոտավայրեր կան, և՛ իրացման ներուժ:

Այս տարի ջրամատակարարման ոլորտում մեծ ծրագրեր են իրականացվել, ինչը շատ կարևոր էր: Նախօրեին շահագործման է հանձնվել Ստեփանակերտի ջրամատակարարման 8-րդ գոտին, ինչի արդյունքում, Ստեփանակերտ քաղաքում մոտ 10.000 մարդ կունենա մշտական ջուր: Ճիշտ է սա բավարար չէ 60.000-անոց քաղաքի համար, սակայն հետագայում այս հարցը ևս իր լուծումը կստանա: Այս տեսանկյունից շատ կարևորում են 2010 թվականի հեռուստամարաթոնը, որը նվիրված էր ռազմավարական կարևորագույն նշանակություն ունեցող հարցի՝ ջրին: Եվ այստեղ, համայն հայությունը՝ Սփյուռքում, Հայաստանում և Արցախում բավականին մեծ ակտիվություն ցուցաբերեց»,- ասաց ԼՂՀ նախագահի հասարակայնության հետ կապերի գլխավոր վարչության պետը:

Նրա խոսքերով՝ արտաքին դաշտում հիմնականում տեղի ունեցան այնպիսի իրադարձություններ, ինչը մեր կողմից կանխատեսելի էր: «Իհարկե եղան որոշ զգացմունքային ելույթներ մի շարք մեկնաբանների, վերլուծաբանների կողմից: Նրանցից ոմանք շատ դեպքերում ինչ-որ շուտափույթ զարգացումներ էին ակնկալում, սակայն մենք միշտ էլ այն մոտեցումն ենք ունեցել, որ այս պահին դեռևս չեն ստեղծվել այնպիսի հիմքեր, որպեսզի խնդիրը շուտափույթ լուծում ստանա և ամեն ինչ ընթանում է այնպես, ինչպես որ պետք է ընթանար»,- ասաց Դ. Բաբայանը:

Նրա խոսքերով՝ շատ կարևոր էր այն հանգամանքը, որ հայկական դիվանագիտությանը հաջողվեց պատվով դուրս գալ Թուրքիայի հետ հարաբերություններ հաստատելու գործընթացից, ընդ որում՝ հաղթող դուրս գալ:

«Հայաստանը թույլ չտվեց, որ Արցախի հարցը շաղկապվի հայ-թուրքական հարաբերությունների հետ և, ընդհանուր առմամբ, կայունությունը պահպանվեց: Շփման գծում որոշ միջադեպեր գրանցվեցին, ցավալի զոհեր եղան, սակայն դա ընդհանուր կայունության վրա ազդեցություն չունեցավ:

Էականն այն է, որ Ադրբեջանը հասկացավ, որ ցանկացած սադրանք համապատասխան հետևանքների բերելու՝ իր համար առավել ջախջախիչ:

Արցախի նախագահը նույեմբեր ամսին մի շարք հետաքրքիր հանդիպումներ ունեցավ ԱՄՆ-ում: Կկարևորեի Լոս Անջելոսի քաղաքապետի հետ հանդիպումը, քանի որ վերջինս մեծ քաղաքական կշիռ ունեցող գործիչ է և պատահական չէ, որ մեծ թվով վերլուծաբանների կարծիքով, հաջորդ նախագահական ընտրություններում ներկայիս նախագահ Օբաման նրա հետ է գնալու ընտրությունների, քանի որ վերջինս որպես ապագա փոխնախագահ է դիտվում»,- ասաց ԼՂՀ պաշտոնյան:

Նա տեղեկացրեց, որ այս տարի մեծացել է տարբեր արտասահմանյան պատվիրակությունների հոսքն Արցախ:

«Ես կցանկանայի մեջբերել Սլովակիայի առաջին ղեկավարի Միկլոշկոյի կարծիքն առ այն, որ եվրոպայի ճակատագիրը որոշվում է Արցախում: Սա շատ կարևոր հայտարարություն էր, իսկ վերջինս նաև եվրոխորհրդարանի պատգամավոր է: Մեզ համար կարևոր էր Հաագայի միջազգային դատարանի որոշում, որով օրինական համարվեց Կոսվոյի միակողմանի առանձնացումն ու անկախության հռչակում: Սրանք մեր համար իրավական դաշտում բավական բարենպաստ պայմաններ են ստեղծում: Սրանք բաներ են, որոնք ցույց են տալիս, թե ինչպես են զարգացումներն ընթանում մեզ համար դրական հունով, ինչը պետք է զարգացնենք նաև 2011 թվականի ընթացքում»,- ասաց Դ. Բաբայանը:

Ամփոփելով տարին՝ նա ընդգծեց. «Այսպիսով, տարին պետք է համարել հաջողված: Ընդհանուր առմամբ մեզ հաջողվել է պահպանել և՛ կայուն աճի դինամիկան և արտաքին ոլորտում մեր դիրքորոշումը համառ կերպով պաշտպանել: