Ձեր վստահելի աղբյուրը

«Քառյակը» պատրաստվում է սահմանամերձ գյուղերի բնակիչներին արտոնություններ տալու առաջարկների փաթեթ ներկայացնել Կառավարությանը: Այս մասին այսօր լրագրողների հետ հանդիպման ժամանակ ասաց «Բարգավաճ Հայաստան» խմբակցության անդամ Միքայել Մելքումյանը:

Մասնավորապես, առաջարկվում է սահմանամերձ գոտու բնակիչներին ազատել հողի հարկից և գույքահարկից, փոքր և միջին բիզնեսի համար նվազեցնել արտոնագրային վճարները, ինչպես նաև շրջանառության հարկի տոկոսադրույքները:
Անդրադառնալով «Արդյունաբերական քաղաքականության մասին» օրենքի նախագծին` Մ.Մելքումյանը նշեց, որ այս օրենքի ընդունումից հետո նախատեսվում է մարզերում, այդ թվում` սահմանամերձ գոտիներում ստեղծել արդյունաբերական գոտիներ:

«Իհարկե սահմանամերձ գոտում ներդրումներ կատարելը հեշտ չէ, բայց պետք է պայմաններ ստեղծենք, որ ներդրումներ կատարվեն: Այն մարդիկ, ովքեր մնացել են սահմանամերձ բնակավայրերում, նրանք չեն հեռանալու, ուստի Կառավարության խնդիրն է միջավայր ստեղծել ներդրումների համար»,- ասաց Մ.Մելքումյանը:

Ասուլիսի մեկ այլ բանախոս, Հայրենական ապրանք արտադրողների միության նախագահ Վազգեն Սաֆարյանը նշեց, որ արտաքին վտանգների առկայության պարագայում պառլամենտական ընդդիմադիր կուսակցությունները կառուցողական մոտեցում ցուցաբերեցին: Ըստ նրա` կուսակցությունների համագործակցությունը Կառավարության հետ արդեն իսկ տալիս է իր դրական արդյունքները:

«Սահմանային գյուղերին ազատ տնտեսական գոտիների կարգավիճակ տալու գաղափարը մեր միության աշխատանքային ծրագրում եղել է, և լավ է, որ այս իրավիճակը բերեց նրան, որ Կառավարությունն արդեն գնում է արդյունավետ քայլերի»,- ասաց Վ.Սաֆարյանը` հավելելով, որ սահմանամերձ գյուղերում ազատված լինելով ամեն տեսակի հարկերից, արտերկրում աշխատող շատ գործարարներ իրենց հայրենի գյուղերում փոքր արտադրություններ կհիմնեն: Արդյունքում` այդ գյուղերը որոշակի զարգացում կունենան:

Անդրադառնալով ԱԺ ՀԱԿ խմբակցության պատգամավոր Նիկոլ Փաշինյանի կողմից ներկայացված «Հայաստանի Հանրապետության Սահմանապահ համայնքների մասին» ՀՀ օրենքի նախագծին, Վ.Սաֆարյանը նշեց, որ թեև ծանոթ չէ այդ նախագծին, սակայն չի կարծում, որ այսօրվա իրավիճակից ելնելով` այն այն կոնստրուկիվ չի լինի:

«Այսօր իրավիճակն այնպիսին է, որ բոլոր դեպքերում պետք է ջանքերը մեկտեղել և գտնել արդյունավետ ճանապարհ, որը երկիրը դուրս կբերի ստեղծված իրավիճակից»,- ասաց Վ.Սաֆարյանը: