Ձեր վստահելի աղբյուրը

Քաղաքի արտաքին գովազդը պետք է համահունչ լինի տվյալ քաղաքի արտաքին տեսքին: Այս մասին այսօր լրագրողների հետ հանդիպման ժամանակ ասաց անկախ բրենդինգի փորձագետ Տիգրան Բալոյանը: Նրա գնահատմամբ, Երևանի արտաքին գովազդի վիճակն այսօր այնքան էլ վատ չէ. «Իհարկե զարգանալու տեղ ունի: Ցանկացած գովազդում, այդ թվում` արտաքին, կրեատիվ լուծումները քիչ են: Այսօր մեր երկրում ավելի շատ բացակայում են որակով պատրաստված գովազդները»:

Ըստ նրա` գովազդ պատվիրողները պատրաստողների նկատմամբ պետք է խիստ պահանջներ դնեն, քանի որ տվյալ գովազդից է կախված իրենց ապրանքի կայացումը: Անդրադառնալով Երևանի քաղաքապետարանի գործառույթներին, Տ.Բալոյանը նկատեց, որ յուրաքանչյուր գովազդ տեղադրելուց առաջ պետք է ստանալ քաղաքապետարանի թույլատությունը, բայց եթե գովազդում լինի որևէ օտար բառ, ապա այն անմիջապես մերժվում է:

Սակայն փորձագետը գտնում է, որ ցանկալի կլիներ այս դեպքում քաղաքապետարանը ավելի ճկունություն ցուցաբերեր. «Քաղաքապետարանը այնքան կարծրացած է լեզվի օրենքից, որ որևէ շեղում հնարավոր չէ անել, մինչդեռ միջազգային փորձը ցույց է տալիս, որ որոշ օտար բառեր պահպանելով գովազդն ավելի համ ու հոտ է ստանում»:

Նրա գնահատմամբ, քաղաքապետարանին այս հարցում ավելի շատ «ճնշում է» Լեզվի պետական տեսչությունը: Ըստ նրա` քաղաքապետարանը գովազդից մեծ գումարներ է ստանում, բնականաբար, ցանկալի կլիներ, որ քարացած չլիներ:

«Ես չեմ ասում, որ լավ կլիներ աղավաղել մայրենի լեզուն, ես դրան դեմ եմ, իհարկե ողջունելի է այս մոտեցումը, պարզապես գովազդը հետաքրքիր դարձնելու համար պետք է ավելի ճկուն լինել»,- նշեց Տ.Բալոյանը:

Նա միաժամանակ նկատեց, որ Լեզվի տեսչությունը առաջին հերթին պետք է վերահսկի եթերով հեռարձակվող գովազդը: Ինչ վերաբերում է քաղաքի արտաքին գովազդին, Տ.Բալոյանի խոսքերով, դա քաղաքային կուլտուրայի մի մասն է:

«Չգիտես ինչու գովազդը համարվում է չարիք, բայց դա ավելի շատ բարիք է, քանի որ այն լավ ինֆորմացիայի հասցնելու, լավը վատից տարբերակելու միջոց է: Բացի այդ, արտաքին գովազդից քաղաքային բյուջե մեծ գումարներ են մտնում, ինչը հնարավորություն է տալիս էլ ավելի զարգացնել քաղաքը»,- ասաց փորձագետը:

Այդուհանդերձ, Տ.Բալոյանը նշեց, որ այսօր Երևանում տեղադրված գովազդային վահակներից երբեմն այնպիսի պատկերացում ես ստանում, որ հայերի մոտ երևակայությունը բացակայում է. «Եթե նայում ենք գովազդի որակին, ապա մեծամասամբ կրկնում ենք օտարներին, կամ էլ բավականին անճաշակ է արվում»:

Ինչ վերաբերում է տոնական օրերին մայրաքաղաքի ձևավորմանը, Տ.Բալոյանը նկատեց, որ կարելի է քաղաքն ավելի գեղեցիկ և հետաքրքիր ձևավորել, ամեն տարի ավելիին է սպասում, բայց, սովորաբար, որևէ նոր բան չի արվում. «Միգուցե գումարն է պատճառը: Ի վերջո լավ երևակայությունը, լավ մասնագետը թանկ արժեն: Կարծում եմ, որ այս դեպքերում կարող են նաև արտերկրից որակյալ մասնագետների հրավիրել»:

Գովազդային հարցերով փորձագետ Արտակ Համբարձումյանն էլ անդրադառնալով հասարակական տրանսպորտի արտաքին գովազդին` նշեց, որ այսօր Երևանում կան հետաքրքիր գովազդներով ներկայացված ավտոբուսներ, որոնք միայն գեղեցկացնում են մայրաքաղաքը, իսկ մարդկանց մոտ էլ առաջացնում են դրական էմոցիաներ: