Ձեր վստահելի աղբյուրը

Հայ ազգային կոնգրես կուսակցությունը հանդես է եկել հայտարարությամբ` վիճահարույց օրենքի վերաբերյալ ՍԴ կայացրած որոշման մասին:

«Հայ Ազգային Կոնգրեսը Սահմանադրական դատարանի կողմից կուտակային կենսաթոշակի մասին օրենքի պարտադիր բաղադրիչի կասեցումը գնահատում է որպես այդ խնդրով պայքարի մասնակիցների առաջին մի ձեռքբերում։ Այն հնարավոր դարձավ տվյալ խնդրով շահագրգիռ քաղաքացիների, քաղաքացիական նախաձեռնությունների և ԱԺ չորս ընդդիմադիր խմբակցությունների ջանքերի համատեղման և ներդաշնակեցման շնորհիվ։ Դա փոքր, բայց քաղաքական իմաստով նշանակալից մի նվաճում է. քաղաքական ուժերի և քաղաքացիական հասարակության համատեղ գործողություններով հասարակության համախմբումն է որևէ խնդրի լուծման ստույգ ճանապարհը։

Միաժամանակ, կասկած լինել չի կարող, որ սահմանադրական դատարանի որոշումը այլ բան չէ, քան իշխանության մարտավարական մի նահանջ՝ այն հույսով, որ առաջիկայում իր համար ավելի նպաստավոր պահի՝ հասարակական հակազդման թուլացման պայմաններում, ամբողջությամբ գործողության մեջ կդնի օրենքը։

Այսինքն՝ Սահմանադրական դատարանը օրենքի պարտադիր բաղադրիչը հակասահմանադրական կճանաչի միայն իշխանության վրա հասարակական և քաղաքական ուժերի համատեղ պայքարի հետագա ուժգնացման, հասարակական ավելի լայն շերտերի ընդգրկման պայմաններում։ Ուստիև՝ Հայ Ազգային Կոնգրեսը կոչ է անում «կուտակայինի» դեմ պայքարող բոլոր անհատներին, նախաձեռնություններին և քաղաքական ուժերին՝ բազմապատկել ճնշումը, հասարակության մյուս շերտերին՝ միանալ այս պայքարին»:

Նախորդող հրապարակումներ`

Սահմանադրական դատարանի որոշումը վիճահարույց օրենքի դրույթները կասեցնելու վերաբերյալ

ՍԴ-ն որոշել է կասեցնել վիճահարույց օրենքի կիրառումը