Ձեր վստահելի աղբյուրը

«Ընդդիմության դաշտի բանալին ոչ իմ ձեռքում է, ոչ էլ որևէ մեկի: Եթե ՕԵԿ-ը հայտարարում է ընդդիմադիր դառնալու մասին, ապա իրենք կարող են այդ դաշտում գործել: Բայց թե ինչպիսին կլինի քաղաքացիների աջակցությունն իրենց դա արդեն այլ խնդիր է»,- Panorama.am-ին ասաց «Ժառանգություն» կուսակցության փոխնախագահ Արմեն Մարտիրոսյանը` «Օրինաց երկիր» կուսակցության կայացրած որոշման վերաբերյալ, ըստ որի ՕԵԿ-ը մաս չի կազմի ձևավորվելիք կոալիցիային և հնարավոր է գործի ընդդիմության դաշտում:

Ա.Մարտիրոսյանի համար այդ որոշումը անակնկալ չէր այնքանով, որքանով հստակ է, որ իշխանությունը ճգնաժամ է ապրում և վերջին երկու համապետական ընտրությունները չլուծեցին առկա խնդիրները, նույնիսկ ավելի խորացրեցին այդ ճգնաժամը. մասնավորապես, ընտրողների ձայների 70 տոկոսը ստացավ մի թեկնածու, բայց հաղթող ճանաչվեց մյուսը և սա, ըստ Ա.Մարտիրոսյանի, աշխարհի պրակտիկայում շատ քիչ է լինում:

«Ուստիև այդ բոլոր զարգացումները, խնդիրները ոչ միայն քաղաքական դաշտում, այլև մնացած ոլորտներում բերեցին նրան, որ ճգնաժամ առաջացավ նաև իշխանության շարքերում: Պատահական չէ, որ վարչապետ փոխվեց, ՕԵԿ-ը դուրս եկավ կոալիցիայից, դեռ էլի զարգացումներ կլինեն, որոնք ապացուցում են ասածս: Իսկ մենք շատ լավ հասկանում ենք, որ եթե իշխանությունն ուժեղ է լինում կամ գործընթացները զարգացման միտում են արձանագրում ոչ ոք հենց այնպես իշխանությունից այդ պահին դուրս չի գա: Կարծում եմ պատճառը նաև դա է, որ ՕԵԿ-ը դուրս եկավ, առավել ևս իրենք հստակ նշել են, որ կուսակցության սպասելիքները չեն արդարացել, իրենք բոլորովին այլ պատկերացում են ունեցել կոալիցիոն համագործակցության մասին, ու հատկապես վարչապետի նշանակման մասին են այլ պատկերացումներ ունեցել, քանի որ Հովիկ Աբրահամյանը իրենց պատկերացրած վարչապետը չէ»,- հղում անելով ՕԵԿ-ի տարածած հայտարարությանն ասաց «Ժառանգության» փոխնախագահը:

Հարցին` պատրաստ է «Ժառանգությունը» քննարկել ՕԵԿ-ի հետ հնարավոր համագործակցության եզրերը Panorama.am-ի զրուցակիցը նշեց, որ եթե իրենք դիմեն կուսակցությանը ինչ-որ հարցով, ապա պարզ է, որ դա քննարկման առարկա կդառնա: Իսկ հարցին, փաստորեն ընդդիմությունը չի կաշկանդվում, որ ՕԵԿ-ը վերջին տարիներին լինելով ՀՀԿ կոալիցիոն գործընկերը տապալել է ընդդիմության օրինագծերը, նախաձեռնությունները և այլն, Ա.Մարտիրոսյանն արձագանքեց:

«Բացի «Ժառանգությունից» բոլորը եղել են իշխանությունում այս կամ այն ժամանակահատվածում և բնականաբար, ինչ-որ քայլեր կատարել են, որոնք ընդունելի չի եղել հասարակության համար: Դա նաև իշխանության տրամաբանությունն է հուշում և կոալիցիոն պայմանավորվածության տրամաբանությունը, ուստիև չեմ կարծում, թե այդ իմաստով ինչ-որ նոր կամ առանձնահատուկ իրավիճակ է: Բայց ցանկացած պարագայում, երբ ՕԵԿ-ն իրենց թիրախներն ու նպատակները հայտարարի, դրանից էլ կերևա ` համագործակցության դաշտ կա, թե չկա, քանի որ համագործակցում են կոնկրետ խնդիրների շուրջ, կոնկրետ օրակարգի շուրջ, այլ ոչ թե բառերով»:

Ա.Մարտիրոսյանը նաև հավելեց, որ այն ամենը, ինչ այսօր տեղի է ունենում և քաղաքական, և իշխանական դաշտում միանշանակ ապացուցում է այն մոտեցումը, որ մեր երկրին պետք են արտահերթ ընտրություններ և դրանց միջոցով այս ճգնաժամի հանգուցալուծում, որովհետև վերջին ոչ խորհրդարանական և ոչ էլ նախագահական ընտրությունները այդ ճգնաժամը չեն լուծել: