Ձեր վստահելի աղբյուրը

Ալ.Սպենդիարյանի անվան օպերայի և բալետի ազգային ակադեմիական թատրոնում նախօրեին մեծ հանդիսավորությամբ բացվել է «Իմ Հայաստան» համահայկական 2-րդ փառատոնը, որին ներկա էին ՀՀ առաջին տիկին Ռիտա Սարգսյանը, Հայաստանի Ազգային Ժողովի նախագահ Գալուստ Սահակյանը, ՀՀ վարչապետ Հովիկ Աբրահամյանը, ՀՀ սփյուռքի նախարար Հրանուշ Հակոբյանը և այլ պաշտոնատար անձինք, հասարակական գործիչներ, արվեստագետներ, մտավորականներ: Այս մասին հայտնում է սփյուռքի նախարարության մամուլի ծառայությունը:

Բացման արարողությունը բաղկացած է եղել 3 հիմնական մասերից` պատվիրակությունների շքերթ, բուն համերգային ծրագիր, մասնակիցների ընդհանուր շուրջպար:

Բուն համերգային ծրագիրը մեկնարկել է Հայաստանի Հանրապետության օրհներգով՝ Աննա Մայիլյանի կատարմամբ:

Ողջույնի խոսքով հանդես է եկել ՀՀ վարչապետ Հովիկ Աբրահամյանը:

Նա մասնավորապես նշել է. «ՀՀ Կառավարության և անձամբ իմ անունից ջերմորեն ողջունում եմ բոլոր մասնակիցներին: Բարո՛վ եք եկել Հայաստան: Ազգը ճանաչելի դարձնելու լավագույն միջոցը մշակույթն է: Այստեղ համախմբվել է Հայաստանի, Արցախի և Սփյուռքի եռամիասնությունը, որը մեր ուժի իրական գրավականն է: Հավաքվելով հայրենիքում և ձեր ներուժը ներդնելով հայրենի մշակույթի զարգացման գործում՝ դուք ձեր նպաստն եք բերում Հայոց Ցեղասպանության 100-րդ տարելիցի միջոցառումների իրականացման գործընթացում: Սա հայանպաստ, հայանվեր միջոցառում է: Շնորհակալություն և բարի երթ բոլոր մասնակիցներին»:

Այնուհետև միջոցառման հանդիսավարներ Ավետ Բարսեղյանը և սիրիահայ ուսանողուհի Լուսի-Վանա Կարապետյանը բեմ են հրավիրել «Իմ Հայաստան» փառատոնի «Պարարվեստի օրեր» ծրագրին մասնակցելու համար աշխարհի 12 երկրներից հայրենիք ժամանած 36 պարախմբերին՝ ՌԴ-ից՝ «Շիրակ», «Տաշիր», «Կռունկ», «Հայասա», «Արմավիր», «Նարեկ», «Արին Բերդ», «Տարոն», «Նարե», «Արենի», «Կարոտ», «Արփի», «Հայաստանի փայլեր», «Արտույտ», «Նաիրի», «Անի», «Թերպսիխորա», «Նոյան», Վրաստանից՝ «Անի», «Ֆանտազիա», «Վանք», «Ջեյրան», «Վաչյան», «Բարալեթ», «Նաիրի», Ուկրաինայից՝ «Արաքս», «Արմենիա», Լիբանանից՝ «Արին», Քուվեյթից՝ «Շաքե», Ավստրալիայից՝ «Նաիրի», Կանադայից՝ «Անի», Ֆրանսիայից՝ «Արա», ԱՄՆ-ից՝ «Զվարթնոց» պարային համույթներին, ինչպես նաև Հայաստանի և Արցախի պարախմբերին:
2012թ. առաջին անգամ անցկացված «Իմ Հայաստան» փառատոնի մասին պատմող տեսաֆիլմը դիտելուց հետո Արցախի պարի պետական համույթը ներկայացրել է Հայոց Ցեղասպանության հարյուրերորդ տարելիցին նվիրված «Հիշում եմ և պահանջում» խորագրով պարային համարը:

Երաժշտական կատարումներով հանդես են եկել ՀՀ վաստակավոր արտիստ Շուշան Պետրոսյանը, ՀՀ ժողովրդական արտիստ Թովմաս Պողոսյանի ղեկավարած «Սայաթ-Նովա» մշակութային միության նորօրյա աշուղների խումբը, ՀՀ վաստակավոր արտիստ, դուդուկահար Գևորգ Դաբաղյանը և նրա սաները, ՀՀ վաստակավոր արտիստ Լեյլա Սարիբեկյանը, երգիչներ Համլետ Գևորգյանը և Արմինկան, պարային կատարմամբ՝ «Բերդ» ՀՀ վաստակավոր պարային համույթը:

Փառատոնի բացմանն առաջին անգամ ցուցադրվել է Հայոց ցեղասպանության 100-րդ տարելիցին նվիրված պարային սյուիտ: Մասնակիցները հանդես եկան առանձին համարներով և միասին պարեցին հայկական ավանդական քոչարին:

Նշենք, որ «Իմ Հայաստան» համահայկական փառատոնը իրականացնում է ՀՀ սփյուռքի նախարարությունը, ՀՀ Նախագահ Սերժ Սարգսյանի բարձր հովանու ներքո` 2012 թվականից: