Ձեր վստահելի աղբյուրը

Շարունակվում է Հայաստանի արտգործնախարարի պաշտոնական այցելությունը Ավստրիա: Արտգործնախարարության տեղեկատվության համաձայն, այսօր առավոտյան նախատեսված է Էդվարդ Նալբանդյանի ելույթը ԵԱՀԿ մշտական խորհրդում: Օրվա երկրորդ կեսին Հայաստանի արտգործնախարարը Բրատիսլավայում կմասնակցի Արևելյան գործընկերության անդամ երկրների և Վիշեգրադյան քառյակի արտգործնախարարների հանդիպմանը:

Նշենք, որ նախօրեին նախարարի աշխատանքային առաջին հանդիպումը ԵԱՀԿ գլխավոր քարտուղար Մարկ Պերեն դե Բրիշամբոյի հետ էր: Կողմերը քննարկել են ԵԱՀԿ գործունեության տարբեր ոլորտներին առնչվող հարցեր, մտքեր փոխանակել կազմակերպության բարեփոխումների շուրջ: Է. Նալբանդյանը նշել է, որ Հայաստանը կարևորում է ԵԱՀԿ դերը Եվրոպայում անվտանգության և համագործակցության ապահովման գործում, և շարունակելու է գործուն մասնակցությունը կազմակերպության գործունեության բոլոր հարթություններում:

ԱՀԿ գլխավոր քարտուղարի խնդրանքով Հայաստանի ԱԳ նախարարը ներկայացրել է արցախյան հիմնախնդրի կարգավորման բանակցային գործընթացի վերջին զարգացումները՝ ՌԴ նախագահի նախաձեռնությամբ և ներկայությամբ մարտի 5-ին Սոչիում կայանալիք Հայաստանի և Ադրբեջանի Նախագահների հանդիպման նախաշեմին:

Է. Նալբանդյանն այցելել է Վիեննայի Դիվանագիտական Ակադեմիա, որը համարվում է աշխարհում դիվանագետների պատրաստման առաջին կրթօջախներից մեկը: Այնտեղ ՀՀ ԱԳՆ-ն հանդես է եկել Հայաստանի արտաքին քաղաքականության և հայ-ավստրիական հարաբերություններին նվիրված ծավալուն ելույթով, որին ներկա էին ԱԳՆ բարձրաստիճան պաշտոնյաներ, քաղաքագետներ, վերլուծաբաններ և Վիեննայում հավատարմագրված դեսպաններ:

Անդրադառնալով ղարաբաղյան հիմնախնդրի կարգավորման գործընթացի վերջին զարգացումներին՝ նախարար Նալբանդյանը մասնավորապես նշել  է. «Մինչ Հայաստանը խոսում է խաղաղության մասին, Ադրբեջանը պատերազմ է քարոզում, մինչ մենք առաջարկում ենք համաձայնության գալ ուժի չկիրառման մասին, Ադրբեջանը հրաժարվում է այդ առաջարկից և պարծենում իր ռազմական բյուջեի ավելացումով: Մինչ միջազգային հանրությունը կոչ է անում ամրապնդել զինադադարը և դուրս բերել դիպուկահարներին շփման գծից, Ադրբեջանը շաբաթական հարյուրավոր անգամ խախտում է զինադադարը և սադրանքներ կազմակերպում շփման գծում: Միջազգային հանրությունը հայտարարում է, որ խաղաղ կարգավորումն այլընտրանք չունի, իսկ Ադրբեջանն ասում է, որ խաղաղ կարգավորումը չի նշանակում ուժի չկիրառում: Մենք կոչ ենք անում միջազգային կազմակերպություններին և այլ երկրներին աջակցել Մինսկի խմբի համանախագահների կողմից ձեռնարկվող քայլերին՝ սատարել բանակցությունների շարունակմանը միջազգային հանրության մանդատն ունեցող ձևաչափով՝ փոխզիջումային լուծումներ գտնելու համար: Իսկ Ադրբեջանը Հայաստանի դեմ դիրքորոշում որդեգրելու կոչ է անում բոլորին, փաստորեն հանդես գալով Մինսկի խմբի համանախագահների մոտեցումներին հակառակ, փորձում է բանակցությունները տեղափոխել այլ ձևաչափեր՝ դրանով իսկ վնաս հասցնելով կարգավորման գործընթացին»:

Բացի այդ Է. Նալբանդյանը նշել է, որ տպավորություն է ստեղծվում` Ադրբեջանի միակ նպատակը բանակցությունները ձախողելով պատասխանատվությունը բարդելն է մյուս կողմերի վրա: Նախարարը հատկանշել է, որ Հայաստանն ընդունել է հունիսին Սանկտ-Պետերբուրգում, հոկտեմբերին Աստրախանում և դեկտեմբերին Մոսկվայում ներկայացված նորացված առաջարկները` որպես դեպի կարգավորում տանող բանակցությունների հիմք: Դա նշանակում է, որ Հայաստանի դիրքորոշումը համահունչ է միջազգային հանրության դիրքորոշմանը: «Իսկ Ադրբեջանը շարունակաբար նորանոր փոփոխություններ է առաջարկում մի շարք հարցերի վերաբերյալ, որոնց շուրջ արդեն բավական ժամանակ առաջ փոխըմբռնում էր ձևավորված: Եվ զարմանալին այն է, որ իր այդ քայլերը փորձում է քողարկել՝ մեղադրելով Հայաստանին ձեռք բերված համաձայնեցված տարրերը խմբագրելու ցանկության մեջ, այնինչ իրականում լրիվ հակառակն է: Միջազգային հանրությունն սպասում է Ադրբեջանից մեկ հստակ պատասխան՝ արդյոք նա ընդունում է այսօր սեղանին գտնվող առաջարկները: Այո, թե ոչ: Հուսով ենք, որ ի վերջո Սոչիում Ադրբեջանի կողմից կցուցաբերվի անհրաժեշտ իրատեսություն և քաղաքական կամք, որպեսզի հնարավոր լինի առաջ տանել կարգավորման գործընթացը»,-եզրափակել է Է. Նալբանդյանը:

Ի դեպ, ելույթից առաջ Է. Նալբանդյանը հանդիպել է Ակադեմիայի տնօրեն դեսպան Հանս Վինկելի հետ, որի ընթացքում քննարկվել են ՀՀ ԱԳՆ նորաստեղծ դիվանագիտական դպրոցի և շուրջ երկուսուկես դարի պատմություն ունեցող Վիեննայի դիվանագիտական ակադեմիայի միջև համագործակցությանն առնչվող հարցերի լայն շրջանակ:

Երեկոյան նախարարն այցելել է Վիեննայում ՀՀ դեսպանատուն, ուր հանդիպել է ավստրիահայ համայնքի ներկայացուցիչների հետ, որոնց ներկայացրել է Հայաստանի արտաքին քաղաքականությունը և պատասխանել ներկաների բազմաթիվ հարցերի: