Ձեր վստահելի աղբյուրը

Կառավարության թիվ մեկ շենքի բակում գմբեթավոր շինություն կառուցելու մասին նույն կառավարության որոշումը մեծ աղմուկ է բարձրացրել Հայաստանի ճարտարապետների շրջանում: Այսօր այդ որոշումը Հանրային խորհրդի մշակույթի ենթահանձնաժողովի արտահերթ նիստի թեման էր: Ճարտարապետներ Սևադա Պետրոսյանը, Մանե Թամանյանը, ով նաև մեծանուն ճարտարապետ Ալ. Թամանյանի ծոռնուհին է և Անի Վերանյանը կառավարության թիվ 1 շենքի բակում կառուցվող նոր շենքի դեմ բողոքողներից են: Նրանք այդ շենքի կառուցման դեմ բողոքի նամակ են հղել կառավարությանն ու քաղաքապետարանին, սակայն դեռևս պատասխան չեն ստացել:

Սևադա Պետրոսյանի համոզմամբ, շենքը Հանարապետական նշանակության հուշարձան է, հետևաբար պետք է լինի նաև Մշակույթի նախարարության վերաբերմունքը: Նա ասաց, որ իրենք միայն Կառավարության կայքից են տեղեկացել, որ նման որոշում կա:

«Մյուս բոլոր ինֆորմացիաները տարբեր աղբյուրներից ենք փորձել գտնել: Կան այլ առարկություններ ևս. տարբեր մասնագետներ քննարկում են դրա քաղաքաշինական և ճարտարապետական նպատակահարմարությունը`  Հանրապետության հրապարակի արտաքին տեսքի համար»,- հայտարարեց ճարտարապետ Պետրոսյանը:

Պատասխանելով Հանրային խորհրդի անդամների հարցերին` Սևադա Պետրոսյանն ասաց, որ նոր շենք կառուցելու նախագիծը ներկայացված է ճարտարապետության թանգարանում: Թեև կառույցի անունը գմբեթ է նշվում, բայց իրականում գմբեթ, որպես այդպիսին, չկա:

«Նոր կառուցվող շենքը հարկայնությամբ չպետք է գերազանցի մյուս շենքերին, իսկ արտաքին տեսքով այն մյուս շենքերի կրկնության սահմաններում է լինելու: Շենքի ներքին հորինվածքը փոխված է, այնպես չէ նախագծված, ինչպես Թամանյանի դեպքում: Այն լինելու է ադմինիստարատիվ շենք, ուր տեղավորվելու են Սփյուռքի ու Արդարադատության նախարարությունները»,-ներկայացրեց նախագիծը Սևադա Պետրոսյանը` հավելելով, որ իրենք պահանջում են կառավարությունից` ժամանակավորապես դադարեցնել գործընթացը:

«Այսքան Թամանյանի անունը տալիս ենք, իր անունով ինչ ասես արեցինք», -իր հերթին դիտարկում արեց Հանրային խորհրդի անդամ, Ճարտարապետների միության նախագահ Մկրտիչ Մինասյանը:

Նա համոզված է, Թամանյանի ստեղծագործության հետ խաղալ չի կարելի:

«Կան ուրիշ խնդիրներ, որ զուտ մասնագիտական են, բայց, եթե նույնիսկ Թամանյանի ձևով կառուցվի, հարց պետք է տանք, թե Հանրապետության հրապարակում երկարատև կոնցեպտուալ մոտեցումը ինչքա՞ն ժամանակում կարող ենք ամբողջացնել: Հարապարկին պետք է նայել իր  շրջապատի հետ, հիմա Հրապարակը խեղդվում է կողքի մեծ կառույցների ծանրությունից: Հիմա ստացվում է, որ մեր ազգից Թամանյանին պաշտպանում ենք»,- հայտարարեց Ճարտարապետների միության նախագահը:

Վկայակոչելով շենքի կառուցման մասին կառավարության որոշումը`  Մկրտիչ Մինասյանն ասաց, որ այնտեղ նշվում է, թե կառուցվելու է բազմահարկ շենք, սակայն ոչ մի տողում չի նշվում, որ այն վերաբերում է Թամանյանի ժառանգությանը:
«Մենք հիմա կառույցը կորցնելու վտանգի առաջ ենք: Այս դեպքը բացառիկ է, այն ուղղակի առնչվում է Թամանյանի ժառանգությանը: Ծանրութեթև արեք, թե մենք ինչի՞ ենք գնում և հանուն ինչի՞»,-խորհուրդ տվեց Մկրտիչ Մինասյանը:
Երկար քննարկումներից հետո Հանրային խորհրդի մշակույթի ենթահանձնաժողովը որոշում չկայացրեց ու այդպիսով քննարկումը հետաձգվեց:

Ենթահանձնաժողովի նախագահ Գագիկ Մանասյանը քննարկումը հետաձգելով հետևեց Նկարիչների միության նախագահի առաջարկին` թեման քննարկել այն ժամանակ, երբ բոլորը տեղյակ կլինեն, քանի որ ներկաների մեծ մասը կամ լավատեղյակ չէին խնդրից, կամ էլ ընդհանրապես տեղյակ չէին, բայց ցանկություն ունեին տեղեկանալու:
Որոշվեց նաև, որ նույն թեմայով հաջորդ քննարկմանը կհրավիրվեն Կառավարության ներկայացուցիչներ, որ խնդիրը քննարկվի հիմնավոր ու բազմակողմանի:

Նշենք նաև, որ հետաձգվեց խորհրդի նիստում ընդգրկված ևս երկու առաջարկի քննարկում`Ճարտարապետ Լաերտ Թովմասյանի առաջարկը`Հանրապետության հրապարակում Լենինի նախկին արձանի տեղում կառուցել իր ոճով նոր ճարտարապետական կառույց և Երգահան Էդգար Գյանջումյանի առաջարկը` փոփոխություններ մտցնել զինանշանի, դրոշի և օրհներգի մեջ: Առաջարկների քննարկումը հետաձգվեց առաջարկողների բացակայության պատճառով: