Ձեր վստահելի աղբյուրը

«Լարված այս իրավիճակը սահմանին պայմանավորված է ոչ միայն տարածաշրջանային, այլև գլոբալ գործոններով, քանի որ այդ մակարդակի վրա տեղի է ունենում Ռուսաստան-ԱՄՆ-ՆԱՏՕ-ԵՄ  հարաբերությունների սրացում»,- Panorama.am-ի հետ զրույցում ասաց Ռուսաստանի գիտությունների ակադեմիայի համաշխարհային տնտեսության և միջազգային հարաբերություների ինստիտուտի ավագ գիտաշխատող, Կովկասագետների գիտական միավորման նախագահ Ալեքսանդր Կրիլովը:

Նրա խոսքով, և այդ սրացման պատճառը ոչ թե Ուկրաինան է, այլ այն, որ ՌԴ դիրքորոշումը Իրաքի, Սիրիայի և մի շարք այլ հարցերի վերաբերյալ ընդունելի չէ ԱՄՆ-ի համար.

«Իսկ վերջ դնել Ռուսաստանի սեփական քաղաքականություն ու դիրքորոշում ունենալուն հնարավոր է միայն նրան միջազգային բեմում մեկուսացնելու ճանապարհով: Այստեղ ազդեցություն կունենան նաև պատժամիջոցները, տնտեսական ինչ-որ խնդիրները: Հայաստանի և Ադրբեջանի միջև հարաբերությունների վատթարացումը տեղի է ունենում հենց այդ կոնտեքստում,- նշեց Ա.Կրիլովն ու ավելացրեց,- պատերազմ Լեռնային Ղարաբաղում հնարավոր է միայն այն դեպքում, եթե Ռուսաստանը հեռանա տարածաշրջանից ու այլևս Հայաստանի անվտանգության երաշխավոր չլինի»:

Ու թեև նման հեռանկար բացառել պետք չէ, այդուհանդերձ, նշեց մեր զրուցակիցը, դա քիչ հավանական է թվում.

«Կարծում եմ ու նույնիսկ համոզված, որ Ռուսաստանը կպահպանի իր` համաշխարհային հիմնական խաղացողներից մեկի դերակատարումը և արևմտյան գործընկերները ուզեն թե չուզեն հաշվի կնստեն նրա շահերի հետ: Եվ այդ դեպքում ամեն բան կխաղաղվի, այդ թվում և իրավիճակը Հարավային Կովկաս տարածաշրջանում»,- հավելեց Ա.Կրիլովը:

Հարակից հրապարակում` 
Հայացք Մոսկվայից -2. Ա.Եպիֆանցև. Պատերազմ չի լինի` հաշվի առնելով Ադրբեջանի պարտվելու մեծ հավանականությունը
Հայացք Մոսկվայից. Ս.Ուրալով. Եթե Մոսկվան կոշտ դիրքորոշում ընդունի, ապա հնարավոր կլինի խուսափել պատերազմից