Ձեր վստահելի աղբյուրը

«ՀԱՊԿ-ում զգացվում է տեղեկատվության հանրայնացման պակաս, այսինքն մարդիկ անում են կարևոր գործ, սակայն դրա մասին շատ քչերը գիտեն»,-այսօր Երևան-Մոսկվա տեսակամրջի ընթացքում ներկայացնելով «ՀԱՊԿ-ի և Եվրասիայի անվտանգությունը» թեմայով զեկույցը ասաց «Խելամիտ ինտերնետ» հիմնադրամի գլխավոր տնօրեն Վլադիմիր Մամոնտովը:

Նա նշեց, որ ՀԱՊԿ-ը անվտանգության երաշխիք է և երաշիք է երկրների համատեղ անվտանգության ապահովման համար:
«Այս զեկույցը ՀԱՊԿ-ի գործունեության վերաբերյալ շատ կարևոր է և հանրությանն է ներկայացնելու այս կազմակերպության գործունեությունը»,-ասաց Մամոնտովը:

Իր հերթին, Մոսկվայի տաղավարի մեկ այլ հյուր` Կասպիական համագործակցության ինստիտուտի գլխավոր տնօրեն Սերգեյ Միխեևը նշեց, որ ՀԱՊԿ-ը պետք է մեծ ուշադրություն դարձնի նաև տեղեկատվական հոսքերի մոնիթորինգին և վերլուծությանը, քանի որ ապատեղեկատվությունը կարող է իր բացասական ազդեցությունը ունենալ ՀԱՊԿ-ի անդամ-երկրների անվտանգության վրա:

«Պետք է ուշադրություն դարձնել նաև ՀԱՊԿ-ի անդամ երկրների հումանիտար համագործակցությունը և վերլուծական կենտրոնների միջև շփումներին»,-ասաց Միխեևը:

Նրա խոսքերով, ՀԱՊԿ-ն շատ հաճախ փորձում են ներկայացնել որպես Ռուսաստանի քմահաճույքով ստեղծված կազմակերպություն և որ Մոսկվան ցանկանում է վերականգնել ԽՍՀՄ-ը:

«Թուրքիայի ներգրավվածությունը սիրիական հակամարտության մեջ սպառնալիք է ողջ Հարավային Կովկասի վրա, այդ թվում Հայաստանի: ՀԱՊԿ-ն պետք է վերլուծի և հետևի Սիրիայի շուրջ ստեղծված իրավիճակին»,-ասաց Ս. Միխեևը:

Տեսակամրջի երևանյան տաղավարի մասնակից, «Նորավանք» գիտակրթական հիմնադրամի տնօրեն Գագիկ Հարությունյանը նշեց, որ այս պահին աշխարհում պայքար է գնում է ոչ թե նյութական ռեսուրսների, այլ մարդկանց հոգիների համար և փորձ է կատարվում տարբեր արժեքային կոդեր մտցնել հասարակությունների մտածելակերպի մեջ:
«Ծայրահեղականության դեմ պայքարը շատ արդիական է ՀԱՊԿ-ի անդամ բոլոր պետությունների համար, այդ թվում Հայաստանի»,-ասաց Գ. Հարությունյանը:

Ըստ նրա, պետք է սերտացնել ՀԱՊԿ-ի անդամ-երկրների միջև կապերը և լուծել այն խնդիրներիը, որոնք առկա են այդ երկրների միջև: