Ձեր վստահելի աղբյուրը

Տարածաշրջանային այցից անմիջապես հետո ԵԱՀԿ ՄԽ համանախագահները հանդես եկան հայտարարությամբ, որում մասնավորապես նշվում է. «Համանախագահներն իրենց մտահոգություն են հայտնել շփման գծի երկայնքով վերջին միջադեպերի առնչությամբ և կոչ արել կողմերին զսպվածություն ցուցաբերել ու զերծ մնալ պատասխան գործողություններից»: Հաշվի առնելով այն փաստը, որ հայկական կողմը բազմիցս նշել է, որ ադրբեջանական սադրանքներն անպատասխան չեն մնալու՝ իրավիճակի վերաբերյալ Panorama.am-ը զրուցեց ռազմական փորձագետ Հրաչյա Պետրոսյանցի հետ:

-Ինչպե՞ս կմեկնաբանեք համանախագահների հայտարարությունը:

Առաջին դեպքը չէ, որ համանախագահները նման անորոշ հայտարարություններ են անում: Չնայած այն հանգամանքին, որ սադրանքներն ու դրանից բխող մարդկային կորուստները մեծանում են, սակայն համանախագահներն այդպես էլ ադեկվատ քայլերի չեն գնում:

Մի քանի շաբաթ առաջ հայկական բնակավայրերի ուղղությամբ ինտենսիվ կրակահերթեր գրանցվեցին, ադրբեջանական դիվերսիոն խումբը հարձակում իրականացրեց քաղաքացիական ավտոմեքենայի վրա, ինչի արդյունքում երեք մարդ սպանվեց ու այդքանից հետո խոսել ադեկվատ գործողությունից զերծ մնալու մասին ուղղակի անհեթեթ է հնչում: Այսինքն՝ համանախագահները կոչ են անում հայկական կողմին զերծ մնալ պաշտպանվելո՞ւց:

Ու սա այն դեպքում, որ անընդհատ նոր բացահայտումներ են լինում այն մասին, որ տարիներ շարունակ Ադրբեջանի իշխանությունները համագոծակցել են տարբեր ահաբեկչական կազմակերպությունների հետ: Իսկ Ադրբեջանի կողմից վերջին շրջանում իրականացրած գործողությունը բացահայտ ահաբեկչություն էր, քանի որ այն իրականացվել է քաղաքացիական համարներով ավտոմեքենայի վրա:

-Պարոն Պետրոսյանց, եթե հայկական կողմն ընդունի համանախագահների կոչը ու անպատասխան թողի ադրբեջանական կողմի դիվերսիոն գործողությունները, այդ դեպքում ի՞նչ զարգացումներ եք ակնկալում:

-Եթե հայկական կողմն Ադրբեջանին համարժեք պատասխան չհասցնի, ապա ադրբեջանցիներն առավել ագրեսիվ կդառնան, ինչն անկասկած աննախադեպ կորուստների կհանգեցնի, էլ չեմ ասում, որ պատերազմի վերսկսումն անխուսափելի կդառնա:

-Այդ դեպքում ո՞րն է ճանապարհը:

-Ճանապարհը միակն է՝ միջազգային հանրությունն ի դեմս ԵԱՀԿ ՄԽ համանախագահների պետք է իր հայտարարություններով ու քայլերով կանխարգելի ադրբեջանական ագրեսիան: Ոչ թե հայկական կողմին հանդարտության կամ ադրբեջանական ագրեսիան չպատասխանելու կոչ անի, այլ ամեն գնով կանխի ադրբեջանական կողմից իրականացվող ահաբեկչությունը: Մեկ բան ակհայտ է. համանախագահների շեշտադրումները պետք է փոխվեն: