Ա. Դարբինյան. «Տեսականորեն չեմ բացառում, որ բանաձևը դեռ ընդգրկվի այս լիագումար նիստի օրակարգում»
«Հայոց ցեղասպանության վերաբերյալ թիվ 252 բանաձևի նախագիծն այս պահի դրությամբ չի ներառվել ԱՄՆ Կոնգրեսի Ներկայացուցիչների պալատի լիագումար նիստի օրակարգում, բայց քանի դեռ տեսականորեն այդ հնարավորությունը կա, մենք մեր ձեռքերը չենք իջեցնում»,-այսօր լրագրողների հետ հանդիպման ժամանակ ասաց Ամերիկայի հայկական համագումարի տարածաշրջանային տնօրեն Արմինա Դարբինյանը և հավելեց, որ «քանի որ կոնգրեսում դեռ աշխատանքները են տարվում, ես տեսականորեն չեմ բացառում, որ բանաձևը դեռ ընդգրկվի այս լիագումար նիստի օրակարգում»:
Նա նշեց, որ անկախ նրանից բանաձևը կընդգրկվի օրակարգում, թե ոչ Ամերիկայի հայկական համագումարը շարունակելու է իր նպատակաուղղված աշխատանքը: «Սակայն մենք չենք կարող ներազդել ԱՄՆ-ի քաղաքականության վրա: Մենք ամենօրյա աշխատանք են տանում յուրաքանչյուր կոնգրեսականի հետ տարբեր առիթներով»,-ասաց նա:
Ըստ բանախոսի, թիվ 252 բանաձևի ընդունումը կարևոր է հենց ԱՄՆ-ի, մասնավորապես, ԱՄՆ-ի նախագահի համար, քան մեզ համար: «Եթե Միացյալ Նահանգները հավակնում են կրել ժողովրդավարական պետության տիտղոսը, ապա սա նրանց հետաքրքրություններից պետք է բխի, որ նրանց բարոյական կերպարը համոզիչ լինի: Այս հարցը ավելի շատ ԱՄՆ-ի նախագահի բարոյական բնութագրի և բարոյական կերպարի խնդիրն է»,- ասաց նա:
Ա. Դարբինյանը նշեց, որ սա այն խնդիրը չէ, որը խարխուլ հիմքերի վրա է, որ մենք էլ փորձենք նպաստավոր պահ գտնենք այդ բանաձևն անցկացնելու համար: «Սա մարդու իրավունքների հետ առնչվող այն սկզբունքային խնդիրն է, որ անկախ քաղաքական զարգացումներից, պետք է ճիշտ և մաքուր ճանապարհով սրան հասնել»,- ասաց նա:
Ամերիկայի հայկական համագումարի տարածաշրջանային տնօրենը ընդգծեց, որ Ամերիկայի հայկական համագումարը փորձում է բանաձևի ընդունումը չկապել հայ-թուրքական հարաբերությունների հետ:
Իսկ թե ո՞րն է պատճառը, որ բանաձևը դեռևս օրակարգ չի մտել հարցին, բանախոսը նշեց, ընտրությունը շահի և բարոյականության միջև է: «Ամենապարզ պատճառն այն, էր որ ԱՄՆ չի ցանականում Թուրքիայի հետ հարաբերությունները փչացնել»,- ասաց նա:
Ա. Դարբինյանը հավելեց, որ 252 բանաձևի նախագիծն այս լիագումար նիստի օրակարգ չմտնելու պատճառներից էր նաև Վաշինգտոնի վարչակազմի կեցվածքը: Նրանք բարձրաձայնեցին, որ չեն նպաստի այդ բանաձևի անցկացմանը: Երկրորդ պատճառն այն է, որ թուրքական լոբբին էլ ձեռքերը ծալած նստած չի: Վերջերս նրանք նամակ էին տարածել կոնգրեսում, որտեղ անհեթեթ հիմնավորումներ էին ներկայացրել, թե ինչու չպետք է ընդունվի այս բանաձևը»,- ասաց նա:
Բանախոսը նշեց, որ չպետք է հուսահատվել և պետք է սկզբունքայնորեն շարունակել առօրյա աշխատանքը: