Սոլիկամսկի հայ ճարտարապետի սպանության մեջ մեղադրվում է հատուկ ծառայությունների ազգությամբ ադրբեջանցի նախկին աշխատակիցը
«Պերմսկի շրջանի իրավապահ մարմինները գտել են 2010թ. իր տան մուտքում սպանված, Սոլիկամսկի գլխավոր ճարտարապետ Օլգա Կարապետյանի սպանության մեղադրյալին: Աղբյուրները հաղորդում են, որ այդ հանցագործությունը կատարել է ադրբեջանական հատուկ ծառայությունների նախկին մարտիկ Ազար Աքբարովը, ով արդեն իսկ պատիժ է կրում սպանության և զենքի անօրինական պահպանման համար», - նշված է ռուսական «Коммерсант-Пермь» թերթում հրապարակված հոդվածում: Ըստ հոդվածի` Աքբարովը ներգրավված է նաև հայ գործարարի սպանության մեջ:
Հեղինակը հայտնում է, որ Օլգա Կարապետյանի սպանության գործով ևս մեկ մեղադրյալ կա, իսկ Ազար Աքբարովն ընդունել է իր մեղքը:
«Ամենաաղմկահարույց սպանություններից մեկի` 2010թ. կատարված Սոլիկամսկի գլխավոր ճարտարապետ Օլգա Կարապետյանի սպանության հետաքննությունը մոտ է ավարտին: Իրադրությանը ծանոթ աղբյուրները հայտնել են, որ մոտակա շրջանում Պերսկի մարզի հետաքննական հանձնաժողովի քննիչները կսկսեն ծանոթանալ ադրբեջանական բանակի հատուկ ծառայության նախկին մարտիկ Ազար Աքբարովի և մեկ այլ մեղադրյալի քրեական գործի նյութերին, վերջինիս անունը «Коммерсант»-ի զրուցակիցները չեն կարող հայտնել: Իրենց տվյալների համաձայն` նա սպանության հանցակից է հանդիսանում», - նշված է հոդվածում:
Հոդվածում նշվում է, որ Օլգա Կարապետյանը սպանվել է 2010թ. մարտի 18-ին: Անհայտ հանցագործը Կարապետյանին կրակել է իր տան աստիճանավանդակի վրա: Հարուցվել է քրեական գործ, սակայն թարմ հետքերով չի հաջողվել բերման ենթարկել հանցագործին: Չնայած այդ տանը բնակվում էին քաղաքային դատախազի երկու տեղակալներ, պետավտոտեսչության պետ և քաղաքապետարանի աշխատակիցներ, այնտեղ անվտանգության տեսախցիկներ չեն եղել։ Դեպքի վայրի քննության և հնարավոր վկաների հարցաքննման ընթացքում հաստատվել է, որ հանցագործը սպասել է Օլգա Կարապետյանին առաջին և երկրորդ հարկի միջև գտնվող տարածքում։ Կնոջը տեսնելով` հանցագործը 16-րդ կալիբրի խոշոր մանրագնդակային հրացանով կրակել է նրա ստամոքսին:
Ծառայողական մեքենայի վարորդը, ով մուտքի մոտ սպասել է Օլգա Կարապետյանին, չի նկատել, որ բացի երեխաներից ինչ-որ մեկը դուրս եկած լինի մուտքից։ Հարևանների մեծամասնությունը չի լսել ոչ կրակոցի ձայն, ոչ աղմուկ։ Օպերատիվ խումբը զննել է ինը հարկանի շենքի նկուղը և վերնահարկը, սակայն հանցագործի հետքեր չեն հայտնաբերվել։
Օլգա Կարապետյանը նշանակվել է Սոլիկամսկ քաղաքի գլխավոր ճարտարապետ 2007 թ. փետրվարին։ 2009 թ. հուլիսին Օլգա Կարապետյանի ակտիվ մասնակցությամբ հաստատվել է Սոլիկամսկ քաղաքի գլխավոր նախագիծը, որը նախատեսում էր ցածրահարկ շենքերի զանգվածային կառուցում քաղաքի տարածքում, այդ թվում նաև առանց թույլտվության կառուցված շենքերի ապամոնտաժման հաշվին։
Սպանության վարկածների մեջ գլխավորներից մեկը գլխավոր ճարտարապետի մասնագիտական գործունեությունն էր. կարծում էին, որ հանցանքը կարող է կապված լինել այն բանի հետ, որ նա մերժել է ճարտարապետական հուշարձանները ապամոնտաժելու կամ կառուցելու թույլտվություն տալ։ Օպերատիվ խումբը մանրակրկիտ կերպով քննել է քաղաքային օբյեկտների կառուցման բոլոր թույլտվությունները և մերժումները, որոնք տվել է Օլգա Կարապետյանը։ Հարցաքննվել են մահացածի գործընկերները, ուսումնասիրվել հեռախոսային խոսակցությունները և ծառայողական նամակագրությունը, սակայն հանցագործի կամ հանցանքը կազմակերպողի հետքը բռնել երկար ժամանակ չի հաջողվել։ Որոշ ժամանակ անց քրեական գործի հետաքննումը դադարեցվել է կապված այն բանի հետ, որ որպես մեղադրյալ անձի ինքնությունը հաստատված չէ։
Իրավապահները կարողացան ստանալ նախնական «հետքը» իրենց գործընկերներից, որոնք աշխատում էին ուղղիչ հիմնարկներից մեկում, որտեղ գտնվում էր Ա.Աքբարովը։ 2012 թ. մայիսի 31-ին նա դատապարտվել է անօրինական զենք և զինամթերք պահելու համար, իսկ 2013 թ. փետրվարի 8-ին նմանատիպ հանցանքի, ինչպես նաև սպանության և գողության համար։ 2012 թ. ձերբակալելով հանցագործին՝ օպերատիվ խումբը տեղեկատվություն էր ստացել, որ հնարավոր է՝ հանցագործություն կատարելու համար նա օգտագործել է պահված զենք։ Ավելի ուշ հաստատվել է նրա մասնակցությունը գործարար Արթուր Աբրահամյանի սպանության մեջ Պերմի շրջանում։
Իրավապահ մարմիններում այլ զրուցակիցներ ասում են, Օլգա Կարապետյանի սպանության մեջ նրա մասնակցության վարկածը ի հայտ է եկել Ազար Աքբարովի հեռախոսի տեսանյութերը նայելուց հետո։ Տեղեկացնում են, որ նրանցից մեկում տեսագրված է զենք, որը պահել է հանցագործը, և կադրի մեջ երևում է 16-րդ կալիբրի որսորդական հրացանի ծայրը։ Ինչպես հայտնում են աղբյուրները, հետաքննության ընթացքում Աքբարովը ընդունել է իր մեղքը։ Այդուհանդերձ, թերթի զրուցակիցների մի մասը հաստատում է, որ ըստ մեղադրյալի ցուցմունքի՝ նա հանցանքը կատարել է անձնական նկատառումներից ելնելով, այլ ոչ թե պատվերով։
Լրահոս
Տեսանյութեր
Ի՞նչ կա մեքենայի մեջ. Կիրանցում ծակեցին մեքենայի անվանդողերը
