Տիգրան Սարգսյան. 2011թ.-ին բարեփոխումների արդյունքները լինելու են շոշափելի
ՀՀ կառավարության այսօրվա նիստում վարչապետ Տիգրան Սարգսյանը անդրադառնալով 2011թ.-ին իրականացվելիք բարեփոխումներին, այն բաժանել է մի քանի խմբի:
«Առաջինն այն է, ինչ որ ՀՀ նախագահը մեզ հանձնարարել է. մենք պետք է դիվերսիֆիկացման ենթարկենք մեր տնտեսական համակարգը։ Այդ առումով էական, հիմնարար բարեփոխում ենք մենք ձեզ հետ միասին սկսել 2010թ. դա մեր կառավարության թիվ մեկ և լրջագույն բարեփոխումն է` կենսաթոշակային բարեփոխումը, որն առնչվում է բոլոր ոլորտների հետ, երկարաժամկետ է և մեզանից շատ ռեսուրսներ է խլելու»,- աել է վարչապետը:
Երկրորդ լրջագույն բարեփոխումը, ըստ նրա, պարտադիր ապահովագրությունն է, որը սկսվել է 2010թ.-ին։2011թ.-ը այդ առումով բեկումնային է լինելու, որովհետև կձևավորվեն պարտադիր ապահովագրության ինստիտուցիոնալ կառույցները։ Դա ենթադրում է, որ հազարավոր մարդիկ առնչվելու են այս համակարգի հետ, և նոր մտածողություն է ներդրվելու այս ոլորտում բավական լուրջ հետևանքներով։
Բարեփոխումների երրորդ ուղղությունը բիզնես միջավայրին առնչվող ռեֆորմներն են, որ իրականացվելու են հարկային և մաքսային վարչարարության ոլորտում։ Սա ռեֆորմների առաջին բլոկն է։
Երկրորդ բլոկը, Տ.Սարգսյանի խոսքերով, արդյունաբերությունն ու գյուղատնտեսությունն է։ «Արդյունաբերությունում մենք առաջին անգամ ունենալու ենք արդյունաբերական արտահանման ուղղվածություն ունեցող համալիր ծրագիր։ Էկոնոմիկայի նախարարությունն աշխատել է այս ծրագրի վրա, և մենք պետք է կարողանանք հնարավորին չափ կարճ ժամանակահատվածում հաստատել այդ ծրագիրը»,- նշել է վարչապետը:
Ըստ նրա, առաջին անգամ նկարագրված են լինելու ճյուղերն ըստ ձեռնարկությունների։ Ըստ ճյուղերի պետք է լինեն շարժիչ ուժ հանդիսացող ձեռնարկություններն իրենց ներուժով և նկարագրությամբ, թե 2011թ. արդյունաբերությունում աճի ինչպիսի տեմպեր են լինելու ըստ հատվածների:
Նշվեց նաև, որ գյուղատնտեսության ոլորտի բարեփոխումները նույնպես առաջնահերթություն են լինելու 2011թ.։
«Երկու ոլորտ, մեր բարեփոխումների երրորդ հարթությունը, որոնք սոցիալական ուղղվածություն ունեն` առողջապահություն, կրթական համակարգ։ Մենք պետք է էապես բարելավենք մեր քաղաքացիներին մատուցվող ծառայությունների որակը, հասանելիությունը և կոռուպցիոն ռիսկերը պետք է կտրուկ նվազեցնենք. ունենք որոշակի հաջողություններ այդ բնագավառում»,- ասել է վարչապետը: Ըստ նրա, Ծննդօգնության ծրագիրը ցույց տվեց, որ եթե համալիր ծրագիր են իրականացնում, ապա ունենում են էական հաջողություն։
Միջազգային կառույցների գնահատականներով` ծննդաբերության բնագավառում 80 տոկոսով կոռուպցիոն ռիսկերը նվազել են, իհարկե, դեռևս ունեն խնդիրներ, բայց 80 տոկոս կրճատումն էական արդյունք է։ «Կարծում եմ, որ 2011թ. և՛ առողջապահության, և՛ կրթական համակարգում էական բարեփոխումների տարի է լինելու, այնպիսի բարեփոխումների, որ մեր քաղաքացիներն զգալու են դա».- նշել է վարչապետը:
Չորրորդ հարթությունը դատաիրավական բարեփոխումներն են և ոստիկանության բնագավառում իրականացվող համալիր ծրագիրը, որ անցած տարի հանրապետության նախագահի կողմից հաստատվեց ամբողջությամբ։ Տ.Սարգսյանի խոսքերով, լրջագույն ծրագիր են հաստատել և առաջին դրական արդյունքներն արդեն ունեն։ «Կտրուկ նվազեց ճանապարհատրանսպորտային պատահարների զոհերի թիվը, և մենք, ըստ էության, այս առումով հինգ տարվա ծրագիրը կատարեցինք մեկ տարվա ընթացքում։ Եվ համոզված եմ, որ 2011թ. այս ռեֆորմների արդյունքներն էլ լինելու են շոշափելի, և այս ամենն արտացոլված է այս փաթեթում, որ մենք այսօր հաստատում ենք»,- հայտնել է Տ.Սարգսյանը:
Լրահոս
Տեսանյութեր
«Ձեր սիրելի Ալիևը «Նոլդու Փաշինյան» երգը միացրած Արցախով պտտվում է». Բագրատ Սրբազանը՝ իշխանությանը