Նվազագույն ծրագիրը կատարված է. «Բազմազգ Վրաստան»-ի ղեկավարը գնահատում է կաթողիկոսի այցը
Ամենայն Հայոց կաթողիկոս Գարեգին 2-րդի այցը Վրաստան ինքնին կարևոր էր հայ-վրացական հարաբերությունների հետագա ամրապնդման համար ու նաև` պատմական: Այցի ընթացքում բանակցություններն անցել են բարձր մակարդակի վրա: Այսօր Panorama.am- թղթակից հետ զրույցում գնահատելով Գարեգին 2-րդի 6-օրյա հովվապետական այցը Վրաստան, հայտարարեց «Բազմազգ Վրաստան» կազմակերպության նախագահ Առնոլդ Ստեփանյանը:
«Վրաստան կատարած կաթողիկոսի այցից սպասելիքներ շատ կային, բայց այն, ինչ արձանագրվեց և այն, ինչի մասին խոսվեց սկզբի համար նորմալ է», -հավելեց վրացահայ համայնքի ներկայացուցիչը:
Նկատենք, որ այցի ընթացքում և Վրաստանի նախագահ Սահակաշվիլիի և Վրաց պատրիարք Իլյա 2-րդի հետ հանդիպման ժամանակ Կաթողիկոսը բարձրացրել է վրացահայությանը հուզող հայկական եկեղեցիներին իրավական կարգավիճակ տալու հարցը: Մայր Աթոռի տեղեկատվական համակարգից տեղեկացնում են, որ Համայն Վրաստանի Պատրիարքի հետ «հանդիպման ընթացքում, ի հետևումն Վրաստանի Հանրապետության նախագահի և Պատրիարքի հետ հունիսի 10-ին տեղի ունեցած զրույցի, ձեռք բերվեցին հետևյալ պայմանավորվածությունները. իբրև առաջին քայլ Վիրահայոց թեմին առաջիկայում պետք է շնորհվի իրավական կարգավիճակ, ինչպեսև Հայաստանում վրաց եկեղեցական համայնքին, որն առ այսօր չէր ցանկանում ունենալ պետական գրանցում: Հավաստիացում կատարվեց նաև, որ փլուզված և փլուզման վտանգի ենթակա հայկական եկեղեցիների նկատմամբ պատշաճ խնամք և հոգատարություն պետք է դրսևորվի մինչ դրանք կվերադարձվեն հայոց թեմին: Հաջորդ փուլում քննության կառնվի եկեղեցիների վերադարձման խնդիրը»:
«Ես կասեի, որ նվազագույն ծրագիրը կատարված է, չէի ասի, որ դա մեր ցանկացածն էր, բայց այն, ինչ արվել է դիվանագիտական հարթության վրա, արդեն իսկ կարևոր է», -գնահատելով հովվապետական այցի ընթացքում ձեռք բերված պայմանավորվածությունները, հավելեց Առնոլդ Ստեփանյանը` ընդգծելով, որ այս փուլում կարևորը պահպանելն է «ձեռք բերվածը»:
Նրա խոսքով, Վրաստանը, ի դեմս իր ղեկավարության, ավելին անելու «պատրաստ չէ», հետևաբար, այն, ինչ արվել է, «քայլ առաջ է»:
Համայն Վրաստանի պատրիարքի և Ամենայն Հայոց կաթողիկոսի հետ հանդիպման ժամանակ նաև Վրաց պատրիարքն ասել է, որ պատրաստ են կազմել գիտնականների հանձնախումբ, որը կքննարկի երկու կողմերի ներկայացրած փաստերը: Հայոց վեհափառն ի պատասխան այդ առաջարկի, ասել է, որ Հայաստանում ևս պատրաստ են հատուկ հանձնախմբի միջոցով քննարկել վրացական կողմի ներկայացրած պահանջները: Իսկ Վրաստանի պահանջներն առնչվում են Հայաստանի հյուսիսում, մասնավորապես Լոռու մարզում գտնվող քաղկեդոնական 5 վանքերին ու տաճարներին, որոնք, ըստ որոշ պնդումների, վրացական են:
Հանձնախումբը, ըստ Ստեփանյանի, հնարավորություն կտա հաստատել, որ վրացական կողմի պահանջները սին են ու բարձր: Նա նաև կարծում է, որ շատ խանգարող հանգամանքներ կլինեն, որոնք չեն թողնի, որ հանձնաժողովն աշխատի: «Պետք է սպասել որոշակի ժամանակ. Գլխավորը այդ ֆորմատում հարցը քննարկելն է: Դա առաջին քայլն է և լավ կլինի, որ այն աշխատի, թեպետ կարծում եմ, որ շատ խանգարող հանգամանքներ կլինեն` հանձնախմբի գործունեության համար», -հավելեց «Բազմազգ Վրաստան»-ի ղեկավարը` կարծիք հայտնելով, որ «դիվանագիտության լեզվով ինչ-որ կոնսենսուս» կկայանա: