Ձեր վստահելի աղբյուրը

«Բաքվում Իրանի դեսպանությունը պատրաստվում է բողոքի նոտա հղել Ադրբեջանի ԱԳ նախարարությանը»,-այդ մասին հաղորդում է իրանական «Ղաֆղազ.իռ» կայքը:

Տեղեկատվության համաձայն՝ Ադրբեջանի խորհրդարանի անվտանգության և պաշտպանության հարցերով հանձնաժողովի անդամ Զախիդ Օրուջը «Ենի Մուսավաթ» օրաթերթին տված հարցազրույցում, անդրադառնալով վերջերս Ադրբեջանի տարածքով Վրաստան տեղափոխված 3 տոննա հերոյինի գործին, Իրանի գերատեսչական կառույցներին մեղադրել է այդ գործի հետ առնչություն ունենալու մեջ:

Ադրբեջանում Իրանի դեսպանության տեղեկատվական բաժնի ղեկավար Սեյյեդ Մոհամմադ Այաթոլլահին, անհիմն որակելով ադրբեջանցի պատգամավորի՝ Իրանի հասցեին ուղղված մեղադրանքները, մասնավորապես նշել է. «Իրանի Իսլամական Հանրապետությունն թմրանյութերի ապօրինի տարանցման դեմ պայքարող ամենագործունակ երկրներից մեկն է, և այդ պայքարում մեր երկիրը բազմաթիվ նահատակներ է տվել: Իրանը մի քանի անգամ Ադրբեջանին առաջարկել է թմրանյութերի դեմ պայքարում համատեղ պայքարել, սակայն մինչ այժմ որևէ պատասխան չի ստացել»:

Հիշեցնենք, որ Ադրբեջանում Իրանի դեսպան Մոհսեն Փաք Այինը, վերջերս իրանական «ԻՌՆԱ» լրատվական գործակալությանը տված հարցազրույցում, հակադարձելով Ադրբեջանի այն պնդմանը, թե այդ երկիր մուտք գործող թմրանյութերի 95 տոկոսը Իրանից է ներկրվում, մասնավորապես նշել էր. «Իրանը թմրանյութերի մուտքը Կովկաս՝ մասնավորապես Ադրբեջան կանխելու նպատակով լուրջ պայաքար է մղում: Իրանի և Ադրբեջանի միջև թմրանյութերի դեմ պայքարի շրջանակներում համաձայնագիր է ստորագրվել, սակայն Ադրբեջանը ցանկություն չունի հետևելու այդ համաձայնագրին: Բաքուն, հրապարակայնացնելով թմրանյութերի տարանցման թեման, փորձում է այնպիսի բացասական մթնոլորտ ստեղծել, թե իբր Իրանն է մեղավոր այդ հարցում»:

Դեսպան Փաք Այինը, շարունակելով Ադրբեջանի հասեցին քննադատությունը, հավելել էր. «Եթե Ադրբեջանը համագործակցի Իրանի հետ, ապա մաքսանենգները տարանցման հետ կապված լուրջ խնդիրներ կունենան: Մինչև 2010թ. մենք լավ համագործակցում էինք, սակայն դրանից հետո Ադրբեջանը ցանկություն չի հայտնում: Այսօր Ադրբեջանում թմրանյութերի ապօրինի շրջանառությամբ զբաղվող բանդաներ կան ձևավորված: Թմրանյութերի ներկրումը Կովկաս հիմնականում կառավարվում է Ադրբեջանում գործող բանդաների կողմից»:

Ավելի վաղ ԻԻՀ սահմանապահ ծառության հրամանատար գեներալ Հոսեյն Զոլֆաղարին վերջերս Բաքվում լրագրողների հետ հանդիպման ժամանակ, անդրադառնալով թմրանյութերի մաքսանենգության դեմ պայքարում Իրանի ձեռք բերած հաջողություններին, մասնավորապես նշել էր . «Ադրբեջանը գտնվում է Աֆղանստանից Եվրոպա թմրանյութերի տարանցման ճանապարհին: Եթե թմրանյութերի դեմ պայքարում Իրանի գործուն քայլերը չլինենին, ապա Կովկաս և Ադրբեջան տասնյակ տոննա թմրանյութ մուտք կգործեր»:

Նկատենք, որ ԱՄՆ պետդեպարտամենտի՝ Ադրբեջանին նվիրված զեկույցներից մեկում նշվում է, որ Ադրբեջանը Աֆղանստանից, Միջին Ասիայից և Իրանից դեպի Ռուսաստան և Եվրոպա թմրանյութերի առաքման գործում հանդիսանում է որպես տարանցիկ երկիր: Ըստ այդ զեկույցի՝ Ադրբեջանում վերջին տարիներին ավելացել է նաև թմրամոլների թիվը:
Ադրբեջանի գլխավոր դատախազի տեղակալ Ռուստամ Ուսուբովը դեռևս 2010թ. հայտարարել էր, որ Աֆղանստանում ապօրինի կերպով արտադրված թմրանյութերի շուրջ 35 տոկոսը տարանցվում է Ադրբեջանի տարածքով:

Վիկիլիկսյան հրապարակումների համաձայն՝ Ադրբեջանում ԱՄՆ նախկին դեսպան Էնն Դերսիի գրած նամակներից մեկում նշվում է, որ Ռուսաստանում թմրանյութերի բիզնեսը մեծամասամբ վերահսկվում է ադրբեջանցիների կողմից: