«Իմ Հայաստան» համահայկական փառատոնի «Պարարվեստի օրերը» ավարտվեցին
Գ.Սունդուկյանի անվան թատրոնի շենքում նախօրեին կայացել է ՀՀ սփյուռքի նախարարության նախաձեռնությամբ իրականացվող «Իմ Հայաստան» համահայկական փառատոնի «Պարարվեստի օրերի» ավարտին նվիրված միջոցառում:
Նախարարության մամուլի ծառայության հաղորդմամբ, միջոցառման ընթացքում սփյուռքյան պարախմբերը հանդես են եկել մեկական հրաժեշտի համարներով:
ՀՀ սփյուռքի նախարար Հ.Հակոբյանը, շնորհակալություն հայտնելով փառատոնի հովանավորներին և աջակիցներին, նշել է. «Գ.Սունդուկյանի թատրոնի պատմության մեջ երևի չի եղել այսպիսի մի երեկո, որ դահլիճը և բեմը հավասար թվով մարդիկ ընդգրկեին: Հայրենիքի կանչով այստեղ են եկել շուրջ 1300 Սփյուռքի պատանիներ և երիտասարդներ և 10 օր շարունակ Հայաստանում, Արցախում և մեր հեռուստատեսության ու լրատվամիջոցների շնորհիվ նաև Սփյուռքում թնդում է հայ երգն ու պարը: Մենք խոնարհվում ենք այս երիտասարդների առաջ, որովհետև նրանք աշխարհի տարբեր երկրներում, տարբեր մշակույթների և լեզուների ազդեցության տակ այսօր հայ են մնացել ու մշտարթուն են պահում հայի ոգին»:
Նախարար Հ.Հակոբյանը Սփյուռքից ժամանած պարախմբերին հանձնել է փառատոնի մասնակցության հավաստագրեր և հուշանվերներ:
Լրահոս
Տեսանյութեր
Հայաստանում շատ են աշխատում, քիչ վճարվում. Աշխատանքի օրը՝ աշխատավորների խնդիրների մասին