Ձեր վստահելի աղբյուրը

«Հասկանում եմ տիկին Ֆետիսովայի՝ Հայաստան չժամանելու դրդապառճառները, բայց ուզում եմ դիմել հարգարժան տիկնոջը և ուկրաինական ժողովրդին՝ ասելով, որ մենք եղբայական ժողովուրդներ ենք: Այդ եղբայրության, բարեկամության մասին են վկայում հազարավոր փաստեր՝ Լվովի միջնադարյան տաճարներից սկսած մինչև այսօրվա Հայաստանում գործող ուկրաինական համայնքի ակտիվ դիրքորոշումը»,- Հայաստանի 2013 թվականի պետական մրցանակների հանձնման արարողության ժամանակ ասաց Հայաստանի նախագահ Սերժ Սարգսյանը:

Նշենք, որ կինոարվեստի ոլորտում պետական մրցանակի է արժանացել Հայաստան-Ուկրաինա-Ֆրանսիա-Վրաստան համատեղ արտադրության «Փարաջանով» ֆիլմը: Ֆիլմի համառեժիսորն է ուկրաինացի Ելենա Ֆետիսովան: Այսօր կայացած մրցանակների հանձնման արարողությանը հրավիրված էր նաև նա, սակայն հրաժարվել էր ժամանել Հայաստան: Ֆետիսովան բաց նամակ է ուղարկել Հայաստանի նախագահ Սերժ Սարգսյանին, որում, մասնավորապես, ասված է. Կապված Ղրիմի հանրաքվեի շուրջ Ձեր դիրքորշման հետ, ըստ որի, այն անվանել եք «ժողովուրդների ինքորոշման իրավունքի իրացում` ազատ կամարտահայտման միջոցով», բայց որն, ըստ իս` որպես Ուկրաինայի քաղաքացի, հանդիսանում է միջազգային իրավակարգի և եվրոպական արժեքների խախտում, ինչպես նաև վտանգ է ներկայացնում Ուկրաինայի և համայն մարդկության խաղաղությանը և հանգստությանը, ես պաշտոնապես հայտարարում եմ, որ ինձ համար անընդունելի է մարտի 21-ին Երևանում կայանալիք մրցանակաբաշխության միջոցառմանը մասնակցելը: Մրցանակաբաշխության ինձ հասանելիք մասը կխնդրեմ հատկացնել հայ որբ երեխաների կարիքների հոգածությանը»:

«Այսօր առավոտյան տիկին Ելենա Ֆետիսովայից ստացել եմ նամակ, որում նա շատ հարգալից կերպով շարադրում է Երևան չժամանելու իր դրդապատճառները: Իր գործընկերի միջոցով իրեն կփոխանցեմ պետական մրցանակը և իր իսկ ցանկությամբ` մրցանակի դրամական բաղադրիչը կուղղենք բարեգործական նպատակներին՝ այն կրկնապատկելով Հայաստանի նախագահի հիմնադրամից»,- ասաց երկրի ղեկավարը:

Նշենք, որ որպես պետական մրցանակ շնորհվում է՝ մրցանակի դափնեկրի վկայագիր, կրծքանշան և դրամական պարգև՝ 5 միլիոն դրամի չափով: Վկայագիրն ու կրծքանշանը նախագահ Սերժ Սարգսյանը հանձնեց ֆիլմի պրոդյուսեր Թագուհի Կարապետյանին:

Սերժ Սարգսյանն իր խոսքում ասաց, որ հայերն ու ուկրաինացիները դարեր շարունակ ուս-ուսի կռվել են զավթիչների դեմ, պատմության հազարավոր փառավոր էջեր ունեն. «Այդպես եղել է և այդպես էլ շարունակվելու է»:

Սակայն, նախագահի խոսքով, ժամանակի և իրադարձությունների թոհուբոհի մեջ տարբեր երևույթներ ունենում են տարըմբռնումներ:

«Ժամանակի ընթացքում ամեն ինչ հստականում է, տարակարծությունները վերանում են և ամեն ինչ ընկնում է իր տեղը: Մեկ անգամ ևս կրկնում եմ, որ ուկրաինացիները մեր եղբայրներն են»,- ասաց Հայաստանի նախագահը: