Նոր մանրամասներ ոտքերը մեխած Գրիգորից. Այսօր նա կդիմի սոցնախարարություն (տեսանյութով)
Մի քանի օր առաջ` մայիսի 3-ին Հանրապետության հրապարակի հարևանությամբ երկու ոտքերը փայտե կտորներին մեխած Գրիգոր Շագոյանին դեռ ոստիկանությունը անձնագիր չի տրամադրել: Ասում է` կանչել են մյուս շաբաթ` երեքշաբթի օրը:
Իսկ մինչ այդ երկու անգամ այցելել է «Հերացի» հիվանդանոցային համալիր, ոտքերի վերքերը մշակել են, հակափայտեցման շիճուկ ներարկել: Քաղաքացու հետ կապի մեջ է լինում Մարդու իրավունքների պաշտպանի ներկայացուցիչը` Սերգեյ Հարությունյանը: Սակայն քաղաքացին հրաժարվում է ՄԻՊ գրասենյակ այցելել ու դիմում գրել:
«Ասում են, անձնագրի պահով կօգնեք, դե դա ոստիկանությունն ասել է, կանենք»,-արդարանում է Շագոյանը: ՄԻՊ ներկայացուցիչ Սերգեյ Հարությունյանն էլ մեզ հետ զրույցում ասաց, թե քաղաքացին առողջական խնդիրներ ունի, կօգնեն բուժզննում անցնել, անհրաժեշտության դեպքում նաև բուժում ստանալ:
51 տարեկան այս մարդը կյանքի մեծ մասը` 30 տարի 8 ամիսը անցկացրել է անազատության մեջ, դատապարտվել է 6 անգամ, գողության համար: Հիմա գիշերները Հրազդանի ձորում է քնում, ցերակվա ժամերին քաղաքապետարանի շուրջ գտնվող այգիների նստարաններին է նստում, սնունդն էլ հիմնականում բերում են իր հետ պատիժը կրած, հիմա ազատության մեջ գտնվող նախկին ընկերները:
Ասում է, հիմա էլ կարող է գողություն անել, բանտում հայտնվել, որտեղ տանիք ու կերակուր կա, բայց չի ուզում, հոգնել է այդ կյանքից: «Սոված մարդն ամեն ինչի էլ ընդունակ է, հիմա ինձ դրդում են, գնամ նորից գողություն անեմ, նստեմ: Ես չեմ ուզում նստեմ:… Ձորերում եմ քնում: Ինչի՞ց վախանեմ, ես մենակ աստծուց եմ վախում: Ինչի՞ց վախենամ, մի անգամ ծնվել ենք, մի անգամ էլ պիտի մահանանք»,-ասում է Գ. Շագոյանը, ով քրեակատարողական հիմնարկում ինսուլտ է տարել, աջ կողքը անընդհատ թմրած է, շինարարական որևէ աշխատանք չի կարող անել, ուրիշ աշխատանք էլ հազիվ թե գտնի:
Հուսահատված այս մարդը ցանկանում է գնալ Հայաստանից, մտածում է, որևէ տեղ որևէ ընկեր կգտնի, մի բան կանի, գլուխը կպահի: «Ես դեռ խոսում եմ: Մի օր կսկսեմ էլ չխոսալ, բերանս կկարեմ, մի պապիրոսի տեղ կթողնեմ ու վերջ»,-հետագա հնարավոր քայլերն է մտմտում նա:
Հիշեցնենք, որ վերջին անգամ խաբեբայության համար 7 տարով ազատազրկված Գ. Շագոյանը բանտից ազտավելուց հետո ապրելու որևէ տեղ չունի, հարազատներ էլ չունի: Մայրը մահացել է, եղբայրն էլ, մինչ այդ վաճառել է տունը:
Շագոյանն այնքան էլ լավ չի պատկերացնում, որ հարցով որ գերատեսչությանը դիմի: Այսօր Panorama.am-ի աշխատակիցները նրան ուղղորդեցին աշխատանքի և սոցիալական հարցերի նախարարություն: Ոտքերը ցավում են, դանդաղ քայլերով հասանք նախարարություն 12:45-ին: Ասեցին, գնում են ընդմիջման, քաղաքացուն կարող են ընդունել ու թողնել վերև բարձանալ միայն ընդմիջումից հետո` ժամը 14-ին: Շագոյանը խոստացավ այդ ժամին լինել նախարարությունում` գոնե ժամանակավոր կացարանով իրեն ապահովելու վերաբերյալ դիմում գրել:
ՄԻՊ-ից խոստացան, որ հետևողական կլինեն քաղաքացու խնդրին:
Նախորդող հրապարակումներ`
Հրապարակի հարևանությամբ քաղաքացին սեփական ձեռքերով մեխել է ոտքերը
Ոտքերը մեխած քաղաքացու գտնվելու վայրն անհայտ է