Ձեր վստահելի աղբյուրը

«2010թ.-ը դժվար տարի էր` ինչպես տնտեսական զարգացման, այնպես էլ համաշխարհային ֆինանսական ճգնաժամի հաղթահարման առումով, բայց այն ինչ նախատեսել էին գործարարները` մի փոքր ավելի լավ ստացվեց»: Panorama.am-ի թղթակցի հետ զրույցում նման կարծիք հայտնեց Արդյունաբերողների և գործարարների միության նախագահ Արսեն Ղազարյանը:

Նրա խոսքերով, այդուհանդերձ, տնտեսության երկու հիմնական ճյուղեր դեռևս չի հաջողվում վերականգնել: Դա գյուղատնտեսությունն ու գյուղմթերքների վերամշակումն է, որը արտահանման համար խիստ կարևոր ոլորտ է, ինչպես նաև` շինարարությունը: «Տարեվերջին արդեն նկատվում է շինարարության ոլորտում որոշակի աշխուժություն և եթե մեզ հաջողվի հիպոթեկային վարկավորումն ակտիվացնել, ապա 2011թ.-ին կարող ենք ասել, որ այդ ճյուղում էլ ունենք հաջողություններ»,- նկատեց Ա.Ղազարյանը:

Այսպիսով` ամփոփելով 2010թ.-ը, Ա.Ղազարյանը նշեց, որ արդյունքներից այնքան էլ գոհ չէ, բայց մասնակի բավարարված է:
Նրա գնահատականով, 2011թ.-ին լավ արդյունքներ կգրանցվեն, եթե նույն տեմպով շարունակվի վարչարարության բարեփոխումների ուղին` այնպես, ինչպես ճգնաժամի ժամանակ:

«Մենք հիմքեր պետք է դնենք չկրկնելու մեզ մոտ ճգնաժամը, իսկ դրա համար կառավարությունը և գործարարները պետք է մշակեն ոչ ավանդական մեթոդներ` հասկանալու, թե Հայաստանի արդյունաբերությունից ինչ է մնացել և ինչը պետք է վերականգնել: Մենք պետք է մեկ քայլով ևս խորացնենք տեղական արտադրության պաշտպանությունը պետության կողմից, մենք պետք է կարողանանք բանկային համակարգի հետ մեկտեղ պետության երաշխիքներով ստեղծել երկարաժամկետ ծրագրեր, որպեսզի վերազինենք հատկապես մրցունակ ճյուղերը,- նշեց Ա.Ղազարյանը:

Ըստ նրա, կառավարությունը գործարարների հետ միասին պետք է իրականացնի մի շարք քայլեր, մեխանիզմներ մշակի, հատկապես` արտադրական պոտենցիալի վերականգման առումով, քանի որ գնալով արտահանում-ներկրում սալդոն մեծանում է , ինչը տնտեսության համար վտանգավոր է դառնում:

Ա.Ղազարյանի խոսքերով, թեև այսօր 12-15 անուն արտադրանք արտահանվում է և դրանք մրցունակ են միջազգային շուկայում, բայց սա քիչ է երկրի համար, ուստի այս ուղղությամբ պետք է լուրջ քայլեր ձեռնարկել: «Մենք պոտենցիալ ուենեք, մեր գյուղացիական հողերի զգալի մասը դեռևս չի մշակվում, չունենք խոշորացված ֆերմերային հողեր, որ ավելի արդյունավետ աշխատեն, իսկ այդ ոլորտը արտաքին շուկայում` ԱՄՆ-ից Ռուսաստան, Սինգապուրից մինչև հեռավոր Արևելք, մրցունակ ապրանք է տալիս: Պետք է ձեռնարկությունների քանակն ավելացնել և հետևել դրանց վերազինմանը»,- ասաց գործարարը:

Ա.Ղազարյանը հայտնեց, որ ներկայումս միությունում ուսումնասիրում են Հայաստանի երբեմնի հզոր թեթև արդյունաբերությունը: Ըստ նրա, որքան էլ ոլորտը փոշիացված է, այդուհանդերձ կա աշխատելու և արտաքին շուկայում որակյալ արտադրանք արտահանելու հնարավորություն: «Անելիքները շատ են: Իրոք պետք է սթափվենք այս ճգնաժամից հետո, իրոք պետք է ռեալ գնահատենք այն ինչ որ կա` առանց նախկին ամբիցիաների, առանց երազանքների, ռեալ տնտեսական ծրագրեր մշակելով կառուցենք մեր տնտեսությունը, որ կարողանանք ապահովել առաջին հերթին զբաղվածությունը: Այսօր ամենակարևոր գերխնդիրը զբաղվածությունն է: Դրանով արտագնա աշխատանքի կասեցման խնդիրը նաև կլուծենք», - ընդգծեց Ա.Ղազարյանը:

Հարցին, թե ինչպես է գնահատում ստվեր դեմ պայքարի արդյունավետությունը, նա նշեց, որ այս հարցում դանդաղ, բայց հետևողական առաջ ենք գնում: Ըստ նրա, ուսումնասիրելով խոշոր հարկ վճարողների ցուցակը և համեմատելով նախորդ տարիների հետ, ապա նկատելի է, որ այսօր առաջին հարյուրակում ընդգրկված են այնպիսի ձեռնարկություններ, որոնք նախկինում ստվերի տակ էին գործում:

«Չակերտավոր անուն հանած խոշոր ձեռնարկությունների ստվերն ավելի մեծ է, և այս ուղղությամբ էլ դեռևս շատ անելիքներ կան: Կարծում եմ, որ էլեկտրոնային հաշվետվությունների համակարգի ներդրումը ստվերի դեմ պայքարում ևս մեկ քայլ է: Պարզապես տեմպերը պետք է արագացնել: Մենք պետք է կտրուկ քայլեր ձեռնարկենք, որպեսզի ստվերում թաքնված տնտեսությունը գալով իրական վիճակագրության մեջ ՀՆԱ-ն ցույց տա, զբաղվածության թվերը իրական երևան, քանի որ զգալի մասը չի երևում: Միջազգային փորձագետներին միշտ ասում եմ, որ ստվերում գտնվող տնտեսության մասն էլ հաշվարկեն, որ ռեալ պատկերը ստեղծենք` ինչ ունենք, որտեղ ենք ուժեղ, և որտեղ ենք թույլ»,- ասաց Ա.Ղազարյանը: