Ձեր վստահելի աղբյուրը

Ասկերանի շրջանում մարտի 17-ին սպանված ժամկետային զինծառայող Ահարոն Հայրապետյանի գործով քննությունը շարունակվում է, մեղադրյալ և Ահարոնի ընկեր Աշոտ Կոստանդելյանը 4 անգամ ցուցմունք է փոխել: Այսօր այդ մասին ասուլիսում հայտարարեց փաստաբան Ստեփան Ոսկանյանը:

ԼՂՀ Պաշտպանության բանակը մարտի 18-ին հայտարարել էր, որ մարտի 17-ին ժամը 17:30-ի սահմանում ղարաբաղա-ադրբեջանական հակամարտ զորքերի շփման գծի արևելյան (Ասկերանի) պաշտպանական ուղղությամբ տեղակայված դիրքերից մեկում հակառակորդի կողմից արձակված գնդակից հրազենային մահացու վիրավորում է ստացել ՊԲ ժամկետային զինծառայող, 1991թ. ծնված Ահարոն Արմենի Հայրապետյանը: Դեպքից անմիջապես հետո վիրավորը տեղափոխվել էր զինվորական հոսպիտալ, որտեղ ժամը 18:59-ին մահացել է:

Այնուհետև այս վարկածը հերքվել էր, քանի որ Ահարոնին սպանության կասկածանքով ձերբակալվել էր նրա ընկեր Աշոտը:
Վերջինը, ըստ փաստաբանի, սկզբնական ցուցմունքում ընդունել է մեղքը և իր նշել, որ իր կողմից արձակված անզգույշ կրակոցով մահ է պատճառել իր ծառայակցին, սակայն որոշ ժամանակ անց հրաժարվել այդ ցուցմունքից: «Նա բողոք-դիմում էր ներկայացրել, որ այդ ցուցմունքները կորզվել են իրենից ծեծի ազդեցության տակ», -փոխանցեց փաստաբան Ոսկանյանը: Նա նաև ասաց, որ Աշոտ Կոստանդելյանը դեպքից 14 օր անց է ներկայացվել դատարան կալանքի, իսկ մինչ այդ նա գտնվել է Ստեփանակերտի ռազմական մեկուսարանում, որտեղ էլ նրա հայտարարության համաձայն, նրա նկատմամբ կիրառվել է ծեծ ու բռնություն: Այժմ Կոստանդելյանը Շուշիի բանտում է:

Ստեփան Ոսկանյանն ասաց, որ դրանից հետո շուրջ 4 ամիս Կոստանդելյանը երկու անգամ պնդել է նույն ցուցմունքները այն մասին, որ ինքը մեղավոր չէ իր զինակից ընկերոջն սպանելու գործում: Սակայն հետագայում կտրուկ փոխել ցուցմունքը:

«Իմ վերջին այցելության ընթացքում, երբ պնդում էր, որ որևէ առնչություն չունի կատարված հանցագործության հետ, դրանից հետո հաջորդ այցելությունը կատարում ենք Աշոտի ծնողների հետ միասին: Իմ առանձնատեսակցությունից հետո Աշոտի մոտ են մտնում ծնողները ու դուրս գալուց հետո նրանք հայտնում, որ Աշոտը տարբեր ձևերով փորձում էր հասկացնել, որ ինքը որևէ կապ չունի այս սպնության հետ ու ստիպված է ցուցմունք տվել: Նույն օրը փորձում եմ մեկ անգամ էլ մտնել Աշոտ Կոստանդելյանի մոտ, սակայն ինձ չեն թույլատրում` պատճառաբանելով, որ պահանջագիրը, որի հիման վրա պետք է ներս մտենմ, չունի կնիք: Միայն Շուշիի բանտում պարզեցի, որ պահանջագրի վրա պիտի լինի փաստաբանի կնիքը»,- ներկայացրեց փաստաբանը:
Փաստաբանն ասաց, որ իր պաշտպանյալի հետ տեսակցել հաջողվել է հաջորդ օրը` պահանջված կնիքով փաստաթղթերը ներկայացնելուց հետո և Կոստանդելյանից իմացել, որ վախի ազդեցության տակ է նա ստիպված եղել ցուցմունքները փոխել:

«Նա ինձ պատմեց, որ Շուշիի բանտում վտանգված է իր անվտանգությունը, իրեն սպառնում են կոնկրետ անձինք` Շուշիի բանտի աշխատակիցները, որոնց ազդեցության տակ ինքը փոխել է իր ցուցմունքները», -Կոստանդելյանի հետ հանդիպման մանրամասները փոխանցեց փաստաբան Ոսկանյանը` ընդգծելով, որ «քննչական բաժնի պետն իր լծակներն օգտագործելով` հոգեբանական ու չեմ բացառում ֆիզիկական ազդեցությամբ ստիպել են, որ Աշոտը նորից պնդի իր սկզբնական խոստովանական ցումունքը»:

Փաստաբանի ներկայացմամբ, այդ պահին, երբ դեպքը տեղի է ունեցել, այլ զինվորներ մոտակայքում չեն եղել, իսկ Աշոտ Կոստանդելյանն էլ գտնվել է հենց Ահարոն Հայրապետյանի կողքին: «Ներկայումս Աշոտ Կոստանդելյանը պնդում է, որ ինքը կապ չունի այդ մեղադրանքի հետ և չի կարող ասել, թե ում կողմից արձակվող կրակոցից է եղել, որովհետև կրակոցը եղել է նրա թիկունքում», -հավելեց Ոսկանյանը:

Նշենք, որ քրեական գործը մեղադրական եզրակացությամբ ուղարկվել է Սյունիքի մարզի ընդհանուր իրավասության դատարան և հավանաբար մինչև նոյեմբերի վերջ տեղի կունենա առաջին դատական նիստը: