Ձեր վստահելի աղբյուրը

«Ադրբեջանական մամուլում գնալով ավելի շատ է նշվում այն մասին, որ նրանք մեզ հետ պատերազմի մեջ են գտնվում: Սակայն դեռ հարց է, թե իրականում նրանք ում հետ են պատերազմում` հայերի թե սեփական ժողովուրդի»,- անդրադառնալով ադրբեջանական կողմի տարածած հայտարարություններին, որում նշվում է, թե իբր հայկական կողմի արձակած կրակից քաղաքացիական անձ է սպանվել՝ Panorama.am-ին ասաց ռազմական փորձագետ Արծրուն Հովհաննիսյանը:

Նրա խոսքերով, Արցախյան հիմնահարցի լուծման ճանապարհին ադրբեջանական ծուղակներն անվերջանալի են և ամեն անգամ դրանք պատրաստելիս հակառակորդը դրսևորում է բացառիկ ստեղծագործական հմտություններ:

«Արդեն երեք օր է` ինչ մամուլում պտտվում են սուտ լուրեր այն մասին, որ հայկական կողմի արձակած գնդակից զոհվել է Ադրբեջանի Օրտ գյուղի բնակիչ 9 ամյա մի մի երեխա: Որպես ռազմական փորձագետ` ուշադիր հետևում եմ այդ լուրերին և կարող եմ նշել մի քանի մանրամասներ, որոնք մատնում են մեր հակառակորդի աննկարագրելի ջանքերով հորինված սուտը:

Ներկայացված լուրերի մեջ նշվում է, որ երեխան խաղում էր իրենց տան բակում և հայկական կողմից արձակած կրակոցից վիրավորվել կամ վնասվել է գլխից: Նրան շուտ տեղափոխել են հիվանդանոց, սակայն կյանքը փրկել չի հաջողվել և նա մահացել է ճանապարհին կամ հիվանդանոցում»,- ասաց ռազմական փորձագետը:

Այնուհետև Ա. Հովհաննիսյանը հավելեց. «Փորձենք հասկանալ ամբողջ իրողությունը.
Մամուլում նշվեց այդ երեխայի Օրտ գյուղի բնակիչ լինելը, սակայն որպես մանրամասնություն նշվում է, որ հայկական կողմը կրակ է բացել Շիխլար գյուղի ուղղությամբ: Հետաքրքիր է չէ մենք կրակում ենք Շիխլարին, սակայն վիրավորվում է Օրտի բնակիչը: Արդեն այստեղ սկսվում է ինչ, որ մի անհասկանալի բան: Եթե կրակը բացվել է Շիխլարի ուղղությամբ, ապա ինչո՞ւ է զոհվել Օրտի բնակիչը:

Սովորաբար եթե մի գյուղի վրա կրակ է բացվում, ապա գնդակը դիպչում է մեկին կամ ինչ, որ բանի այդ գյուղում, կամ մխրճվում է գետնի մեջ եթե հայկական կողմը ավելի բարձր դիրքից է կրակում: Եթե հայկական կողմը նույն հարթության վրա է գտնվում մի գյուղի վրա արձակած գնդակը չի կարող անցնել այդ գյուղի միջով և հասնել մեկ այլ գյուղ: Որքան ինձ է հայտնի կառավարվող թռիչք կատարող գնդակներ դեռ չեն կիրառվում: Ըստ իրենց ներկայացրած տվյալների իրենց բակում խաղացող երեխան զոհվում է ինչ, որ մի թափառող գնդակից, որը եթե նայենք քարտեզին եկել է ինչ, որ մի քանի կմ հեռավորությունից: Փաստորեն եթե անգամ այդ երեխան մահացել է որևէ գնդակից կամ արկից նախ դեռ հարկավոր է ապացուցել թե այն ով և որ կողմից է արձակել: Սակայն սա դեռ հիմնական թյուրիմացությունը չէ այս ստածին հորինվածքի մեջ»:

Նրա խոսքերով, հայկական կողմն այս հատվածում ինչպես կարող ենք տեսնել քարտեզից` չունի դիրքային բարձրության առավելություն:
«Այդ ինչպես կարող է նույն դիրքի վրա կանգնած հայ զինվորականը կրակել, որ արձակած գնդակը դիմացի դիրքերում ոչ մեկին չդիպչի կամ ամրաշինական պաշտպանիչ որևէ առարկայի մեջ չմխրճվի անցնի ու հասնում մեկ այլ գյուղ: Հայկական կողմի «արձակած» գնդակը ինչ, որ գերբնական ուժ է ունեցել հավանաբար»,- ասաց Ա. Հովհաննիսյանը:

Բանախոսի նշմամբ՝ այստեղ կարող էր լինել մի տարբերակ, եթե կրակոց արձակողը այն կրակեր ոչ ուղիղ դիմացի դիրքի կամ գյուղի ուղղությամբ այլ որոշակի բարձր անկյան տակ:

«Սակայն տվյալ դեպքում սովորական հարձգային զենքից արձակած գնդակը այդքան չէր կարող թռչել: Նման հեռավորության վրա կարող էին կրակել մեծ տրամաչափի գնդացիրը, դիպուկահարը կամ ինչ որ հրետանային միջոց, սակայն արի ու տես, որ այստեղ էլ սա չի համընկնում մեր հակառակորդի ներկայացրած հեթիաթի մի այլ կոնոնի հետ:

Հիշենք` հեքիաթի նախապայմաններից մեկը` երեխան վիրավորվել է, սակայն ճանապարհին մահացել է: Եթե մեծ տրամաչափի գնդակ լիներ երեխայի գլուխը ուղղակի կպոկվեր: Նշանակում է երեխան զրահավորված է եղել: Եթե արձակածը լիներ ինչ որ հրետանային արկ ինձ թվում է հարկավոր չէ բացատրել թե ինչ կլիներ: Ահա նման զավեշտալի բաներ»,- ասաց փորձագետը:

Նրա խոսքերով, այն, որ այս ամենն ադրբեջանական քարոզչամեքենայի հերթական մի հերյուրանքն էր ու կեղտոտ խաղ` պարզ էր դեռ սկզբից:

«Ինչպես հաճախ ապատեղեկատվության տարածող մեր ջանասեր հակառակորդները նախ Ֆարիզ Արզու օղլու Բադալովի տարիքը հստակ չէին նշում: Հաջորդող հաղորդագրություններում միայն հստակեցվեց 9 տարեկանը: Ինչպես գիտենք Սոչիում նախագահների հանդիպման ժամանակ հերթական անգամ հայկական կողմից դիպուկահարներին շփման գոտուց հանելու հարց բարձրացվեց: Պատասխանը անակնկալ չէր: Ադրբեջանցիները ամեն ինչ անում են որ իրենց քայլը արդարացնեն, նրանք հաճախակի անտեսելով իրենց զինվորների անվտանգությունը դիմում են արկածախնդրության, սակայն այս անգամ ստորության ճիրանների մեջ ներքաշվեց մի 9 ամյա մանուկ: Չնայած դեռ ապացույցի կարիք կա թե արդյոք ընդհանրապես նման դեպք եղել է, կամ արդյոք ընդհանրապես մահացել է նման մարդ: Ռազմագերուն սպանող, դիվերսիայի իրականացման ժամանակ զոհված անձին հերոսացնող և նրա փոխարեն այլ անձի թաղումը կազմակերպող երկրում ամեն ինչ հնարավոր է»,- նշեց Ա. Հովհաննիսյանը:

Նա նշեց, որ Ֆարիզ Արզու օղլու Բադալովի «մահից» հետո ադրբեջանական փորձագետների և մեկնաբանների կարծիքները ինքնին մատնում են ամբողջ կեղծիքը: