Ձեր վստահելի աղբյուրը

Այսօր Ալեքսանդր Սպենդիարյանի անվան օպերայի և բալետի ազգային ակադեմիական թատրոնում՝ ժամը 12:00-14:00-ը տեղի է ունենալու տաղանդավոր կոմպոզիտոր Ալեքսանդր Հարությունյանի վերջին հրաժեշտը: Հուղարկավորությունը՝ Երևանի Կոմիտասի անվան այգու պանթեոնում:
Հիշեցնենք, որ հայտնի կոմպոզիտորը մահացել է մարտի 28-ին: Ալեքսանդր Հարությունյանի մահվան կապակցությամբ, ստեղծվել է կառավարական հանձնաժողով` ՀՀ վարչապետ Տիգրան Սարգսյանի գլխավորությամբ:

Նշանավոր հայ կոմպոզիտորը ծնվել է 1920 թվականին՝ Երևանում: Ալեքսանդր Հարությունյանը երաժշտական աշխարհ մուտք է գործել Ալեքսանդր Սպենդիարյանի օրհնությամբ: Նա ստացել է իր երաժշտական կրթությունը Երևանի Կոմիտասի անվան կոնսերվատորիայում, այնուհետև՝ 1946-48 թթ. կատարելագործվեց Մոսկվայի կոնսերվատորիայում՝ պրոֆեսոր Լիտինսկու կոմպոզիցիայի դասարանում: 37 տարի անընդմեջ եղել է Հայֆիլհարմոնիայի գեղարվեստական ղեկավար, միաժամանակ՝ որպես պրոֆեսոր՝ դասավանդելով կոմպոզիցիա Երևանի Կոմիտասի անվան կոնսերվատորիայում և կրթելով բարձր պրոֆեսիոնալ երաժիշտներ:

25 տարեկան հասակում նրա «Կանտատ Հայրենիքի մասին» ստեղծագործությունը արժանացել է Խորհրդային երկրի բարձրագույն պարգևի՝ Ստալինյան առաջին կարգի մրցանակի:

Ալեքսանդր Հարությունյանի երաժշտությունը բազմաժանր է:Նա թողել է հսկայական ժառանգություն՝ շուրջ 250 ստեղծագործություն: Համաշխարհային ճանաչում ունեն 13 կոնցերտները` գրված տարբեր գործիքների համար: Կոմպոզիտորի շեփորի և նվագախմբի համար թիվ 1 և 2 կոնցերտները, ջութակի ու նվագախմբի համար կոնցերտը գրանցվել են համաշխարհային երաժշտական արվեստի ոսկե ֆոնդում:

Ալեքսանդր Հարությունյանի հարուստ ժառանգության մասն են կազմում «Սայաթ-Նովա» օպերան, «Տոնական նախերգանքը», «Ասք հայ ժողովրդի մասին» վոկալ-սիմֆոնիկ պոեմը: Նա հեղինակ է խմբերգային, հոգևոր գործերի, նաև երաժշտություն է գրել կինոֆիլմերի համար:

Ալեքսանդր Հարությունյանի գործերը կատարել են Եվգենի Մռավինսկին,Վալերի Գերգիևը, Մստիսլավ Ռոստրոպովիչը, Գենադի Ռոժդենստվենսկին, Լորեն Մազելը, Օհան Դուրյանը, Սեյջի Օզաուան և համաշխարհային մեծության մենակատարները՝ Դոկշիցերը, Գրուբերտը, Նակարիակովը, Սանդովալը, Հայկազ Մեսյանը, Ռուբեն Ահարոնյանը, Սերգեյ Խաչատրյանը և այլք: Նրա ստեղծագործությունները հրատարակել են աշխարհի լավագույն հրատարակչությունները:

Ալ. Հարությունյանն արժանացել է ԽՍՀՄ, ՀԽՍՀ Պետական, ՀԽՍՀ մշակույթի նախարարության Արամ Խաչատրյանի անվան մրցանակների, Ալեքսանդր Ալեքսանդրովի անվան Ոսկե մեդալի, ԱՄՆ «Օրփեոս» մրցանակի, Սբ Մեսրոպ Մաշտոցի և Հայ եկեղեցու Սբ Սահակ -Սբ Մեսրոպի շքանշանների, Մովսես Խորենացու մեդալի, Հայաստանի Հանրապետության նախագահի պատվո շքանշանի: