Ռուբեն Գևորգյանը նվիրում է իր քառատողը, իսկ Գալուստ Սահակյանը` ձնծաղիկ. Պատգամավորների շնորհավորանքները
Ազգային ժողովի «Բարգավաճ Հայաստան» խմբակցության անդամ Ռուբեն Գևորգյանի սիրտն ուրախությամբ է լի. նա Օդեսայում է, թոռնիկների մոտ և նշում է իր դստեր ծննդյան օրը: «Մեզ համար ուրախություն է մարտի 8-ը. ես դուստր եմ ունեցել, իսկական տոն է եղել մեզ համար», -տոնական զգացումներն արտահայտեց պատգամավորը: Նա շնորհավորեց հայ կանանց ու մայրերին` ցանկանլով կապույտ, պարզ վճիտ երկինք, «ճերմակ աչքեր և ուրախ ներս», այնուհետև տոնի կապակցությամբ նրանց նվիրեց իր քառատողերից մեկը`
-Ադամանդյա քարերն անգամ թեկուզ ժպտան մեզ ողջ կյանքում
Կամ ճամփեքիս տատասկները փոխակերպվեն ալ վարդերի
Կան էակներ դա մայրերն են, որոնց մենք միշտ պարտք ենք կյանքում:
«Թող այդ տողերս դառնան վարդ, կակաչ և իրենց բուրմունքով լցնեն մեր մայրերի, աղջիկների հոգին», -ցանկություններն ավարտեց պատգամավորը:
«Ժառանգություն» խմբակցության ղեկավար Ստյոպա Սաֆարյանն այս օրը առանձնակի ջերմությամբ է հիշում իրեն շրջապատող կանանց` կնոջը, քրոջը, մայրիկին ու գործընկերներին: Նա առայժմ չի ծրագրել` ինչպես կանցկացնի օրը, բայց նրա խոսքով, կհավաքվեն ու խնջույքի տեսքով կնշեն կանանց գեղեցիկ տոնը: Բայց մինչ այդ տոնի կապակցությամբ նա հայտնեց իր ցանկությունը. «Մարտի 8-ը բոլորս գիտենք, որ որպես կանոն կանանց իրավունքների պաշտպանության օր է և ես ուզում եմ, որ այս վերջին զարգացումների լույսի ներքո բոլոր տղամարդիկ հիշեն, որ կանանց չի կարելի բռնության ենթարկել, որ կանանց իրավունքների և խնդիրների մասին պետք է մտածել ոչ թե մեկ օր կամ մեկ ամիս, այլ միշտ»:
ԱԺ Դաշնակցություն խմբակցության պատգամավոր Արա Նռանյանի համար այսօր դժվար է պատկերացնել, որ սիրելի կանանց տոնը կարող էր լինել ոչ գարնանը:
«Ցանկացած քաղաքակրթության համար հազարամյակներ շարունակ կնոջ կերպարը մարմնավորել է կյանքի շարունակությունը, բերքառատությունը, զարթոնքն ու գեղեցկությունը: Եվ իսկապես պատահական չէ, որ այսօր նույնպես մեզ համար մարտի 8-ը մարմնավորում է զարթոնքը, ձմռանից հետո նոր տարվա, նոր ժամանակաշրջանի սկիզբը և, իհարկե, արևի ջերմությունը, բնության բազմազանությունն ու հակասականությունը, ինչպես նաև գարնանային ծաղիկների ֆանտաստիկ «ներկնապնակը»: Այսինքն այն ամենն, ինչ տղամարդիկ տեսնում են յուրաքանչյուր կնոջ մեջ», -նկատեց նա:
Նա ցանկացավ, որ բոլոր հայ կանայք սիրեն և լինեն սիրված, հավատան, որ իսկապես նրանք ցանկալի և անկրկնելի են իրենց սիրելի տղամարդու համար: «Գուցե մենք` հայ տղամարդիկ այնքան էլ շռայլ չենք գեղեցիկ խոսքերով և կոմպլիմենտներով, սակայն բոլորս էլ իրապես և անկեղծորեն սիրում և հարգում ենք մեր հասարակության իսկապես լավագույն և ամենագեղեցիկ հատվածին», -հավելեց Դաշնակցական պատգամավորը:
Խոսելով հայ կնոջ ապրած կյանքի ու հոգսերի մասին, պատգամավորը նկատեց. «Դժվար է հիշել, թե երբ է հայ կնոջ ճակատագիրն եղել ավելի թեթև, իսկ կյանքն անհոգ: Կանայք Հայաստանում այսօր ստանձնել են բոլոր այն գործառույթներն, որոնք բնորոշ են տղամարդկանց և մի բան էլ ավելի` տան, ընտանիքի և երեխաների հոգս, աշխատանք, ընդ որում հաճախ ծանր: Իսկ սոցիալական բեռի տակ նաև` հոգևոր խորը ապրումներ և ճգնաժամ»: Պատգամավորը համոզված է, որ երկրում առկա քաղաքական, սոցիալ-տնտեսական, բարոյահոգեբանական բոլոր խնմդիրները կլոծվեն միայն համատեղ` տղամարդիկ և կանայք միասին:
«Հայ կանայք մեր ազգի մեծագույն և դեռևս չբացահայտված ռեզերվն են, որն իր մեջ կրելով հայ ազգի ամբողջ գենետիկան, կարող է լրջագույն բեկում մտցնել մեր երկրի և ժողովրդի վերելքի ապահովման գործում», -նշեց Նռանյանը:
Առողջություն, բախտավորություն, երջանիկ կյանք. սա ԱԺ ԲՀԿ-ական պատգամավոր Վարդան Բոստանջյանի տոնական մաղթանքն է հայ կնոջը: Նա իր ընտանիքից է դատում, թե ինչպիսի ծանր բեռ է ընկած հայ կնոջ ուսերին: «Ցանկանում եմ հաջողություն և հասկանում եմ, որ այն տղամարդը, որը կարող է իրեն լավ զգալ, դա մեծապես պայմանավորված է կնոջով: Առողջություն եմ ցանկանում կանանց, որ կարողանան հասարակության բջիջը` ընտանիքը լավ պահեն», -ասաց պատգամավորը`տեղեկացնելով, որ իրեց ընտանիքում ավանդույթ է` այս տոնը նշելու են փոքրիկ խնջույքով:
ԱԺ Հանրապետական խմբակցության ղեկավար Գալուստ Սահակյանն ասաց, որ իր համար մարտի 8-ն առանձնակի խորհուրդ ունի: «Հայ ազգի համար կինը, մասնավորապես մայրը, մի կտոր հայրենիք է իսկ հայրենիքի ամրությունը պահպանում են մայրերի որդիները: Սա մեր ամենահզոր գաղափարախոսությունն է, որ եկել ու մեր օրերին է հասել: Պատահական չէ, որ հայերն ունեն տիկին բառը, որը նշանակում է տիեզերական կին», -տոնի մասին իր մտքերը փոխանցեց պատգամավոր Սահակյանը:
Նա կարծում է, որ այս օրով ամենալավ նվերը գարնան առաջին ծաղիկն է` ձնծաղիկը: «Ձնծաղիկներ ունեմ և ցանկացած կնոջ նվիրելու եմ ձնծաղիկներ», -հավելեց պատգամավորը:
ԱԺ ՕԵԿ-ական պատգամավոր Արծրունի Աղաջանյանի տանը մի քանի կին կա` նրա տիկինը, դուստրերը, մայրն ու հարսը ու այս տոնը նրանք մեծ շուքով են նշում: Իսկ հայ կանանց նա ցանկացավ. «Առաջին հերթին առողջություն ու ուզում եմ, որ նրանց ընտանիքներում լինի համերաշխություն, երջանկություն, որպեսզի նրանք միշտ ուրախ լինեն, նրանց ուրախությունից է կախված տղամարդկանց առօրյան: Իսկ ընդհանրապես շատ կարոևր տոն է, որին տղամարդիկ պետք է մոտենան մեծ պատասխանատվությամբ: Այդ առումով հայերը մի քիչ ավելի ակտիվ են` երկու անգամ են նշում, շատերն ասում են,` մարտի 8-ից մինչև ապրիլի 7-ը, իսկ ուժեղ տղամարդիկ ապրիլի 7-ից մարտի 8-ն են նշում»:
Լրահոս
Տեսանյութեր
«Ձեր սիրելի Ալիևը «Նոլդու Փաշինյան» երգը միացրած Արցախով պտտվում է». Բագրատ Սրբազանը՝ իշխանությանը