Ձեր վստահելի աղբյուրը

«Ես դեմ եմ նրան, որ ասում են` սերիալներ չպետք է լինեն, ի վերջո ամեն ինչում էլ կան և թերություններ, և առավելություններ»,- այսօր լրագրողների հետ հանդիպման ժամանակ ասաց Գ.Սունդուկյանի անվան ազգային ակադեմիական թատրոնի դերասանուհի Ծովինար Մարտիրոսյանը:

Նրա խոսքերով` մոտ 5-6 տարի է, ինչ Հայաստանում սերիալներ են նկարահանվում, և դա շատ լավ է, քանի որ սերիալները հնարավորություն են տալիս, որպեսզի դերասանն անընդհատ լինի աշխատանքային պրոցեսի մեջ: «Ես չեմ ուզում այն համեմատել թատրոնի հետ, քանի որ այն ուրիշ աշխարհ է, բայց սերիալները, իմ կարծիքով, պետք է լինեն, այլ հարց է, թե ինչ որակի են դրանք»,- նկատեց Ծ.Մարտիրոսյանը:

Դերասան Նարեկ Հայկազյանն էլ նշեց, որ սերիալները նկարահանվում են մեծահասակների համար, այլ ոչ թե երեխաների, և պետք չէ ամեն անգամ ասել, թե սերիալները երեխաների մեջ միայն վատն են սերմանում: «Նախ ինչո՞ւ են երեխաները նայում այդ սերիալները, ծնողներն են մեղավոր, որ երեխաները դիտում են այդ սերիալները: Թող իրենց երեխաներին ստիպեն, որ գիրք կարդան, խաղ խաղան»,- նշեց նա:

Ծ.Մարտիրոսյանն էլ ասաց, որ սերիալները նախատեսված են միջին խավի, տնային տնտեսուհիների` «բիգուդիները գլխին» կանանց համար: «Աշխատող մարդը սերիալ չի նայի, երիտասարդ աղջիկը չպետք է սերիալ նայի, քանի որ նա դեռ պետք է սովորի»,- ընդգծեց նա:

Ն.Հայկազյանը նշեց, որ ինքը ևս տեսնում է սերիալներում առկա թերությունները, սակայն վստահ է, որ աստիճանաբար դրանք ավելի որակյալ կդառնան: Ըստ նրա` սերիալները հասարակության շրջանում մեծ պահանջարկ ունեն, եթե չունենային, բնականաբար, չէին նկարահանվի. «Եթե չնայեն, ապա դրանք կփակվեն»:

Ինչ վերաբերում է սերիալների սցենարներին, ապա դերասանները նշեցին, որ դա իրենց խնդիրը չէ, իրենք դերասաններ են և փորձում են պրոֆեսիոնալ ներկայանալ սերիալներում: «Եթե յուրաքանչյուր դերասան իր գործին մոտենա պրոֆեսիոնալ և բարեխղճորեն, ապա ամեն ինչ շատ ավելի լավ կլինի»,- ընդգծեց Ն.Հայկազյանը` հավելելով, որ իր ցանկությունն է, որպեսզի սերիալներում ընդգրկվեն միայն պրոֆեսիոնալ դերասաններ:

Ինչ վերաբերում է թատրոնին, ապա Ծ.Մարտիրոսյանը նշեց, որ թատրոնն իր համար ճահիճ է, քանի որ այնտեղ մխրճվում ես և չես ցանկանում այնտեղից դուրս գալ: «Թատրոնում դու ստանում ես հոգևոր սնունդ, իսկ սերիալում` ոչ»,- ասաց նա:

Ն.Հայկազյանն էլ նշեց, որ սերիալի միջոցով դերասանները հնարավորություն են ունենում լավ վարձատրել և ապահովել իրենց ընտանիքների բարեկեցիկ կյանքը: Ըստ նրա` եթե ինքը սերիալներում չխաղա, ապա չի կարող ընտանիք պահել, կոմունալ վճարները մուծել, սնվել, մեկ-մեկ էլ հոգուստ գնել: « Թատրոնի աշխատավարձով մենք չենք կարող ապրել, բնականաբար սերիալն է օգնում, որ կարողանանք ընտանիք պահել»,- նշեց նա: