Ձեր վստահելի աղբյուրը

Արցախում աշխատանք է փնտրում 2872 մարդ, որոնցից 2774-ը կանայք են: Համաձայն Արցախի աշխատանքի և սոցիալական հարցերի նախարարության հրապարակած վիճակագրության, նախորդ տարվա համեմատ այդ ցուցանիշը նվազել է 382-ով:

Աշխատանք փնտրողների 89.6 %-ը կամ 2572 մարդ ստացել է գործազուրկի կարգավիճակ:

Տարեսկզբից աշխատանքի է տեղավորվել 167 մարդ, որից 143-ը` գործազուրկ: Նախորդ տարվա համեմատ այդ ցուցանիշը նվազել է 3-ով: Աշխատանքի տեղավորվածների 82.6 %-ը կանայք են: Առևտրի և հասարակական սննդի, ՆՏՄ և առաքում, մթերում ոլորտում` 16.8 %, կրթության ոլորտում` 4.2 %, պետական և տեղական ինքնակառավարման` ապարատում 2.3%, այլ ճյուղերում` 67.1%:

Գործազուրկների 1.9 %-ը 18-22 տարեկան են, 27.4%-ը` 22-30, 56.5 %-ը` 30-50, 10.5 %-ը` 50-ից բարձր տարիքային խմբին են պատկանում:

Բարձրագույն կրթություն ունեցողները կազմել են գործազուրկների ընդհանուր թվի 13.2%-ը, միջին մասնագիտական կրթություն ունեցողները` 27.8 %, մնացած մասը կամ 58.9%-ը կազմել են ընդհանուր և թերի միջնակարգ կրթություն ունեցողները:

Գործազուրկների մեջ 2.4 %-ը մանկավարժներ են, 3.5 %-ը ` բուժքույրերը, 6.4 %-ը կազմում են տնտեսագետները և հաշվապահները (հիմնականում միջին մասնագիտական կրթությամբ), 8.4 %-վաճառողներ, 3.3 %-ը` մասնագիտություն չունեցող անձինք:

Գործազուրկների մեջ չնչին տոկոս են կազմում փականագործ, էլեկտրիկ,հյուսն-ատաղձագործ մասնագիտությունների տեր մարդիկ:

Չորս հաշմանդամություն ունեցողներ օգտվում են աշխատաշուկայում անմրցունակ խմբերի աշխատավարձի փոխհատուցման ծրագրից: