Ձեր վստահելի աղբյուրը

ՏՄՊՊՀ-ի կողմից իրականացված ուսումնասիրությունների արդյունքներով՝ դրամի կտրուկ արժեզրկումը լուրջ ազդեցություն է թողել ապրանքների գների մակարդակի վրա, սակայն փոխարժեքի կայունացումից հետո դրանց գները մեծ չափով իջել են: Այսօր կառավարության նիստից հետո լրագրողների հետ զրույցում հայտարարեց ՀՀ տնտեսական մրցակցության պաշտպանության պետական հանձնաժողովի նախագահ Արտակ Շաբոյանը՝ ընդգծելով, որ դրանք դեռ նախնական արդյունքներն են:

Նա նշեց, որ իրենք ուսումնասիրել են այն ոլորտները, որտեղ գործունեություն են իրականացնում խոշոր ընկերությունները. «Այդ շուկաները վերաբերվում են շաքարավազին, կարագին, ալյուրին, ձեթին, կաթնամթերքին, ձվի արտադրությանը, բենզինին և ևս մի քանի ոլորտների: Գնագոյացման հաշվարկներ կատարելու նպատակով մեր հանձնաժողովը տնտեսվարողներից մանրամասն տեղեկատվություն է պահանջել և ուսումնասիրությունները այս պահի դրությամբ ընթացքի մեջ են»:

Նա միաժամանակ հայտնեց, որ Հանձնաժողովը մոնիթորինգ է իրականացնում Երևան քաղաքի խոշոր սուպերմարկետներում, իսկ մնացած ապրանքային շուկայի մասով՝ լինի ընկույզ, մսամթերք, խնձոր, այսինքն՝ որտեղ բազմաթիվ տնտեսվարողներ են գործունեություն իրականացնում ու շուկան մրցակցային է, Հանձնաժողովը գների վերահսկման կամ կարգավորման գործառույթ չունի:

Անդրադառնալով բենզինի գներին, Ա.Շաբոյանն ասաց, որ այս ուղղությամբ ևս Հանձնաժողովը ուսումնասիրություններ է իրականացրել, որոնք մոտենում են ավարտին: Ըստ այդմ՝ հայաստանյան շուկայում բենզինի գները սեպտեմբերից սկսած պարբերաբար նվազել են՝ 470 դրամից հասնելով 440 դրամի (նոյեմբերի կեսերին), խոսքը ռեգուլյար տեսակին է վերաբերվում. «Նոյեմբերի կեսերին 440-ից բենզինի գինը բարձրացել է՝ հասնելով 470 դրամի: Այսինքն՝ այն աճել է 6-7 տոկոսի չափով, այն դեպքում, երբ նոյեմբերի կեսերին փոխարժեքի արժեզրկումը կազմել է 13%: Եթե փոխարժեքի խնդիրը չլիներ, բենզինի գների շարունակական նվազումը կլիներ ակնհայտ»:

Նրա խոսքերով՝ շատերին հետաքրքրում է, թե ինչու միջազգային շուկայում նավթամթերքի կտրուկ նվազումը չի ուղեկցվում հայաստանյան շուկայում բենզինի գների կտրուկ նվազմամբ:

«Բենզինի գնագոյացման հաշվարկները ցույց են տալիս, որ նավթի արժեքը փոքր տեսակարար կշիռ է կազմում բենզինի գնի մեջ: Դրա տեսակարար կշիռը կազմում է մինչև 10%: Նավթի վերամշակման վրա բավականին մեծ ծախսեր են կազմում, որը մեծացնում է բենզինի արժեքը: Բացի այդ, մեր երկրում բենզինի գնի վրա բավականին մեծ կշիռ են կազմում հարկերը»,- ասաց Ա.Շաբոյանը՝ հավելելով, որ այդ երկու գործոնների հետևանքով նավթի մեկ միավոր գնի փոփոխությունը շատ ավելի փոքր ազդեցություն է թողնում բենզինի գների վրա:

Բացի այդ, ըստ նրա, իրենց ուսումնասիրությունները ցույց են տալիս, որ այս տարվա ընթացքում հայաստանյան ընկերությունները բենզինի ներկրումն իրականացնում են Ռուսաստանի շուկայից, իսկ ռուսաստանյան շուկայում միջազգային շուկայի համեմատ բենզինի գնի նվազումը շատ ավելի դանդաղ է ընթանում:

Շաբոյանն ասաց նաև, որ ներկրումը իրականացվում է երկարաժամկետ պայմանագրերի հիման վրա և կարճաժամկետ հատվածում հնարավոր չէ միանգամից ստրատեգիական գործընկերներին փոխել. «Ամեն դեպքում, դա տնտեսվարողների բիզնես որոշումներն են և նրանց կայացած որոշումները ողջամիտ են բիզնես տեսանկյունից: Այն ձեռք բերման գները, որոնք տնտեսվարողները ներկայացնում են մեր հանձնաժողովին, դրանք ամբողջությամբ համահունչ են Ռուսաստանի արտահանման վիճակագրությանը»: