Մ. Մինասյան. Մաքսային միությանը միանալը բխում է Հայաստանի ազգային անվտանգության շահերից
«Նախագահի որոշումը բխում է մեր պետության ու հայրենիքի շահերից, և ավելի կարևոր բան, քան ազգային անվտանգությունն է, գոյություն չունի` առավել ևս, երբ մեր երկիրը գտնվում է ոխերիմ հարևանների շրջապատում: Կարծում եմ, որ եվրոպական իշխանավորներն այնքան լայնախոհ կլինեն և կընկալեն, որ աշխարհում գոյություն ունի ոչ միայն արևմտյան, այլև արևելյան քաղաքակրթություն, որոնք ոչ թե պետք է հակադրման, այլ համադրման ճանապարհով զարգանան»,- այսօր լրագրողների հետ զրույցում անդրադառնալով Մաքսային միությանը Հայաստանի միանալու որոշմանը, նշեց ԱԺ ՀՀԿ խմբակցության պատգամավոր Մկրտիչ Մինասյանը:
Նրա խոսքով, Արևելյան գործընկերության երկրների Վիլնյուսյան գագաթաժողովի ընթացքում հավանաբար որոշակի վերապահումներով փաստաթուղթ կընդունվի ԵՄ-ի ու Հայաստանի միջև, որով Հայաստանը հնարավորություն կունենա մասնակցել քաղաքական գործընթացներին: Պատգամավորի խոսքով, այդ վերապահումները կվերաբերեն բոլոր այն կետերին, որոնք կարող են հակասության մեջ մտնել Մաքսային միության հետ:
Պատգամավորն ասաց, որ Մաքսային միությանը միանալու որոշման հետ կապված ԱԺ-ում կընդունվեն նոր օրենքներ, որը թույլ կտա հայրենական արտադրողներին օգտվել Մաքսային միության մեծ շուկայի հնարավորություններից, ինչն, ըստ նրա, վկայում է, որ այդ որոշումն արդարացված է նաև տնտեսապես:
«Գաղտնիք չէ, որ մենք ռազմավարական գործընկեր ենք Ռուսաստանի հետ, և հստակ պիտի գիտակցենք` թե մենք, թե ռուսները, որ Հայաստանի հետ ռազմավարական գործընկերությունը որքան ձեռնտու է Հայաստանին, նույնքան էլ Ռուսաստանին: Ռուսաստանը ևս մեծ շահեր ունի Կովկասում: Սա երկկողամի շահեկան փոխհարաբերություն է»,- համոզմունք հայտնեց բանախոսը:
Անդրադառնալով Մաքսային միությանը միանալու հարցում ընդհանուր սահմանի բացակայության խնդրի և այդ առումով Վրաստանի հնարավոր քաղաքականության վերաբերյալ մեր հարցին` պատգամավորը վստահեցրեց, որ այդ իմաստով քաղաքական խնդիրը լուծված է:
«Աբխազիայի երկաթգծի վերաբացման քաղաքական լուծում արդեն կա. Ռուսաստանը համաձայն է, Վրաստանը վերջապես համաձայնվեց, Աբխազիան նույնպես կարծես ռուսների հորդորով համաձայնվել է»,- նշեց Մ. Մինասյանը:
Մեր ճշտող հարցին, թե Վրաստանը ե՞րբ է տվել այդ համաձայնությունը, նա պատասխանեց, որ այդ մասին հայտարարել է Վրաստանի վարչապետ Բիձինա Իվանիշվիլին:
«Վրաստանում շուտով կընտրեն նոր նախագահ, ամենայն հավանականությամբ Սաակաշվիլու իշխանությունը կվերանա, և Իվանիշվիլին կկարողանա ամբողջությամբ վարել իր քաղաքականությունը: Մեր խնդիրն է ամենից ակտիվը լինել, որ Աբխազական երկաթգիծը սկսի աշխատել և Վրաստանի տարածքով անմիջական կապ ունենանք Ռուսաստանի հետ: Իվանիշվիլին հայտարարել է, որ Մաքսային միությանը Վրաստանի միանալու հարց դեռ չի բարձրացվել, եթե բարձրացվի, ապա պատրաստ են քննարկել»,- նշեց Մկրտիչ Մինասյանը:
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ