Օբաման հայտարարել է Ղրիմի տնտեսական շրջափակման մասին

Աշխարհում 13:33 20/12/2014

Օբաման հայտարարել է Ղրիմի տնտեսական շրջափակման մասին

ԱՄՆ նախագահ Բարաք Օբաման հրամանագիր է ստորագրել, որով նոր պատժամիջոցներ են սահմանվում Ռուսաստանի նկատմամբ: Մասնավորապես, Վաշինգտոնը մտադիր է արգելափակել բոլոր ֆիզիկական անձնաց ու ընկերությունների ակտիվները, որոնք կապված են Ղրիմի հետ: Այս մասին հաղորդում է «Լենտա.ռու» կայքը, վկայակոչելով Սպիտակ տան մամուլի հաղորդագրությունը:

«Հրամանագրով ԱՄՆ քաղաքացիներին արգելվում է ցանկացած ներդրում իրականացնել Ուկրաինայի Ղրիմի շրջանում, Ղրիմից ապրանքների, ծառայությունների և տեխնոլոգիաների ներմուծում դեպի ԱՄՆ, ինչպես նաև ապրանքների, ծառայությունների և տեխնոլոգիաների արտահանում, վաճառք ու մատակարարում Ղրիմ ԱՄՆ բնակիչների կողմից»,-ասված է հաղորդագրության մեջ:

Բացի այդ, Բարաք Օբաման արգելել է ամերիկացիներին որևէ բիզնես գործունեություն ծավալել այն ընկերությունների հետ, որոնք վերահսկվում են Ղրիմի բնակիչների կողմից կամ ունեն ֆինանսական և նյութական որևէ կապ պատժամիջոցների տակ հայտնված անձանց հետ:

ԱՄՆ ֆինանսների գերատեսչության տվյալներով, մուտքի արգելք է սահմանվել Ռուսաստանի և Ուկրաինայի ևս 24 քաղաքացիների նկատմամբ, մի շարք կազմակերպությունների, այդ թվում Կոնստանտին Մալոֆեևի «Marshall Capital Partners» հիմնադրամի, «Գիշերային գայլեր» բայկերական ակումբի, «Դոնբասի ժողովրդական աշխարհազորայինների»,«Նովոռոսիա» կուսակցության և այլնի նկատմամբ:

Միացյալ Նահանգներ մուտք գործելու արգելք է սահմանվել Ղրիմի դատախազ Նատալյա Պոկլոնսկայայի, ռուս ձեռնարկատեր Կոնստանտին Մալոֆեևի, ԴԺՀ և ԼԺՀ ինքնահռչակ հանրապետությունների առաջնորդներ Օլեգ Ցարևի, Ալեքսանդր Զախարչենկոյի, աշխարհազորայինների հրամանատարներ Ալեքսեյ Մոզգովոյի, Իգոր Բեզլերի և այլոց նկատմամբ:

Մեկնաբանելով պատժամիջոցների ընդլայնումը, ԱՄՆ նախագահը հայտարարել է, թե դրանք վերահաստատում են պետության դիրքորոշումն այն մասին, որ ԱՄՆ-ն չի պատրաստվում համակերպվել Ռուսաստանի կողմից «Ղրիմի անեքսիայի և օկուպացիայի հետ»:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: