Ձեր վստահելի աղբյուրը

Ադրբեջանի լրագրողների ռազմական հետազոտությունների «Դոկտրինա» կենտրոնի ղեկավար Ջասուր Սումերենլին գտնում է, որ Ադրբեջանի պաշտպանության նախարար Զաքիր Հասանովի՝ սահմանամերձ գոտում ծառայող զինվորներին ուղղված հանձնարարությունը «ավելի դաժան լինել» սխալ է և հակասում է երկրի վարած քաղաքականությանը: Այս մասին հայտնում է ադրբեջանական «Ազադլիգ» թերթը:

Թերթը հիշեցնում է, որ օրերս զինված ուժերի զորամիավորումների և զորամասերի` սահմանամերձ շրջաններում լայնածավալ զինավարժանքների անցկացման ժամանակ Ադրբեջանի պաշտպանության նախարար Զաքիր Հասանովը հրամանատարական անձնակազմի հետ անցկացրած խորհրդակցություններում սպաներին հատուկ հանձնարարել է «թշնամու նկատմամբ ավելի դաժան, ավելի վճռական լինել»:

Թերթը հայտնում է, որ նախարարի այդ հայտարարությունը դեռևս չի հերքվել Ադրբեջանի ՊՆ-ի կողմից, և այս լուրը հրապարակել են նաև պաշտոնական լրատվական կայքերը:

Ջասուր Սումերենլիի խոսքերով՝   նախարարի անունից նման հայտարարության տարածումը անհաջող քայլ է:

«Եթե այդ հայտարարության տարածման մեջ առկա է նախարարության մամուլի ծառայության դերը, դա նշանակում է, որ նախարարության տեղեկատվական քաղաքականությունն անհաջողության է մատնվել: Աշխարհի ոչ մի ժողովրդավարական երկրում նախարարի կողմից նման հայտարարություն չի հնչեցվում»,- հայտնել է փորձագետը:

Նրա կարծիքով՝ նման կոչերը հիմնականում հաշվարկված են ներքին լսարանի համար:
Ներկայիս իրականության մեջ որևէ պատերազմի հավանականություն առկա չէ: Դրանք միմիայն քաղաքական քարոզչության ձևեր են:

«Որպես կանոն, իշխանությունները նման քայլերի են դիմում ժողովրդավարության, մարդու իրավունքների բնագավառում ճնշումների, շփման գծում իրավիճակի լարվելու ժամանակ: Ցանկացած դեպքում` խաղաղությանը կողմնակից երկրի նախարարը չպետք է խոսի դիակներից և դաժանություններից»,- նշել է Ջասուր Սումերենլին: