Ա.Անդրեասյան «Առաջիկա տարիներին ջրի սակագների փոփոխություն չենք նախատեսում»
Այսօր ՀՀ ՏԿՆ ջրային տնտեսության պետական կոմիտեի նախագահ Անդրանիկ Անդրեասյանը լրագրողների հետ հանդիպման ժամանակ ներկայացրեց կոմիտեի 2010 թվականի գործունեության արդյունքները և 2011 թվականի գերակա խդիրները:
«Անցյալ տարի զգալի աշխատանքներ են իրականացվել ոլորտում ջրային համակարգերի վերականգման, ջրամատակարարման տևողության ավելացման, որակի բարելավման, մատակարարված ջրի դիմաց վճարների հավաքագրման մակարդակի բարձրացման, ինչպես նաև ջրակորուստների նվազեցման ուղղությամբ»,-ասաց Անդրանիկ Անդրեասյանը։
Կոմիտեի նախագահի փոխանցմամբ, եվրոպական վերակառուցման և զարգացման բանկի ֆինանսավորմամբ Սևան, Ջերմուկ, Վարդենիս, Գավառ և Մարտունի քաղաքներում կառուցվել է շուրջ 23 կմ կոյուղագիծ։ Իսկ Աբու Դաբիի Զարգացման հիմնադրամի աջակցությամբ իրականացվող վարկային ծրագրով «Արփա Սևան» թունելի վթարային հատվածներում իրականացվել է 1.1 մլրդ դրամի շինարարական աշխատանք։
«Խմելու և ոռոգման ջուր մատակարարող ընկերությունների կողմից մատակարարված ջրի դիմաց անցնող տարում գանձվել է 18.73 մլրդ դրամ և պետական բյուջե է փոխանցվել 5.5 մլրդ դրամի հարկեր, տուրքեր և վճարներ»,-տեղեկացրեց Անդրանիկ Անդրեասյանը։
Անդրադառնալով այս տարվա ծրագրերին ջրային տնտեսության պետական կոմիտեի նախագահը նշեց, որ կոմիտեն շարունակելու է ջրային համակարգերի կառավարման բարեփոխումները, որոնք ուղղված կլինեն հանրապետության մի շարք բնակավայրերի ջրամատակարարման բարելավմանը, ջրի կորուստների կրճատմանը և խմելու ջրի որակի բարձրացմանը։
Տարվա գերակա խնդիրներից է նաև ջրամատակարարման տևողության աստիճանական ավելացումը, նախորդ տարվա նկատմամբ առնվազն մեկ ժամով։
«Անցնող տարում կատարվել է 25 մրդ դրամի ներդրումներ և առաջիկա տարիներին ներդրումային տեմպերը կպահպանվեն և կունենանք լուրջ արդյունքներ։ Տեղեկացնեմ նաև, որ առաջիկա տարիներին սակագների փոփոխություն չենք նախատեսում»,-նշեց պարոն Անդրեասյանը։
Նշենք, որ կոմիտեի այս տարվա ծրագրով նախատեսվում է նաև իրականացնել Սևանա լճի բնապահպանական խնդիրների լուծմանն ուղղված միջոցառումները և շահագործմն հանձնել Մարմարիկի ջրամբարը: