Մարվեց Ավրորա Մարդիգանյանին նվիրված նամականիշը
Այսօր` Մեծ եղեռնի 100-ամյակին ընդառաջ մարվել և շրջանառության մեջ է դրվել «Ավրորա Մարդիգանյան» 1 նամականիշով գեղաթերթիկը:
«Հայփոստ» ընկերության մամուլի ծառայության հաղորդմամբ, նամականիշի մարումն իրականացրել են ՀՀ տրանսպորտի և կապի փոխնախարար Անդրանիկ Ալեքսանյանը, Հայփոստ Թրասթ Մենեջմենթի գլխավոր տնօրեն Խուան Պաբլո Գեչիջյանը, Հայփոստ ՓԲԸ գլխավոր գործադիր տնօրենի պաշտոնակատար Հայկ Ավագյանը, Հայաստանի ֆիլատելիստների միության նախագահ Հովիկ Մուսայելյանը, Հայոց ցեղասպանության ինստիտուտ թանգարանի տնօրեն Հայկ Դեմոյանը:
1918թ. Նյու Յորքում անգլերեն լեզվով լույս է տեսավ Հայոց ցեղասպանության ականատեսի առաջին փաստավավերագրական հուշագրություններից մեկը` «Հոշոտված Հայաստան» խորագրով, ուր հեղինակը` ցեղասպանությունը վերապրած չմշկածագցի Արշալույս (Ավրորա) Մարտիկանյանը, պատմում է աքսորի ճանապարհի իր սարսափները: Կորցնելով ծնողներին, քույրերին ու երեք եղբայրներին, որոնք գազանաբար սպանվեցին իր աչքերի առջև, 14-ամյա Արշալույսը տարագրության ընթացքում խոշտանգվել ու պատվազրկվել է թուրք և քուրդ պաշտոնյաների ու ցեղապետերի հարեմներում. նա պատմում է իր տեսած արյան խրախճանքների ու մարդկային պատկերացումից դուրս դաժանությունների մասին: Արշալույս Մարտիկանյանը` հայկական Ժաննա դԱրկը, ինչպես նրան անվանեցին ԱՄՆ-ում, կրելով երկու տարվա մղձավանջային սարսափները, հավատափոխ չեղավ և փախչելով թուրք Քեմալ էֆենդիի հարեմից, երկար թափառումներից հետո 1917թ. գարնան սկզբներին հասավ Էրզրում, այնտեղից անցավ Պետերբուրգ, ապա և` ԱՄՆ, Նյու Յորք, ուր և բնակություն հաստատեց:
«Հոշոտված Հայաստան» գիրքն արդեն պատրաստ էր, երբ 1918թ. Կալիֆորնիայում, ամերիկյան Մետրո Գոլդվին Մեյեր կինոընկերությունում ռեժիսոր Օսկար Ափֆելը նկարահանեց «Հոգիների աճուրդ» համր ֆիլմը, որը Մեծ եղեռնի մասին պատմող առաջին գեղարվեստական կինոնկարն էր: Ֆիլմն առանձնահատուկ է նրանով, որ սցենարի հեղինակն ու գլխավոր դերակատարը հենց ինքը` Արշալույս Մարտիկանյանն է, ով նաև մեծապես աջակցել է ինչպես դերասանների հագուստների և կերպարների ստեղծման, այնպես էլ տեսարանների ճշգրիտ վերարտադրման աշխատանքներին:
Ցեղասպանության 100-ամյակը. Ավրորա Մարդիգանյան (1901-1994)
Տեխնիկական տվյալներ
Թողարկման օրը` 24 սեպտեմբերի 2013թ.
Դիզայնը` Դավիթ Դովլաթյան, Վահագն Մկրտչյան
Տպարանը`Cartor, Ֆրանսիա
Անվանագինը` 480 ՀՀ դրամ
Տպաքանակը` 20 000
Գեղաթերթիկում պատկերված է ԱՄՆ-ում 1918թթ. նկարահանված և 1919 թվականին ԱՄՆ-ում առաջին անգամ ցուցադրված «Հոշոտված Հայաստան» գեղարվեստական ֆիլմի աֆիշը, ինչպես նաև՝ ցեղասպանությունից մազապուրծ եղած փախստականների նկարներ:
Նախորդող հրապարակում`
«Ամերիա»-ն հովանավորել է Ցեղասպանության մասին երկու գրքերի հրատարակումը. Դրանք հանձնվեցին ընթերցողի դատին
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ
