ԵԱՀԿ-ն քննադատել է ադրբեջանցի բլոգեր Մեհման Հուսեյնովի ձերբակալությունը
Ադրբեջանի Լրագրողների ազատության ու անվտանգության ինստիտուտի աշխատակից, բլոգեր Մեհման Հուսեյնովի ձերբակալությունից հետո ԵԱՀԿ-ի` ԶԼՄ-ների ազատության գծով հատուկ ներկայացուցիչ Դունյա Միյատովիչը հանդես է եկել հայտարարությամբ` կոչ անելով Ադրբեջանի իշխանություններին դադարեցնել անկախ ԶԼՄ-ներին ու իրավապաշտպաններին հետապնդելը: Հայտարարությունը հրապարակվել է կազմակերպության պաշտոնական կայքում:
«Ադրբեջանում նպատակաուղղված կերպով հետապնդում են անկախ ՀԿ-ների ու ԶԼՄ-ների ներկայացուցիչներին»,- հայտարարել է Միյատովիչը:
Ինչպես նշված է հայատարարության մեջ, Մեհման Հուսեյնովը ձերբակալվել է նոյեմբերի 10-ին Բաքվի օդանավակայանում: Նրան թույլ չեն տվել լքել երկիրը` Թբիլիսիում ԵԱՀԿ-ի աջակցությամբ անցկացվելիք միջազգային համաժողովին մասնակցելու: Նրան ազատ են արձակել երկարաժամյա հարցաքննությունից հետո:
Միյատովիչն իր հայտարարության մեջ նաև նշել է լրագրող Խաջիջա Իսմայիլովայի մասին, որը ևս չի կարողացել մասնակցել համաժողովին երկրից դուրս գալու արգելքի պատճառով:
«Ես կրկնում եմ կոչս Ադրբեջանի ղեկավարությանը` անկախ ԶԼՄ-ների նկատմամբ թշնամական քաղաքականությանը վերջ տալու վերաբերյալ»,- հայտարարել է նա:
Ինչպես փոխանցում է «Կավկազսկի Ուզելը», բլոգեր Մեհման Հուսեյնովին ազատ են արձակել մի քանի ժամ տևած հարցաքննությունից հետո, սակայն ոստիկանության աշխատակիցները հայտարարել են նրա դեմ քրեական գործի վերականգնման մասին, որը հարուցվել էր երկու տարի առաջ, և ըստ որի` Հուսեյնովին մեղադրում էին խուլիգանության համար` արգելելով վերջինիս լքել երկիրը: Հուսեյնովին ձերբակալել էին Ադրբեջանից հեռանալ փորձելիս, նրան հանձնել էին ոստիկանություն` անձնագրի կեղծման համար կասկածանքի հիման վրա:
Իրավաբան Գյունայ Իսմայիլովայի խոսքերով` այդ ժամանակ Հուսեյնովի դեմ քրեական գործ էր հոարուցվել Ադրբեջանի քրեական օրենսգրքի խուլիգանության 221.1 հոդվածով: Մասնավորապես, նրան մեղադրել էին ցենզուրայից դուրս հայհոյանքներ կիրառելու համար ոստիկանության աշխատակցի հասցեին: Դա կատարվել էր 2012-ի մայիսի 21-ին «Հասարակական պալատ» հանուն ժողովրդավարության քաղաքացիական շարժման բողոքի ցույցը տեսագրելու ընթացքում: Այնուհանդերձ, սույն հոդվածը վերաբերում է ոչ ծանր հանցանքների թվին, և համաձայն դրա տարվող հետաքննությունը չի կարող ավելի երկար տևել, քան 9 ամիս, նկատել է Իսմայիլովան: Նրա խոսքերով` հետաքննությունը դադարեցվել էր, սակայն քանի որ գործը չէր փակվել, Հուսեյնովին այս ամբողջ ընթացքում չեն թողնում երկրի սահմաններից դուրս:
«Մեկ շաբաթ առաջ նա տեղեկացրել է ոստիկանությանն ու դատախազությանը երկրիս դուրս գալու իր մտադրության մասին: Բանավոր կերպով նրան ասել են, որ դեմ չեն, և չնայած որ պաշտոնական փաստաղթուղթ նրան չեն տվել,նա որոշել է այնուհանդերձ փորձել մասնակցել ԵԱՀԿ-ի համաժողովին: Այժմ արդեն Մեհման Հուսեյնովին հայտարարել են, թե քրեական գործը վերականգնված է, և ուժի մեջ է իր նկատմամբ կիրառվող երկիրը լքելու արգելքն առանց հետաքննական մարմնի պաշտոնական թույլտվության»,- ասել է Իսմայիլովան:
Եթե բլոգերի մեղքն ապացուցվի, նրան սպառնում է պատիժ` հասարակական աշխատանքի տեսքով, 160-200 ժամ տևողությամբ կամ էլ ուղղիչ աշխատանքներ` մինչև մեկ օր տևողությամբ կամ էլ ազատազրկում` մինչև մեկ օր տևողությամբ: Նաև հիշատակվում է, որ հոկտեմբերի 27-ին Հուսեյնովին հարցաքննել են Ադրբեջանի գլխավոր դատախազության` ծանր հանցանքների գծով հետաքննական վարչությունում: Բլոգերի խոսքերով` իրեն հարցեր են տվել իր ղեկավարած «Գնդասեղ» (Sancaq) երգիծական հրատարակության ու իր եղբոր` Լրագրողների ազատության ու անվտանգության ինստիտուտի տնօրեն Էմին Հուսեյնովի մասին: Հարցաքննությունից հետո բլոգերը լրագրողներին հաղորդել էր, որ օգոստոսի 8-ից ի վեր տեղեկություններ չունի Էմին Հուսեյնովի գտնվելու վայրի վերաբերյալ, ասված է նյութում:
Նյութ թեմայի շուրջ
Ադրբեջանում ֆոտոթղթակից է ձերբակալվել
Լրահոս
Տեսանյութեր
Վարդան Պողոսյան. Այս ամբողջ գործընթացը հակասահմանադրական է
